ʼE Tonu Koa Ke Fai Politike Ia Te Kau Kilisitiano Iā ʼAho Nei?

IĀ ʼAHO nei, ʼe mole fai politike ia te kau Kilisitiano moʼoni. Koteā tona tupuʼaga? Koteʼuhi ʼe natou mulimuli ki te faʼifaʼitaki ʼo Sesu ʼaē neʼe ina ʼui fēnei ʼo ʼuhiga mo ia totonu: “E mole au kau i te malamanei.” Kae neʼe ina ʼui fēnei ʼo ʼuhiga mo tana kau tisipulo: “E mole ko koutou a te malamanei.” (Soane 15:19; 17:14) Tou vakaʼi ia te ʼu tupuʼaga ʼo te mole kau ʼa te kau Kilisitiano ki te politike.

1. ʼE fakatuʼakoi ia te ʼu fealagia ʼo te tagata. ʼE ʼui ʼi te Tohi-Tapu ʼe mole maʼu e te tagata ia te fealagia ʼaē ke takitaki. Neʼe tohi fēnei e te polofetā ko Selemia: “E mole ko te tagata ae e ina taki ona lakaaga moka haele.”—Selemia 10:23.

ʼE mole feala ki te tagata ke takitaki ʼo mulimuli pē ki tona mālohi, ohagē pē neʼe mole fakatupu ia ia ke lava lele ohagē he manulele ʼaki pē te gaugaue ʼo ʼona nima. ʼI tana talanoa ʼo ʼuhiga mo te ʼu tuʼakoi ʼo te puleʼaga, neʼe ʼui fēnei e te tagata fai hisitolia ko David Fromkin: “Mai tona ʼaluʼaga ʼaē ko te ʼu puleʼaga ʼe takitaki e he ʼu tagata, koia lā ʼaē ʼe mole iku lelei ai tanatou takitaki pea mo tonatou kā haʼu. ʼE natou fakahoko he faʼahiga takitaki kae ʼe ʼi ai ʼona tuʼakoi.” (The Question of Government) Koia ʼe mole tou punamaʼuli ai ki te fakatokaga ʼaē ʼe tuʼu ʼi te Tohi-Tapu ke ʼaua naʼa tou tuku tatatou falala ki te ʼu foha ʼo te tagata.—Pesalemo 146:3.

2. Te fakaneke ʼo te ʼu laumālie agakovi iā ʼaho nei. ʼI te temi ʼaē neʼe fia foaki ai e Satana ia te ʼu puleʼaga ʼo te mālamanei kiā Sesu, neʼe mole fakafihiʼi e Sesu ia te pule ʼa te Tiapolo ki te ʼu puleʼaga fuli ʼo te mālamanei. Ki muli age, ʼi te tahi ʼaluʼaga, neʼe fakahigoaʼi e Sesu ia Satana ko “te pule o te malamanei.” Hili kiai ni taʼu, neʼe fakahigoaʼi e te ʼapositolo ko Paulo ia Satana ko “te atua o te malama-nei.” (Soane 14:30; 2 Kolonito 4:4, Tauhi Foou Fakaʼuvea) Neʼe faitohi fēnei ia te ʼapositolo ko Paulo ki ʼona tehina Kilisitiano: “He ko tatatou tau e . . . fakafehagai ki . . . te u aliki o te malama aeni o te fakapouli, mo te u laumalie agakovi i te u potu fakalagi.” (Efeso 6:12) ʼI tona fakahagatonu, ʼe mole ʼiloʼi e te hahaʼi ʼe ko te ʼu laumālie agakovi ʼaē ʼe natou puleʼi moʼoni ia te mālamanei. ʼE malave feafeaʼi ia te ʼaluʼaga ʼaenī ki tatatou faʼahiga manatu ʼo ʼuhiga mo te politike?

Kotou fakakaukauʼi age ia te faʼifaʼitaki ʼaenī: Ohagē pē ko he ʼu vaka liliki ʼe fetafeaʼaki ʼi te mālohi ʼo te ʼu peau, pea ʼe toe fēia mo te fetohoʼaki e te ʼu laumālie agakovi ia te tuʼu fakapolitike. Ohagē pē ko te mole feala ki te ʼu kauvaka ke natou hola mai te tatafe mālohi ʼo te tai, ʼe toe faigataʼa ki te kau fai politike hanatou hola mai te ʼu fakaneke mālohi ʼo te ʼu laumālie agakovi ʼaia. Pea ko tanatou fakatuʼutuʼu ʼe ko te fakahalaʼi ʼo te tagata pea mo fakamalaʼia te kele. (Apokalipisi 12:12) Koia, ko te fetogi pē ʼaē ʼe feala ke hoko moʼoni ʼe haʼu anai mai he tahi ʼe mālohi age ia Satana pea mo ʼana kau temonio. Pea ʼe gata pē anai kiā Sehova ʼAtua tokotahi.a—Pesalemo 83:19; Selemia 10:7, 10.

3. ʼE lagolago mālohi ia te kau Kilisitiano moʼoni ki te Puleʼaga ʼo te ʼAtua. Neʼe ʼiloʼi e Sesu pea mo tana kau tisipulo, ʼe fakatuʼu anai e te ʼAtua ʼi he temi ia he puleʼaga ʼi te lagi moʼo takitaki ia te kele kātoa. ʼE fakahigoa ʼi te Tohi-Tapu ia te puleʼaga ʼaia ko te Puleʼaga ʼo te ʼAtua pea mo fakahā ko Sesu Kilisito ʼaē neʼe hinoʼi ke Hau. (Apokalipisi 11:15) Mai tona ʼaluʼaga ʼaē ʼe malave anai ia te takitaki ʼo te Puleʼaga ʼaia ki te kele kātoa, koia neʼe fakatafito ai e Sesu ʼana akonaki ki te “logo lelei o te puleaga o te Atua.” (Luka 4:43) Neʼe ina toe akoʼi ki ʼana tisipulo ke natou faikole fēnei: “Ke aumai tau pule.” Koteā tona tupuʼaga? Koteʼuhi ʼe fakahoko moʼoni anai e te Puleʼaga ʼaia ia te finegalo ʼo te ʼAtua ʼi te kele ohagē ko selō.—Mateo 6:9, 10.

Kae koteā anai kā hoko ki te ʼu puleʼaga fakatagata? ʼE tali ia te Tohi-Tapu kiai, ʼe fakaʼauha anai ia te ʼu puleʼaga “o te kele katoa.” (Apokalipisi 16:14; 19:19-21) Kapau ʼe tui papau ia he tahi ʼe fakaʼauha kātoa anai e te Puleʼaga ʼo te ʼAtua ia te ʼu puleʼaga fakatagata, pea ʼe mahino ia ʼe mole lagolago anai ki te ʼu puleʼaga fakapolitike ʼaia. Kae kapau leva ʼe lagolago kiai pea ʼe hagē pē ʼe fakafeagai fakahagatonu ki te ʼAtua.

[Nota]

[Fakamatala ʼo te pāsina 6]

ʼE lagolago mālohi ia te kau Fakamoʼoni ʼa Sehova ki te Puleʼaga ʼo te ʼAtua kae mole ki te politike