“Nee Ke Fakaha . . . Ki Te u Toe Liliki”

ʼE kotou fia iloʼi koa ia te moʼoni ʼo ʼuhiga mo te ʼAtua? Peʼe ko ai ia ia? Kotea ʼae ʼe ina leleiʼia? Kotea tona finegalo? ʼI tana Folafola, te Tohi-Tapu, ʼe fakaha ai e Sehova ʼAtua ia te moʼoni ʼo ʼuhiga mo ia totonu. Kaʼe ʼe mole maʼu e te hahaʼi fuli ia te fealagia ʼae ke natou lau ia te Tohi-Tapu pea mo mahino ki te moʼoni ʼaia. Kotea tona tupuʼaga? Heʼe ko te pilivilesio ʼaia ʼe mole foaki ki te hahaʼi fuli. Tou vakaʼi age muʼa peʼe kotea ʼae neʼe ui e Sesu ʼo ʼuhiga mo te faʼahi ʼaia.—Lau ia Mateo 11:25.

ʼE kamata fenei ia te vaega ʼaia: “I te temi aena, nee palalau leva ia Sesu.” Neʼe palalau ia Sesu ki te aluʼaga ʼae neʼe hoki hoko. Neʼe hoki ina fakatonutonuʼi age pe ia te hahaʼi logogataʼa mai te ʼu kolo ʼe tolu ʼo Kalilea ʼae neʼe ina fakahoko ai te ʼu milakulo. (Mateo 11:20-24) ʼE feala ke kotou fai te fehuʼi ʼaeni: “ ʼE feafeaʼi ki he tahi ʼe sio mata ki te ʼu milakulo ʼa Sesu hana mole tui ki ʼana akonaki?” Neʼe mole tui te hahaʼi ʼaia ʼuhi ko tonatou loto talagataʼa.—Mateo 13:10-15.

Neʼe iloʼi e Sesu ke feala hatatou mahino ki te ʼu moʼoni ʼi te Tohi-Tapu, ʼe ʼaoga mai ia te tokoni ʼa te ʼAtua pea mo maʼu he loto ʼe lelei. Neʼe fakamahino fenei e Sesu: “E au fakafetai kia koe, Tamai, Aliki o te lagi mo te kele, koteuhi nee ke fufu te u mea aeni ki te kau poto mo te kau atamai, pea nee ke fakaha natou ki te u toe liliki.” ʼE kotou mahino koa he ko ʼe ʼe ko te pilivilesio ia te maʼu ʼo te ʼu moʼoni fakalaumalie ʼi te Tohi-Tapu? ʼE fakalogo kia Sehova peʼe ko ai ʼae ka ina fakaha ki ai ia te moʼoni heʼe ko ia te “Aliki o te lagi mo te kele.” ʼE feala pe ki te hahaʼi fuli ke natou mahino ki te moʼoni heʼe mole fakapalatahi ia te ʼAtua. ʼE fakatuʼutuʼu feafeaʼi e Sehova ke ina fakaha ia te moʼoni Fakatohi-tapu ki ʼihi kaʼe tuku niʼihi?

ʼE ʼofa ia Sehova ki te tagata agavaivai, kaʼe fehiʼa ia ki te tagata fialahi. (Sakopo 4:6) ʼE ina fufu ia te moʼoni ki “te kau poto mo te kau atamai,” te hahaʼi popoto pea mo te kau maʼu pepa ʼae ʼi tanatou fialahi ʼe mole natou tali ia tana tokoni. (1 Kolinito 1:19-21) Kaʼe ʼe ina fakaha ia te moʼoni ki “te u toe liliki,” te hahaʼi ʼae ʼe fakaovi mai kia te ia ʼaki tonatou loto katoa pea mo te agavaivai ʼae ʼe maʼu e te ʼu toe liliki. (Mateo 18:1-4; 1 Kolinito 1:26-28) Neʼe sio ia Sesu, te ʼAlo ʼo te ʼAtua ki te faʼahiga hahaʼi ʼaia. Tokolahi te kau takitaki lotu fialahi pea mo popoto, neʼe mole natou mahino ki te fakaʼuhiga ʼo te logo ʼae neʼe tala e Sesu, kaʼe neʼe mahino ki ai te ʼu tagata tautai agavaivai. (Mateo 4:18-22; 23:1-5; Gaue 4:13) ʼO toe feia pe mo te ʼu tagata maʼu koloa mo popoto neʼe natou agavaivai moʼoni pea ki muli age neʼe natou liliu ko te ʼu tisipulo ʼa Sesu.—Luka 19:1, 2, 8; Gaue 22:1-3.

Tou toe fai ia te fehuʼi ʼae neʼe tou vakaʼi ʼi te kamata: ʼE kotou fia iloʼi koa ia te moʼoni ʼo ʼuhiga mo te ʼAtua? Kapau ʼe kotou fia iloʼi, ʼe kotou fiafia anai ʼi takotou iloʼi ʼae ʼe mole fakaha pe e te ʼAtua ia te moʼoni ki te kau popoto. Kaʼe, ʼe ina foaki kia natou ʼae ʼe meʼa noaʼi e te kau popoto. Kapau ʼe kotou ako ia te Folafola ʼa te ʼAtua ʼaki he loto pea mo he faʼahiga manatu ʼe lelei, ʼe kotou kau anai kia natou ʼae neʼe foaki ki ai e Sehova ia he meʼa ʼofa maʼuhiga, ia te mahino ki te moʼoni ʼo ʼuhiga mo ia totonu. Ko te mahino ki te moʼoni ʼe feala ke fua lelei ki tokotou maʼuli ʼi te temi nei pea ʼe feala ke ina taki koutou ki “te mauli mooni,” ia te maʼuli heʼegata ʼi te malama foʼou mo faitotonu ʼae neʼe fakapapauʼi mai e te ʼAtua.a—1 Timoteo 6:12, 19; 2 Petelo 3:13.