Ke Mole Fakamavae Koe e He Meʼa Pe Mai Ia Sehova

1. He koʼe ʼe tou iloʼi ʼe fia fakaovi mai ia Sehova kia tatou?

ʼE FAKAAFE tatou e Sehova ke tou fakaovi age kia te ia. (Sakp. 4:8) ʼE fia liliu ko totatou ʼAtua, mo tatatou Tamai pea mo totatou Kaumeʼa. ʼE tali ki ʼatatou faikole pea mo tokoni mai ʼi te ʼu temi faigataʼa. ʼE ina toe akoʼi mo puipui tatou ʼaki tana kautahi. Kae kotea ʼae ʼe tonu ke tou fai ke tou fakaovi ai kia Sehova?

2. ʼE feafeaʼi hatatou fakaovi kia Sehova?

² ʼE tou fakaovi kia Sehova moka tou faikole, mo lau pea mo metitasio ki tana Folafola. ʼI tatatou fai feia, ʼe lahi ai totatou ʼofa mo lotofakafetaʼi kia te ia. ʼE tou fia fakalogo ai pea mo foaki kia te ia te fakavikiviki ʼae ʼe tuha mo ia. (Apk. 4:11) Ka lahi tatatou ako ke tou iloʼi ia Sehova, ʼe lahi ai tatatou falala kia te ia pea mo tana kautahi ʼae neʼe ina fakatuʼu ke tokoni mai.

3. ʼE faigaʼi feafeaʼi e te Tevolo ke tou mavae mai ia Sehova? Kotea ʼae ʼe tokoni mai ke mole tou lituʼa ki totatou ʼAtua mo tana kautahi? (Pesalemo 31:14, 15)

³ Kae ʼe faigaʼi e te Tevolo ke tou mavae mai ia Sehova, tafito moka tou tau mo ni faigataʼaʼia. Kotea ʼae ʼe ina fai? ʼE ina faigaʼi ke puli mamalie tatatou falala kia Sehova mo tana kautahi. Kae ʼe tou lava tauʼi ʼana faiga ʼaia. Ka malohi tatatou tui mo falala kia Sehova, ʼe mole tou lituʼa anai ki totatou ʼAtua mo tana kautahi.—Lau ia Pesalemo 31:14, 15.

4. Kotea ka tou palalau ki ai ʼi te alatike ʼaeni?

⁴ ʼI te alatike ʼaeni ʼe tou palalau anai kia fihifihia ʼe tolu mai tuʼa atu ʼo te kokelekasio. ʼE feala ke puli tatatou falala kia Sehova mo tana kautahi ʼuhi ko te ʼu fihifihia ʼaia. ʼE lava fakamavae feafeaʼi tatou e te ʼu fihifihia ʼaia mai ia Sehova? Pea kotea ʼae ʼe tonu ke tou fai ke tou fakafeagai ki te ʼu faiga ʼa Satana?

MOKA TOU TAU MO NI FAIGATAʼAʼIA

5. ʼE lava puli feafeaʼi tatatou falala kia Sehova mo tana kautahi ʼuhi ko ni faigataʼaʼia ʼe tou tau mo ia?

⁵ ʼE faigataʼa moka fakafeagai mai totatou famili peʼe moka mole kei ʼi ai hatatou gaue. ʼE lava puli feafeaʼi tatatou falala ki te kautahi ʼa Sehova ʼuhi ko te ʼu faigataʼaʼia ʼaia, ʼo tou mavae ai mai ia Sehova? Ka tou tau fualoa mo he ʼu fihifihia, ʼe feala ai ke tou lotovaivai pea puli ai mo tatatou falala. ʼE fakaʼaogaʼi e Satana te ʼu temi ʼaia ke tou lotolotolua ki te ʼofa ʼo Sehova. ʼE loto e te Tevolo ke tou manatu ʼe tupu ʼotatou mamahi ʼuhi ko Sehova mo tana kautahi. ʼE tatau ʼosi mo te meʼa ʼae neʼe hoko ki ʼihi Iselaele ʼi Esipito. ʼI te kamata, neʼe natou tui neʼe fakaʼaogaʼi e Sehova ia Moisese mo Alone ke nā fakaʼateainaʼi natou mai tonatou maʼuli popula. (Eke. 4:29-31) Kae ki muli age, ʼi te kinakina leva ʼo tonatou maʼuli ʼuhi ko Falaone, neʼe natou tukugakoviʼi ia Moisese mo Alone. Neʼe natou ui age kia naua: “Kua fehiʼaʼinaʼi ia matou e Falaone mo ʼana hahaʼi faifekau ʼuhi ko koulua. Neʼe kolua fai he meʼa ke tupu ai tanatou fia matehi matou.” (Eke. 5:19-21) Neʼe natou tukugakoviʼi te ʼu kaugana ʼa te ʼAtua. ʼI aluʼaga fakalotomamahi leva! Ka kua fualoa tau tauʼi ni faigataʼaʼia, ʼe feafeaʼi hau taupau tau falala kia Sehova mo tana kautahi?

