Ki Te Kau Lautohi

Ko te nusipepa ʼaeni ʼe kotou lau neʼe kamata ta ʼi te lea fakapilitania ʼi te mahina ʼo Sulio 1879. Neʼe lahi te ʼu fetogi talu mai ai, pea toe feia ki te nusipepa ʼaeni. (Vakaʼi te ʼu pakī ʼi ʼoluga.) ʼO kamata ʼaki te nusipepa ʼaeni, ʼe kotou sisio anai te ʼu fetogi ʼae neʼe fai ʼi Te Tule Leʼo. Kotea te ʼu fetogi ʼaia?

ʼE lahi te ʼu fenua kua hahaʼi age ia natou ʼae ʼe natou leleiʼia tanatou fai he ʼu kumi ʼi te Neti, heʼe faigafua tanatou maʼu ai he ʼu faʼahi ʼe maʼu pe ia ʼi te Neti. ʼE lahi te ʼu tohi, mo te ʼu nusipepa pea mo te ʼu sulunale ʼe feala ke kotou lau ʼi te Neti.

Tupu ko te faʼahi ʼaia, neʼe matou toe fakafoʼou ai tamatou pasina ʼi te Neti www.pr2711.com, ke matalelei pea mo faigafua age te maʼu ʼo te ʼu meʼa ʼe tou fia lau. Ko natou ʼae ʼe natou vakaʼi tamatou tuʼasila ʼaia ʼe feala hanatou lau he ʼu tohi kua fakaliliu ia lea ʼe 430 tupu. Pea ʼe toe feala foki hanatou lau te ʼu alatike ʼae ʼi te agamahani neʼe ta ʼi te ʼu nusipepa, kaʼe ʼo kamata atu ʼi te mahina ʼaeni, ʼe maʼu pe anai ʼi te Neti.a

Mai tona aluʼaga ʼae ʼe lahi age anai te ʼu alatike ʼae ka maʼu ʼi te Neti, ko Te Tule Leʼo ʼae ka tufa, ʼo kamata atu ʼi te nusipepa ʼaeni, ʼe ko ʼona pasina pe ʼe 16, kaʼe mole kei 32. Kua ta Te Tule Leʼo ia lea ʼe 204. ʼE lagi feala anai ke fakaliliu te nusipepa ʼaia ʼi he tahi age ʼu lea heʼe mole kei lahi ʼona pasina.

ʼE matou fakaʼamu, ʼaki te ʼu fetogi ʼaia, ke kaku te logo ʼo te Tohi-Tapu ʼae ʼe ina haofaki te maʼuli ki he toe hahaʼi tokolahi. Neʼe matou fakatotonu ke matou haga foaki te atu manatu maʼuhiga, ʼi te ʼu nusipepa pea mo te Neti, moʼo tokoni ki te kau lautohi ʼae ʼe fakaʼapaʼapa ki te Tohi-Tapu pea mo fia iloʼi pe kotea ʼe akoʼi moʼoni ai.

Te Komite Ta Tohi