Neʼe Tokoni Mai Ia Sehova Ke Mā Fiafia ʼi He Fahaʼi Pe ʼe Mā Olo Ki Ai

Neʼe kau te taumatuʼa Kassholm ki te Ako ʼo Kileate ʼi te 1979, pea ʼaki te temi neʼe hinoʼi naua ke nā gaue ʼi Iran, mo Maurice, mo Birmanie, mo Tanzanie, mo Ouganda pea mo Zaïre. ʼI tamā ʼi Kileate neʼe mā fagono ai ki he akonaki ʼa te tehina ko Jack Redford. Neʼe ina foaki ai he ʼu tokoni neʼe ʼaoga mai moka hinoʼi maua ki he tahi fenua, pea neʼe tuʼa lahi te hoko kia maua te fahaʼi ʼaia. Tuku ke nā fakamatala mai.

Mats, fakamatala mai pe neʼe ke iloʼi feafeaʼi te moʼoni.

Mats: Neʼe maʼuli taku tamai ʼi Polonia lolotoga te Lua Tau Fakamalamanei. Pea neʼe sio ki te tokolahi ʼo te kau takitaki lotu Katolika neʼe malualoi. Kae neʼe ina tau fai te ʼu palalau ʼaeni: “ ʼE au iloʼi ʼe ʼi ai te lotu moʼoni!” ʼAki te temi, neʼe feala ke au fakamoʼoni ki ʼana palalau. Neʼe lahi te ʼu tohi neʼe kua fakaʼaogaʼi neʼe au totogi. Neʼe kau ʼi te ʼu tohi ʼaia te tohi ʼuʼui ʼaeni La vérité qui conduit à la vie éternelle. Neʼe au leleiʼia ʼosi te kupu tafito ʼo te tohi ʼaia, pea neʼe au lau fuli ʼi te po pe ʼae neʼe au maʼu ai. ʼI te ala uhu ake neʼe au iloʼi kua au maʼu ia te moʼoni.

ʼI Apelili 1972, neʼe lahi te ʼu tohi ʼa te kau Fakamoʼoni ʼa Sehova neʼe au lau, pea neʼe au maʼu ʼaku tali ki ʼaku fehuʼi ʼo ʼuhiga mo te Tohi-Tapu. Neʼe au hage ko te tagata fakatau koloa ʼo te lea fakata ʼa Sesu. Neʼe ina maʼu he mataʼi tofe maʼuhiga ʼaupito, hili ia neʼe alu atu aipe ʼo fakatau ia meʼa fuli ʼe ina maʼu ke ina totogi te mataʼi tofe ʼaia. Neʼe au liʼaki taku fakatuʼutuʼu ʼae ke au hoko atu taku ako ʼi he fale ako maʼoluga ke au liliu ko he toketa. Neʼe hage pe neʼe au “fakatau” taku fakatuʼutuʼu ʼaia. Koia, neʼe au fakahoko te fahaʼi ʼaia ke au totogi te “mataʼi tofe,” ʼae ko te moʼoni neʼe au maʼu. (Mat. 13:​45, 46) Neʼe au papitema leva ʼi te ʼaho 10 ʼo Tesepeli 1972.

Neʼe heʼeki taʼu katoa pe la, neʼe toe tali e ʼaku matuʼā pea mo toku kiʼi tehina te moʼoni, pea neʼe natou papitema. ʼI Sulio 1973, neʼe au pionie katoa leva. Neʼe ʼi ai ʼi tamatou kokelekasio ia he kau pionie faʼafai. Pea neʼe kau ai ia he tuagaʼane finemui pea neʼe ʼofa mamahi ia Sehova ʼe higoa ko Ann-Catrin. Neʼe mā femanakoʼaki leva pea mo ʼohoana ʼi te 1975. Pea neʼe mā maʼuʼuli taʼu ʼe fa ʼi te kolo ko Strömsund, ko he koga meʼa matalelei ʼi Suède. Pea tokolahi ʼi ai neʼe natou fia iloʼi ia te Tohi-Tapu.

