ʼE Kei Kotou Manatuʼi Koa?
Neʼe kotou lau fakalelei koa te ʼu Tule Leʼo fakamuli? Pea kotou vakaʼi pe feala hakotou tali ki te ʼu fehuʼi ʼaeni:
Ko ʼanafea ʼae neʼe alu ai Sesu “o akonaki ki te u laumalie i te fale pilisoni”? (1 Pet. 3:19)
Neʼe lagi hili he ʼu kiʼi temi ki te fakatuʼuake ʼo Sesu, pea neʼe ina tala ki te kau ʼaselo agakovi te fakatuʼā ʼae ʼe tonu ke fai kia natou.—15/6, pasina 23.
Kotea te ʼu fihifihia ʼe tolu ʼe tonu ke tauʼi ke fua lelei ai takotou toe ʼohoana?
Ko te ʼu fihifihia ʼaeni: takotou fakatatau tokotou ʼuluaki ʼohoana mo tokotou lua ʼohoana; mo te ʼu palalau ʼo ʼokotou kaumeʼa ʼe lotomamahi ai tokotou lua ʼohoana; mo te faigataʼa ʼo takotou toe falala ki he tahi ʼuhi ko te mole nofo agatonu ʼo tokotou ʼuluaki ʼohoana.—Oketopeli–Tesepeli, te ʼu pasina 9-10.
Ko te temi fea ʼae ʼe fakamauʼi ai e Sesu te hahaʼi ʼae ʼe hage ko ni ovi peʼe ko ni tao? (Mat. 25:32)
ʼE fakamauʼi anai e Sesu te hahaʼi moka haʼu anai lolotoga te mamahi lahi, hili te fakaʼauha ʼo te ʼu lotu hala.—15/7, pasina 6.
ʼI te lea fakatata ʼo te fulumeto pea mo te vao kovi, ko ʼafea ʼae ka tagi mo gugu nifo ai anai ia natou ʼae ʼe manuki ki te lao? (Mat. 13:36, 41, 42)
ʼE natou fai anai te faʼahi ʼaia ʼi te lolotoga ʼo te mamahi lahi ʼi te temi ʼae ʼe natou mahino ai leva ʼe mole feala ke natou hao mai te fakaʼauha.—15/7, pasina 13.
Neʼe hoko ʼanafea ia te ʼu palalau ʼa Sesu ʼo ʼuhiga mo te tagata faifekau agatonu mo poto? (Mat. 24:45-47)
Neʼe mole kamata ia ʼi te Penikosite ʼo te taʼu 33 H.T.S., kaʼe neʼe kamata ʼi te hili ʼo te taʼu 1914. ʼI te taʼu 1919, neʼe fakanofo ia te tagata faifekau ki te ʼu kaugana, ʼae ʼe kau ai ia te ʼu Kilisitiano fuli ʼae ʼe fafaga ʼi te faʼahi fakalaumalie.—15/7, te ʼu pasina 21-23.
Ko ʼafea ʼae ka fakanofo anai e Sesu ia te tagata faifekau agatonu ki ʼona koloa fuli?
ʼE hoko anai ia te faʼahi ʼaia lolotoga te mamahi lahi, ʼi te temi ʼae ʼe maʼu anai e te tagata faifekau agatonu ia te fakapale ʼi te lagi.—15/7, pasina 25.
ʼO mole gata pe ki te malohi mai te ʼAtua, kotea ʼae neʼe toe tokoni ki te toko 230 kau Fakamoʼoni ʼo te lotoʼa fakamamahi ʼo Sachsenhausen ke natou hao mai te haʼele fakamataku?
Logo la neʼe natou vaivavai ʼuhi ko te hoge mo te mahaki, kaʼe neʼe natou fefakalotomalohiʼaki tuʼumaʼu pe ke natou haga haʼele.—15/8, pasina 18.
He ko ʼe ʼe ko he fakalotomalohi kia tatou ia te fakamatala ʼo ʼuhiga mo te fakalaka ʼa te kau Iselaele ʼi te Vai Tafe ʼo Solotane ki te Kele ʼo Te Fakapapau?
Logo la te fakalaka maumau ʼo te ʼu vai, kaʼe neʼe lava taʼofi e Sehova te ʼu vai ke feala te fakalaka ai ʼo tana hahaʼi. Neʼe malohi ai tanatou tui pea mo tanatou falala, pea ʼe feala pe ke fakalotomalohiʼi tatou e te fakamatala ʼaia.—15/9, pasina 16.
ʼE hoko feafeaʼi ia ʼaho nei te lea fakapolofeta ʼa Mikea 5:5 ʼo ʼuhiga mo te ʼu tauhi ovi mo te ʼu pule?
ʼE tou mahino ko te ʼu tagata tauhi ovi ʼe toko fitu pea mo te ʼu pule ʼe toko valu ʼae ʼe talanoa ki ai ia Mikea 5:5, ʼe fakaʼuhiga ki te ʼu tagata ʼafeā ʼi te ʼu kokelekasio. ʼE natou fakamalohi te hahaʼi ʼa te ʼAtua ki te ʼohofi ʼae neʼe fakakikite pea ʼe hoko anai ʼi te ka haʼu.—15/11, pasina 20.