Manatu Tafitō | Te ʼu Fakamahino ʼo Te Potu Fakalaumalie
Te ʼu Fehuʼi ʼo ʼUhiga Mo Natou ʼe Nonofo ʼi Te Potu Fakalaumalie
Neʼe kua kotou feʼekeʼaki koa pe kotea ia te potu fakalaumalie pea ko ʼai ʼae ʼe maʼuli ai? Kapau koia, ʼe mole ko koutou pe ʼe manatu feia. Lolotoga ni taʼu ʼe lauʼi afe, neʼe fakakaukauʼi e te hahaʼi ia te aluʼaga ʼaia. ʼI te manatu ʼa ʼihi, ʼe nofoʼi te potu fakalaumalie e te ʼu kui ʼae neʼe tonu ke fakaʼapaʼapaʼi. Ko ʼihi ʼe natou manatu, ʼe ko he nofoʼaga taulekaleka mo fimalie ʼe higoa ko selo. Pea ʼe nonofo ai te kau ʼaselo pea mo te hahaʼi agalelei ʼae neʼe mamate. Pea ko ʼihi leva ia, ʼe natou manatu ko te potu fakalaumalie ʼe ko he nofoʼaga maʼa he lauʼi teau miliona ʼu ʼatua.
Pea ko te tokolahi ʼe natou ui, ʼe mole feala ke tou iloʼi he meʼa ʼo ʼuhiga mo te potu fakalaumalie. Kotea tona tupuʼaga? Koteʼuhi ʼe mole he tahi ia tatou kua sio mata ke feala ai hatatou talanoa ki te faʼahi ʼaia. Kaʼe ʼe hala ia te manatu ʼaia. Neʼe maʼuli moʼoni ia Sesu Kilisito ʼi selo, ʼi te potu fakalaumalie, ʼi muʼa ʼo tana hifo mai ki te kele. Neʼe ina ui fakahagatonu fenei ki te kau takitaki lotu ʼo te ʼuluaki sekulo: “Nee mole au hifo mai te lagi o fai toku finegalo, kae te finegalo o ae nee ina fekaui mai au.” Koia, neʼe fakaha totonu ai e Sesu te aluʼaga ʼaia ʼi tana ui fenei ki ʼana apositolo: “E lahi te u nofoaga i te fale o taku Tamai.”—Soane 6:38; 14:2.
ʼE mahino ia, ko te Tamai ʼa Sesu ʼe ko te ʼAtua ʼae ʼe higoa ko Sehova. Pea ko te “fale” ʼo Sehova ʼe tuʼu ʼi te atu lagi. (Pesalemo 83:19) Koia, ʼe mole feala ki he tahi ia tatou ke tou fakamatala te malama fakapulipuli ʼaia. Kaʼe, ʼe fealagia e Sehova ʼAtua pea mo Sesu Kilisito ia te faʼahi ʼaia koteʼuhi ʼe nā iloʼi lelei age naua. Neʼe nā fakaha ni manatu ʼo ʼuhiga mo te potu fakalaumalie ʼaki ni meʼa neʼe ha ki te ʼu hahaʼi agatonu.
ʼI te alatike ka hoa mai, ʼe talanoa ki te ʼu koga tohi ʼo te Tohi-tapu ʼe fakaha ai pe kotea te ʼu meʼa neʼe ha ki te tagata. ʼI takotou vakaʼi te ʼu meʼa ʼaia, kotou manatuʼi ko te potu fakalaumalie ʼe mole feala ke tou maʼu ai ni meʼa ke tou fafa mo sio mata ki ai. Neʼe mole fakamahino mai e te ʼAtua ʼaki ni kupu fakalaumalie koteʼuhi ʼe feala anai ke faigataʼa tatatou mahino ki ai. Kaʼe, neʼe ina fai ni meʼa ke ha ki te tagata ke tou iloʼi ai pe ʼe feafeaʼi te potu fakalaumalie. Koia neʼe fakaʼaogaʼi ai e te ʼAtua ni kupu ʼe feala ke tou mahino gafua ki ai. ʼE tokoni atu anai te ʼu meʼa ʼae neʼe ha ki te tagata ke kotou iloʼi ai ia natou ʼae ʼe nonofo ʼi te potu fakalaumalie, ʼae “e lahi [ai] te u nofoaga.”