6. Kotea te ako ʼe tou maʼu mai ia Hapakuke ke tou lava katakiʼi ʼotatou fihifihia? (Hapakuke 3:17-19)

⁶ Fakaha te ʼu meʼa fuli ʼae ʼi tou loto kia Sehova pea ke kole tana tokoni. Neʼe lahi te ʼu faigataʼaʼia neʼe tau mo te polofeta ko Hapakuke. ʼI te tahi temi, neʼe hage neʼe mole kei tui ʼe tokaga ia Sehova kia ia. Koia, neʼe ina fakaha ai kia Sehova te ʼu meʼa fuli ʼae neʼe ʼi tona loto. Neʼe ina ui fenei: “ ʼE kaku anai ki ʼafea, oi Sehova, taku tagi atu kae mole ke fakalogo mai? . . . Pea he koʼe ʼe ke tuku ke hoko atu te agakovi?” (Hap. 1:2, 3, NWT) Neʼe tali ia Sehova ki te faikole fakamalotoloto ʼa tana kaugana agatonu. (Hap. 2:2, 3) ʼI te ʼosi metitasio ʼa Hapakuke ki te ʼu temi ʼae neʼe haofaki ai e Sehova tana hahaʼi, neʼe ina toe maʼu ai te fiafia. Neʼe tui papau ʼe tokaga Sehova kia ia, pea mo tokoni ki ai ke ina lava tauʼi te ʼu fihifihia fuli. (Lau ia Hapakuke 3:17-19.) Kotea te ako? Ka tou tau mo he ʼu faigataʼaʼia, tou faikole kia Sehova ʼo fakaha age te ʼu meʼa fuli ʼi ʼotatou loto pea mo kole ki ai tana tokoni. Ka ke fai feia, ʼe foaki atu anai e Sehova te malohi ke ke faʼa kataki. Pea ka ke logoʼi ʼe tokoni atu, ʼe toe malohi ai tau tui.

7. Kotea ʼae neʼe faigaʼi e te kaiga ʼo Shirley ke ina fai, pea kotea ʼae neʼe tokoni kia Shirley ke haga tui kia Sehova?

⁷ Taupau maʼu tau agamahani fakalaumalie. Ko te faʼahi ʼaia neʼe fai e te tuagaʼane ko Shirley, mai Papua Niu Kini, ʼi tana tau mo ni fihifihia.b Neʼe masiva te famili ʼo Shirley, pea neʼe faigataʼa tanatou maʼu hanatou meʼa kai. Neʼe faigaʼi e tona kaiga ke puli te falala ʼa Shirley kia Sehova. Neʼe ina ui age: “ ʼE ke ui ʼe tokoni atu te laumalie maʼoniʼoni ʼo te ʼAtua, pea kofea te tokoni ʼaia? Kei masiva pe te famili! ʼE puli tou temi ʼi te faifakamafola!” ʼE ui fenei e Shirley: “Neʼe au kamata feʼekeʼaki pe ʼe tokoni moʼoni mai koa ia Sehova kia matou. Neʼe au faikole atu aipe kia Sehova, ʼo fakaha kia te ia te ʼu meʼa fuli ʼi toku loto. Neʼe hoko atu taku lau te Tohi-Tapu, mo ʼatatou tohi, pea mo au kau tuʼumaʼu ki te faifakamafola mo te ʼu fono.” Neʼe mahino atu aipe kia ia ʼe tokaga Sehova ki tona kiʼi famili. Neʼe mole he temi neʼe natou halofia ai, pea neʼe natou fiafia. ʼE hoko atu fenei e Shirley: “Neʼe au sio neʼe tali mai ia Sehova ki taku faikole.” (1 Tim. 6:6-8) Ka ke taupau maʼu tau agamahani fakalaumalie, ʼe mole ke mavae anai mai ia Sehova ʼuhi ko te ʼu faigataʼaʼia peʼe ko te lotolotolua.

