Te ʼAoga ʼo Te Fakaha ʼo Ni Manatu Kehekehe ʼe Lua

ʼE kotou ʼio anai ki te ui ʼae neʼe ko Sesu te Tagata Faiako lahi tokotahi ʼi te kele. ʼE lagi kotou faiga ke kotou faʼifaʼitakiʼi tana faʼahiga faiako, ohage la ko tana fakaʼaogaʼi te ʼu fehuʼi pea mo te ʼu lea fakata. Kaʼe neʼe kua kotou tokagaʼi koa ʼi tana faiakonaki, tana tau fakaʼaogaʼi ni manatu kehekehe ʼe lua?

Tokolahi te hahaʼi ʼe natou fakaʼaogaʼi ni manatu kehekehe ʼe lua moka natou palalau. ʼE lagi kotou tautau fai pe la mo koutou he ʼu palalau feia kaʼe ʼe mole kotou tokagaʼi. ʼE lagi kotou ui fenei: “Neʼe natou ui mai kua momoho fuli te ʼu siaina, kaʼe ko ʼaeni ʼe kei mumui pe ia.” Peʼe kotou ui fenei: “ ʼI te temi muʼa, neʼe ko te taʼahine ʼe aga ufiufi, kaʼe ʼi te temi nei kua gutu palalau ʼosi.”

Ka kotou fai he ʼu palalau feia, pea ʼe kotou ʼuluaki talanoa ki he manatu peʼe ki he faʼahi, pea kotou oloi leva ki ai he manatu ʼe kehe age ia, ʼo kotou fakaʼaogaʼi te kupu kaʼe peʼe ʼi te tahi age faʼahi. Pea lagi kotou fakamaʼuhigaʼi tonā kehekehe ʼo kotou hilifaki he tahi age manatu. ʼE mole mata faikehe ki ʼihi moka kotou palalau feia pea ʼe lava tokoni kia natou ke natou mahino ki te faʼahi ʼae ʼe kotou palalau ki ai.

Tatau aipe pe mole palalau feia te hahaʼi ʼi ʼihi lea pea mo aga ʼi fenua, kaʼe ʼe lelei ke tou mahino ki tona ʼaoga. Kotea tona tupuʼaga? Koteʼuhi ʼe lahi te fakaʼaogaʼi ʼo te faʼahiga palalau ʼaia ʼi te Folafola ʼa te ʼAtua. Neʼe tau fakaʼaogaʼi e Sesu ʼi ʼana palalau ni manatu kehekehe ʼe lua. Ohage la, neʼe ina ui fenei: “E mole anai tutu he malama ke puloui aki he foi kesi, kaea e hili ia ia ki oluga o te hiliaga malama.” “Nee mole au hau o holoi [ia te Lao], kae o fakahoko.” “Kua kotou logo nee fakaha: Aua naa ke tono. Kae ko au, e au ui atu kia koutou, ko ae e sio ki he fafine . . .” “Nee fakaha: mata ki te mata, nifo ki te nifo. Kae ko au, e au ui atu kia koutou ke aua naa kotou fakatutuu ki te tagata agakovi. Kapau e paaki koe e he tahi i tou kauahe matau, tuku age kia ia te tahi kauahe.”—Mat. 5:15, 17, 27, 28, 38, 39.

ʼI te tahi ʼu tohi ʼo te Tohi-Tapu, ʼe toe maʼu ai te ʼu vaega ʼe fakaʼaogaʼi ai ni manatu kehekehe ʼe lua. ʼE lava tokoni atu ke kotou mahino ki te manatu peʼe fakamaʼuhigaʼi te faʼahi ʼae ʼe tonu ke kotou fai. Kapau ko koe ko he tamai peʼe ko he faʼe, pea ke ke fakakaukauʼi te ʼu manatu kehekehe ʼaeni ʼe lua: “Ko koutou, u tamai, aua naa koutou fakatupu ita ki akotou fanau, kae ke koutou taupau natou o tuku he ako pea mo he lekula [ʼa Sehova].” (Efe. 6:4) Neʼe feala pe ke tohi e te apositolo ko Paulo ʼe tonu ki he tamai (peʼe ko he faʼe) ke ina akoʼi ki tana tamasiʼi te akonaki ʼa te ʼAtua. ʼE ko he tokoni poto anai mo moʼoni. Kaʼe, ʼi tana fakaʼaogaʼi ni manatu kehekehe ʼe lua, ʼo ina ui ke ʼaua naʼa kotou fakatupu ita kia natou, kaʼe ke kotou akoʼi age kia natou te akonaki ʼa Sehova, ʼe tou mahino lelei ai ki te meʼa ʼae ʼe tonu ke tou fai.

