Tona Faitoʼo ʼe Ko Te Tauhi Ki Te ʼAtua!

ʼI te temi ʼae neʼe ulu ai te ʼu tehina pionie ʼe tokolua ki te loto fale ʼi Kenya, neʼe nā punamaʼuli ʼi tanā sisio ʼae ki te tagata mutu neʼe takoto ʼi tona palepale. Neʼe veliveli tona fatafata pea mo nounou ʼona nima. ʼI tamā palalau age ki ai ʼo ʼuhiga mo te fakapapau ʼa te ʼAtua, ʼae “ ʼe hopohopo anai te ketu o hage ko he tia,” neʼe malimali te tagata.—Esa. 35:6.

Neʼe iloʼi ai leva e te ʼu pionie, neʼe tupu ake ia Onesmus, ʼae kua taʼu 40 nei ʼape, mo te mahaki ʼo te ʼu hui. Neʼe pelepelegesi ʼona hui. Pea ʼi te mole heʼeki maʼu ʼo he faitoʼo ki tona mahaki, ko te tonu ʼa Onesmus ʼe maʼuli mamahi anai mo feʼaluʼaki ʼi he saliote toho ʼo kaku ki tona mate.

Neʼe tali e Onesmus ke fai hana ako Tohi-Tapu. Kaʼe neʼe mole loto e tana faʼe ke alu ki te ʼu fono Fakakilisitiano, naʼa hoko ki ai he tuʼutamaki pea mo toe lotomamahi ai. Koia, neʼe puke e te ʼu tehina te ʼu fono ke fakalogo e Onesmus ʼi tona ʼapi. Hili ki ai mahina ʼe nima ʼi tana kamata ako, neʼe fakatuʼutuʼu leva e Onesmus ke alu ki te ʼu fono logo la te ʼu tuʼutamaki ʼae neʼe feala ke hoko ki ai.

Neʼe lotomamahi koa ia Onesmus ʼuhi ko tana kau ʼae ki te ʼu fono? Kailoa ia. ʼE ui fenei e Onesmus: “Neʼe hage neʼe siʼisiʼi toku lotomamahi moka au kau ki te ʼu fono.” ʼI tana manatu, kua logo fimalie nei ʼuhi ko te ʼu fakapapau ʼae kua fakaʼamu ki ai. Neʼe fiafia ʼaupito te faʼe ʼa Onesmus ʼi tana tokagaʼi te kua fiafia ʼo tana kiʼi tama, ʼo ina tali ai ke fai hana ako Tohi-Tapu. Koia neʼe ina ui fenei ai: “Te faitoʼo ʼo taku kiʼi tama ʼe ko te tauhi ki te ʼAtua.”

Mole faʼa fualoa ki ai, neʼe liliu leva ia Onesmus ko he kauga fagona. ʼAki te alu ʼo te temi, neʼe papitema pea kua liliu nei ko he tehina faifekau fakaminisitelio. Logo la tana fakaʼaogaʼi pe tona nima ʼe tahi pea mo tana mole haʼele, kaʼe ʼe loto e Onesmus ke ina fai ia meʼa fuli ʼe ina lavaʼi ki te tauhi ʼae kia Sehova. Neʼe fia pionie vaelua ʼi temi, kaʼe neʼe lotolotolua. Kotea tona tupuʼaga? He neʼe iloʼi e Onesmus ʼe maʼua anai ke toho e he tahi tana saliote. ʼI tana fakaha age leva ki ʼona tehina Kilisitiano te faʼahi ʼaia, neʼe natou fakapapauʼi age ʼe natou tokoni anai ki ai. Pea neʼe natou fai ia te faʼahi ʼaia, ʼo feala ai leva kia Onesmus ke liliu ko he pionie vaelua ʼi temi.

Neʼe fakaʼamu ia Onesmus ke liliu ko he pionie katoa, kaʼe neʼe toe lotolotolua. Kaʼe neʼe ina maʼu ia te manatu fakalotomalohi, ʼi tona temi totonu, ʼi te vaega ʼo te ʼaho. Neʼe ko te vaega ʼaeni ʼo Pesalemo 34:8, MN: “Kotou ʼahiʼahi pea mo kotou vakaʼi ko Sehova ʼe lelei.” ʼI tana ʼosi metitasio ki te vaega ʼaia, neʼe fakatuʼutuʼu ai leva e Onesmus ke liliu ko he pionie temi katoa. ʼE faifakamafola ia ʼaho ʼe fa ʼi te vahaʼa, pea ʼe lahi ʼana kau ako Tohi-Tapu ʼe tuputupu ʼi te faʼahi fakalaumalie. ʼI te taʼu 2010, neʼe kau ki te Ako ʼo Te Kau Pionie. Neʼe fiafia ʼaupito ʼi tana sio ʼae ki te tahi ʼi te ʼu tehina ʼe lua ʼae neʼe nā ʼuluaki ʼaʼahi ia ia, neʼe kau ki te ʼu tehina faiako.

Kua mamate te ʼu matuʼā ʼo Onesmus, kaʼe ʼi te ʼaho fuli, ʼe tokakaga te ʼu tehina mo tuagaʼane ʼo te kokelekasio ki te ʼu meʼa ʼae ʼe ʼaoga ki ai. ʼE lotofakafetaʼi ki te ʼu tapuakina fuli ʼae ʼe ina maʼu, pea ʼe fakaʼamu ki te ʼaho ʼae ʼe mole toe ui anai e he tahi “e au mahaki!”—Esa. 33:24.