Ann-Catrin: Neʼe iloʼi e taku tamai te moʼoni kae neʼe kei ako ʼi te univelesite ʼi Stockholm. Neʼe kei au mahina tolu pe ʼi te temi ʼaia, kae neʼe ina ʼave au ki te ʼu fono mo te faifakamafola. Neʼe mole leleiʼia e taku faʼe te fahaʼi ʼaia pea neʼe faiga ke ina fakaha ʼe mole moʼoni te ʼu meʼa ʼae ʼe ui e te kau Fakamoʼoni ʼa Sehova. Kae neʼe mole lava ʼana faiga ʼaia. ʼAki te temi, neʼe toe papitema mo ia. ʼI toku taʼu 13, neʼe au papitema leva. Pea ʼi toku taʼu 16, neʼe au pionie leva. Hili taku gaue faifakamafola ʼi Umeå, ʼae neʼe ʼaoga lahi ki ai he kau faifakamafola, neʼe au liliu leva ko he pionie makehe.

Hili tamā ʼohoana mo Mats, neʼe mā fiafia ʼi te tokoni ki te tokolahi ke natou iloʼi te moʼoni. Neʼe kau ia natou ʼaia ia Maivor, ʼae ko he finemui neʼe ina tuku te faigaoʼi kae gaue lahi maʼa Sehova. Pea neʼe pionie fakatahi mo tona kiʼi tehina veliveli. Pea neʼe nā kau ki te Ako ʼo Kileate ʼi te 1984 pea ʼe nā misionea nei ʼi Équateur.

ʼI te ʼu koga meʼa kehekehe ʼae neʼe kolua misionea ai, kotea ʼae neʼe tokoni atu ke kolua fiafia pe ʼi he fahaʼi pe ʼe kolua gaue ai?

Mats: Neʼe kole tuʼumaʼu mai pe ke mā olo ʼo gaue ʼi he tahi ʼu fenua. Kae ko te meʼa ʼae neʼe tokoni mai ke mā fakamamahani mo te ʼu fetogi ʼaia, ʼe ko tamā faiga tuʼumaʼu ke mā faʼifaʼitakiʼi ia Sesu, tafito ia tana agavaivai. (Kol. 2:​6, 7) Ohage la, neʼe mā faiga ke mā mahino pe koʼe ʼe feia te faʼahiga gaue ʼa te ʼu tehina mo tuagaʼane ʼo te fenua. Kae neʼe mole faiga maua ke mulimuli natou ki tamaua faʼahiga fai ʼo te gaue. Neʼe mā fia mahino ki tanatou faʼahiga manatu pea mo agaʼi fenua. Neʼe mā fia faʼifaʼitakiʼi ia Sesu, pea neʼe faigafua ai kia maua tamā taupau tuʼumaʼu pe tomā fiafia ʼi he fahaʼi pe ʼe mā gaue ai. Neʼe mā hage pe “ko he fuʼu ʼakau ʼe to ovi ki he ʼu tafega vai” he neʼe mā fiafia tuʼumaʼu pe.​—Pes. 1:​2, 3.

Ann-Catrin: Kapau ʼe tou loto ke liliu ʼo lahi he fuʼu ʼakau neʼe toe to, neʼe toe ʼaoga ki ai te laʼa. Neʼe liliu tuʼumaʼu ia Sehova ko “he laʼa” maʼa maua. (Pes. 84:11) Neʼe ina foaki mai homā ʼu tehina mo tuagaʼane lotoʼofa. Ohage la, ʼi tamatou kiʼi kokelekasio ʼae ʼi Téhéran, ʼi Iran, neʼe tali kaiga mo lotofoaki te ʼu tehina mo tuagaʼane, ohage pe ko te fai ʼi te temi muʼa. Neʼe mā ʼamusia age ke mā nonofo ʼosi ʼi Iran. Kae ʼi Sulio 1980, neʼe tapuʼi e te puleʼaga tamatou gaue ʼi te fenua ʼaia pea neʼe fakaha mai ʼe tonu ke mā mavae ʼi te fenua. Neʼe tuku mai pe kia maua ia hola ʼe 48 ke mā mavae. Neʼe toe hinoʼi maua ki Zaïre (ʼi te temi nei ʼe higoa ko Congo) ʼi Afelika.