MOKA FAKATAGAʼI ʼOTATOU TEHINA TAKITAKI

8. Kotea ʼae ʼe feala ke hoko ki te ʼu tehina takitaki ʼo te kautahi ʼa Sehova?

⁸ ʼI te ʼu tala logo mo te ʼu fakatahiʼaga ʼi te Neti, ʼe folahi ai ʼe ʼotatou fili ni loi ʼo ʼuhiga mo ʼotatou tehina takitaki ʼo te kautahi ʼa Sehova. (Pes. 31:14) Neʼe puke ʼihi tehina mo tukugakoviʼi takua ʼe ko ni kau faifakapo. Neʼe tau te ʼu ʼuluaki Kilisitiano mo te aluʼaga feia. ʼEi, neʼe tukugakoviʼi hala pea mo puke ia te apositolo ko Paulo. Kotea ʼae neʼe natou fai?

9. Kotea ʼae neʼe fai e ʼihi Kilisitiano ʼi te pilisoniʼi ʼo Paulo?

⁹ ʼI te pilisoniʼi ʼo Paulo ʼi Loma, ko ʼihi Kilisitiano neʼe mole kei natou fia tokoni ki ai. (2 Tim. 1:8, 15) Kotea tona tupuʼaga? Neʼe natou ufiufi koa ia Paulo, ʼuhi he neʼe tukugakoviʼi takua ko he tagata faifakapo? (2 Tim. 2:8, 9) Pe neʼe natou matataku naʼa toe fakatagaʼi mo natou? Kotea pe hona tupuʼaga, kae kotou fakakaukauʼi age muʼa pe neʼe feafeaʼi te loto ʼo Paulo. Neʼe ina katakiʼi te ʼu tuʼuga faigataʼaʼia moʼo tokoni kia natou, pea neʼe feala pe ke mate ai! (Gaue 20:18-21; 2 Ko. 1:8) ʼOfa pe ke mole tou hage ko natou ʼaia neʼe mole fia tokoni kia Paulo. Kotea ʼae ʼe tonu ke tou manatuʼi moka fakatagaʼi te ʼu tehina takitaki?

10. Kotea ʼae ʼe tonu ke tou manatuʼi moka fakatagaʼi te ʼu tehina takitaki?

¹⁰ Tou manatuʼi pe ko ai ʼae ʼe ina fakatagaʼi tatou pea mo tona tupuʼaga. ʼE ui ia 2 Timoteo 3:12: “Ko natou fuli ʼae ʼe fia pipiki ki te ʼAtua ʼi ʼonatou maʼuli, ʼi tonatou ʼuhiga tisipulo ʼa Kilisito Sesu, ʼe toe fakatagaʼi anai mo natou.” Koia ʼe mole tonu ke tou punamaʼuli ki te fakatagaʼi tafito e Satana te ʼu tehina takitaki. Ko tona loto ke mole natou nonofo agatonu kia Sehova pea ke tupu ai hatatou matataku.—1 Pet. 5:8.

11. Kotea te ako ʼe tou maʼu mai ia Onesifolo? (2 Timoteo 1:16-18)

¹¹ Tou tokoni ki ʼotatou tehina pea mo lagolago kia natou. (Lau ia 2 Timoteo 1:16-18.) Neʼe mole tatau te aga ʼa Onesifolo mo ʼae ʼa ʼihi ʼuluaki Kilisitiano ʼi te temi ʼae neʼe pilisoniʼi ai Paulo. ʼEi, ‘neʼe mole ufiufi ʼuhi ko te pilisoni ʼo Paulo.’ Kae neʼe kumi e Onesifolo ia Paulo pea ʼi tana maʼu, neʼe ina fai ia meʼa fuli moʼo tokoni ki ai. ʼI tana fai ʼaia, neʼe feala pe ke matehi ia ia. Kotea te ako kia tatou? ʼE mole tou matataku anai ki te tagata, peʼe tou tuku ki te mataku ke ina taʼofi tatatou tokoni ki ʼotatou tehina ʼae ʼe fakatagaʼi. Kae ʼe tou fai anai ia meʼa fuli ʼe tou lavaʼi moʼo tokoni kia natou. (Taag. 17:17) ʼE ʼaoga kia natou totatou ʼofa mo tatatou tokoni.

12. Kotea te ako ʼe tou maʼu mai ʼotatou tehina mo tuagaʼane ʼo Lusia?

¹² Tokagaʼi pe ʼe tokoni feafeaʼi te ʼu tehina mo tuagaʼane ʼo Lusia ki ʼonatou tehina mo tuagaʼane ʼae ʼe pilisoni. Ka fakamauʼi ʼihi ia natou ʼi te telepinale, ʼe kaugamalie te ʼu tehina mo tuagaʼane ʼe ʼomai ʼo lagolago kia natou. Kotea te ako kia tatou? Ka laukoviʼi, peʼe puke, peʼe fakatagaʼi te ʼu tehina takitaki, ʼaua naʼa tou matataku. Kae tou hufaki natou, peʼe tou tokaga ki ʼonatou famili, peʼe tokoni kia natou ʼi he faʼahiga aluʼaga pe.—Gaue 12:5; 2 Ko. 1:10, 11.