ʼI te kapite pe ʼaia, neʼe tohi fenei e Paulo: “Ko tatatou tau e mole ko he tau fakafehagai ki te kakano mo te toto, kae fakafehagai ki . . . te u laumalie agakovi i te u potu fakalagi.” (Efe. 6:12) ʼAki te ʼu manatu kehekehe ʼaia ʼe lua, ʼe feala ke kotou mahino ai ki te maʼuhiga ʼaupito ʼo te tau ʼae ʼe kotou kau ki ai. ʼE mole kotou fehokosi mo ni hahaʼi, kaʼe mo ni laumalie malolohi mo agakovi.

TE ʼAOGA ʼO TE FAKAʼAOGAʼI ʼO NI MANATU KEHEKEHE ʼE LUA

ʼI te tohi pe ʼaia neʼe fai e Paulo ki te kau Efeso, ʼe kotou maʼu ai anai te tahi ʼu vaega ʼe fakaʼaogaʼi ai te ʼu manatu kehekehe ʼe lua. Kapau ʼe kotou fakakaukauʼi te ʼu vaega ʼaia, pea ʼe feala ai anai ke kotou mahino lelei age ki te manatu ʼa Paulo mo te aga ʼae ʼe tonu ke kotou fai.

ʼE lagi kotou sio anai ki te lelei mo tona ʼaoga kia koutou moka kotou vakaʼi te ʼu pakī ʼi te pasina 4 mo te 5. ʼE fakaha ai ni manatu kehekehe ʼe lua ʼe tuʼu ʼi ʼihi vaega ʼo te kapite 4 mo te 5 ʼo Efeso. ʼI takotou lau takitahi te ʼu manatu kehekehe ʼaia ʼe lua, kotou sivisivi tokotou maʼuli. Kotou fai kia koutou te ʼu fehuʼi ʼaeni: “ ʼI tona fakahagatonu, ʼe feafeaʼi taku aga? ʼE feafeaʼi taku aga moka hoko he aluʼaga fenei? Maʼa ʼihi, ʼe ko te aga fea koa ʼae ʼe au maʼu ʼi te ʼu manatu kehekehe ʼaeni ʼe lua?” Kapau ʼe kotou tokagaʼi ʼe ʼi ai he faʼahi ʼe tonu ke kotou fetogi, pea kotou fakahoko. Ke ʼaoga kia koutou te fakaha atu ʼaia ʼo te ʼu manatu kehekehe ʼe lua.

Peʼe feala ke kotou vakaʼi te ʼu pakī ʼaia ʼi takotou ako fakafamili. ʼE feala ke kotou tahi lau muʼa te ʼu manatu fuli, pea ko he tahi leva ʼe ina lau pe te ʼuluaki faʼahi ʼo te ʼu manatu kehekehe ʼaia ʼe lua, pea fakamanamanatu leva e natou ʼae te manatu ʼae ʼe fakamaʼuhigaʼi ʼi te lua faʼahi. ʼE hoko ai anai he faipalalau fakafamili fiafia moʼo iloʼi pe feafeaʼi hakotou maʼuliʼi ia te lua faʼahi. ʼE mahino ia, ko te fakakaukauʼi feia ʼo ni manatu kehekehe ʼe lua, ʼe lava tokoni ki te kau tupulaga ʼo feia mo natou lalahi, ke natou maʼu te aga Fakakilisitiano ʼi te loto fale peʼe ʼi tuʼa atu.

ʼI takotou mahino lelei age ki te maʼuhiga ʼae ke kotou fakaʼaogaʼi ni manatu kehekehe ʼe lua, ʼe faigafua age anai hakotou iloʼi moka ʼe fakaʼaogaʼi ʼi he vaega Fakatohi-tapu, pea ʼe kotou tokagaʼi ai tona ʼaoga lahi atu ʼi takotou minisitelio. Ohage la, ʼe feala ke kotou ui fenei ki he tahi ʼo te ʼapi: “Tokolahi te hahaʼi ʼe natou manatu ʼe tou maʼu he laumalie ʼe maʼuli tuputupua, kaʼe ʼe feala ke ke tokagaʼi pe kotea ʼae ʼe ui ʼi heni ʼi te Folafola ʼa te ʼAtua.” Peʼe kapau ʼe kotou fai he ako Tohi-Tapu, ʼe feala ke kotou fehuʼi fenei age: “Tokolahi te hahaʼi ʼi heni ʼe natou tui ko te ʼAtua mo Sesu ʼe ko he ʼipotasi; kaʼe kotea ʼae ʼe ui mai ʼi te Tohi-Tapu? Pea kotea ʼae ʼe ke tui koe ki ai?”

ʼEi, ʼe lahi te ʼu vaega ʼi te Tohi-Tapu ʼe fakaha ai te ʼu manatu kehekehe ʼe lua ʼe lava ʼaoga kia tatou mo tokoni mai ke tou haʼele ʼi te ala ʼa te ʼAtua. Pea ʼe feala ke tou fakaʼaogaʼi te ʼu manatu kehekehe ʼe lua moʼo tokoni ki te hahaʼi ke natou iloʼi te moʼoni ʼi te Tohi-Tapu.