MOKA MANUKIʼI TATOU

13. ʼE lava pulihi feafeaʼi tatatou falala kia Sehova mo tana kautahi moka manukiʼi tatou?

¹³ ʼE feala pe ke vaʼi tatou e totatou famili, peʼe ko he ʼu kauga gaue peʼe kauga ako ʼe mole natou lotu tahi mo tatou. ʼE lagi natou vaʼi tatatou faifakamafola peʼe ko tatatou faiga ʼo mulimuli ki te ʼu lao ʼo Sehova ʼi totatou maʼuli. (1 Pet. 4:4) ʼE lagi natou ui atu: “ ʼE au ʼofa ia koe kae ʼe mamafa fau tau lotu pea ʼe mole kei alu tahi mo totatou temi.” ʼE feala ki ʼihi ke natou fatufatuʼi tatou ʼuhi ko tatatou aga kia natou ʼae kua fakamavae ʼi te kokelekasio. ʼE natou ui atu: “Pea ʼe kotou ui leva ʼe kotou ʼofa!” ʼE feala pe ʼaki te ʼu taʼi palalau ʼaia ke tou lotolotolua ai, ʼo lagi tou feuiʼaki: “ ʼE lahi fau koa te ʼu meʼa ʼae ʼe kole mai e Sehova? ʼE mamafa fau koa te ʼu meʼa ʼae ʼe ui mai e tana kautahi?” Ka ke kamata manatu feia, ʼe feafeaʼi hau haga pipiki kia Sehova pea mo tana kautahi?

14. Kotea ʼe tou fai moka manukiʼi tatou heʼe tou fakalogo ki te ʼu lao ʼa Sehova? (Pesalemo 119:50-52)

¹⁴ Lotomalohi ʼo fakalogo ki te ʼu lao ʼa Sehova. Neʼe fakalogo ia Sopo ki te ʼu lao ʼa Sehova tatau aipe pe neʼe vaʼi ia ia. Neʼe faigaʼi e he tahi ʼi te ʼu kaumeʼa loi ʼo Sopo ke tui ʼe mole maʼuhiga pe la kia Sehova tana fakalogo ki ʼAna lao faitotonu. (Sopo 4:17, 18; 22:3) Kae neʼe mole tui ia Sopo ki te ʼu loi ʼaia. Neʼe ina iloʼi papau ko te ʼu lao ʼa Sehova ʼo ʼuhiga mo te meʼa ʼae ʼe lelei mo ʼae ʼe kovi ʼe totonu pe ia. Pea neʼe lotomalohi ʼo mulimuli ki ai. Neʼe nofo agatonu ia Sopo kia Sehova logo la tona manukiʼi e ʼihi. (Sopo 27:5, 6) Kotea te ako kia tatou? ʼAua naʼa ke lotolotolua moka vaʼi koe ʼuhi he ʼe ke mulimuli ki te ʼu lao ʼa Sehova. Fakakaukau ki ni aluʼaga kua hoko ʼi tou maʼuli. Mole ke tui ai koa la ʼe moʼoni pe te ʼu lao ʼa Sehova pea ʼe fua lelei ki tou maʼuli? Lotomalohi ʼo lagolago ki te kautahi ʼae ʼe mulimuli ki te ʼu lao ʼa Sehova. ʼE mole ke mavae anai mai ia Sehova moka manukiʼi koe.—Lau ia Pesalemo 119:50-52.

15. He koʼe neʼe manukiʼi ia Brizit?

¹⁵ Tou vakaʼi te meʼa ʼae neʼe hoko ki te tuagaʼane ko Brizit mai Initia. Neʼe manukiʼi e tona famili ʼuhi ko tana tui. Neʼe papitema ʼi te 1997. Kae mole fualoa ki ai, ko tona ʼohoana ʼae ʼe mole ko he Fakamoʼoni, neʼe mole kei ʼi ai hana gaue. Neʼe fai leva e tona ʼohoana te tonu ʼae ke nā olo taumatuʼa mo ʼanā kiʼi taʼahine ʼo nonofo ʼi ʼana matuʼa ʼae ʼe maʼuʼuli ʼi he tahi kolo. Kae neʼe toe tau ia Brizit mo te tahi ʼu faigataʼaʼia. Neʼe mole maʼu e tona ʼohoana hana gaue, koia neʼe maʼua ai ke gaue ia Brizit ʼaho katoa moʼo taupau tonā famili. Tahi ʼae neʼe tuʼu mamaʼo te kokelekasio ʼae neʼe kau ai. Pea neʼe fakafeagai te famili ʼo tona ʼohoana kia ia ʼuhi ko tana tui. ʼI te ʼasili ʼo te fakafeagai, neʼe mavae te kiʼi famili ʼo Brizit ki he tahi koga meʼa. Pea neʼe mate fakapunamaʼuli leva tona ʼohoana. Ki muli age neʼe mate tana tahi kiʼi taʼahine neʼe taʼu 12 ʼi te kosea. Kae neʼe mole gata ai, he neʼe ui e te famili ʼo Brizit ka na neʼe mole liliu la ko he Fakamoʼoni ʼa Sehova, ka na ʼaua la ʼe mole hoko te ʼu mamahi ʼaia. Kae neʼe haga falala aipe ia Brizit mo nofo agatonu kia Sehova pea mo tana kautahi.

16. Kotea te ʼu tapuakina neʼe maʼu e Brizit ʼuhi ko tana nofo agatonu kia Sehova mo tana kautahi?

¹⁶ ʼUhi ʼae neʼe nofo mamaʼo ia Brizit mai tana kokelekasio, neʼe fakalotomalohiʼi ia ia e te tehina taupau ke faifakamafola pe ʼi te koga meʼa ʼae ʼe nofo ai pea ke ina fai te ʼu fono ʼi tona loto fale. ʼI te kamata, neʼe manatu ia Brizit ʼe faigataʼa fau kia ia. Kae neʼe mulimuli pe ki te ʼu tokoni ʼae neʼe fai age e te tehina. Neʼe faifakamafola ki te hahaʼi pea mo ina fai te ʼu fono iō ia. Neʼe ina toe fai foki mo te ako fakafamili mo ʼana taʼahine. Kotea ʼona fua? Neʼe kamata e Brizit ni ako Tohi-Tapu pea ko ʼihi neʼe papitema leva. Neʼe pionie katoa ʼi te 2005. Neʼe tapuakinaʼi tana falala ʼae kia Sehova mo tana nofo agatonu ki tana kautahi. ʼE tauhi agatonu ʼana taʼahine kia Sehova pea kua tuʼu nei kokelekasio ʼe lua ʼi te potu ʼae ʼe nofo ai. ʼE tui papau ia Brizit neʼe foaki age e Sehova te malohi moʼo tauʼi ʼona fihifihia pea ke ina lava katakiʼi te ʼu manuki ʼo tona famili.

TOU NONOFO AGATONU KIA SEHOVA MO TANA KAUTAHI

17. Kotea ʼae ʼe tou fakatotonu ke tou fai?

¹⁷ ʼE loto e Satana ke tou tui ʼe liʼaki tatou e Sehova moka tou tau mo ni fihifihia. Pea ʼe ina loto ke tou tui ʼe faigataʼa age totatou maʼuli moka tou nofo agatonu ki tana kautahi. ʼE toe loto foki e Satana ke tou matataku moka laukoviʼi, fakatagaʼi, peʼe pilisoniʼi ʼotatou tehina takitaki. Pea ʼe ina fakaʼaogaʼi te ʼu manuki ke mole tou fakalogo ai ki te ʼu lao ʼa Sehova pea ke mole kei tou falala ki Tana kautahi. Kae ʼi tatatou iloʼi lelei tana ʼu puleʼaki kovi, ʼe mole kakaʼi ai tatou. (2 Ko. 2:11) Tou fakatotonu ke mole tou tui ki te ʼu loi ʼa Satana kae ke tou agatonu kia Sehova mo tana kautahi. Tou manatuʼi ʼe mole liʼaki anai tatou e Sehova. (Pes. 28:7) Koia, ʼaua naʼa tou tuku he meʼa pe ke ina fakamavae tatou mai ia te ia.—Loma 8:35-39.

18. Kotea ka tou palalau ki ai ʼi te alatike ka hoa mai?

¹⁸ ʼI te alatike ʼaeni neʼe tou vakaʼi he ʼu faigataʼaʼia mai tuʼa atu ʼo te kokelekasio. Kae ʼe toe feala ke ʼahiʼahiʼi tatatou falala kia Sehova pea mo tana kautahi ʼuhi ko he ʼu faigataʼaʼia ʼi te loto kokelekasio. ʼE tou lava tauʼi feafeaʼi te ʼu faigataʼaʼia ʼaia? ʼE tou palalau anai ki ai ʼi te alatike ka hoa mai.