ʼI te fakaha mai ʼae ʼe toe hinoʼi maua ki Afelika, neʼe au tagi. Neʼe au mataku ʼosi ʼi taku logo ʼae ʼe ʼi ai te ʼu gata pea mole ma lau te ʼu mahaki ʼi Afelika. Kae neʼe ʼi ai tomā ʼu kaumeʼa lelei ʼe toko lua neʼe kua fualoa tanā gaue ʼi ai. Neʼe nā ui fenei mai: “Tuku takolua tuʼania, heʼeki kolua ʼomai ki Afelika! ʼE kolua leleiʼia anai te fenua.” Pea ko te aluʼaga ʼaia neʼe hoko. Neʼe lotoʼofa mo agalelei te ʼu tehina mo tuagaʼane. Hili ki ai taʼu ʼe ono, neʼe tonu leva ke mā mavae ʼi Zaïre, ʼuhi ko te tapuʼi ʼo tatatou gaue. Neʼe au kata he neʼe au manatuʼi ʼi te kamata neʼe mole koia ʼaia. Pea ʼi te lakaga nei, kua au faikole leva kia Sehova ke mā nonofo ʼi Afelika.

Kotea te ʼu tapuakina neʼe kolua maʼu ʼi te ʼu taʼu ʼaia?

Mats: Neʼe mā maʼu homā ʼu kaumeʼa lelei neʼe ko he ʼu misionea mai he ʼu fenua mo haʼuʼaga kehekehe. Pea tahi, ʼi ʼihi fenua neʼe hinoʼi maua ki ai, neʼe makehe ʼosi te fiafia neʼe mā logoʼi he neʼe lahi te ʼu ako Tohi-Tapu neʼe mā fai. ʼE fakafuafua ʼe mā taki 20 te ako. ʼE au toe manatuʼi mo te ʼofa pea mo te tali kaiga ʼa te ʼu tehina mo tuagaʼane Afelika. ʼI tamā ʼaʼahi te ʼu kokelekasio ʼo Tanzanie, tokolahi ʼomā kaumeʼa neʼe natou fakaha mai tanatou tali kaiga “ ʼo laka age ʼi ʼonatou fealagia.” Ohage la, neʼe natou tali ke tau ovi ki ʼonatou ʼapi tamā motoka Volkswagen Kombi, ʼae neʼe mā momoe ai. Pea neʼe natou tokaga lelei kia maua ke mā maʼu te ʼu meʼa ʼae ʼe ʼaoga kia maua. (2 Ko. 8:3) Neʼe ʼi ai te fakatuʼutuʼu makehe neʼe mā fai ʼi te afiafi fuli. Neʼe mā faiga mo toku hoa ko Ann-Catrin ke mā tahi fakamatala te ʼu aluʼaga neʼe hoko kia maua ʼi te ʼaho katoa, pea mo fakamalo kia Sehova tana nofo mo maua.

Ann-Catrin: Kia au, neʼe au fiafia lahi ʼi taku maʼuli fakatahi mo totatou foʼi famili fakamalamanei. Neʼe mā ako he ʼu lea kehekehe ohage la, ko te lea Farsi, mo Fakafalani, mo te lea Luganda, pea mo te lea Swahili. Neʼe mā toe iloʼi ai mo te ʼu faʼahiga agaʼi fenua kehekehe. Neʼe mā akoako he ʼu tehina mo tuagaʼane foʼou, ʼo matou liliu ai ko he ʼu kaumeʼa moʼoni, pea neʼe matou gaue “fakatahi” mo natou ʼi te tauhi kia Sehova.​—Sofo. 3:9.

Neʼe mā toe sio ki te fakaofoofo ʼo te taulekaleka ʼo te fakatupu ʼa Sehova. Ka mā tali pe he gaue maʼa Sehova ʼi he tahi koga meʼa, ʼe hage pe ʼe mā folau mo Sehova pea ʼe ina takitaki maua. Kana ʼaua la tana akoʼi mai he ʼu aluʼaga, neʼe mole feala ke mā iloʼi.

Kotea te ʼu fihifihia neʼe kolua tau mo ia? Pea neʼe kolua lava tauʼi feafeaʼi?

Mats: Neʼe lahi te ʼu mahaki neʼe mā tau mo ia, ohage la ko te paludisme. Pea neʼe tuʼa lahi te tafa fakapunamaʼuli ʼo Ann-Catrin. Neʼe mā toe tuʼania ki ʼamā matuʼā ʼae kua vaivavai. Koia neʼe mā lotofakafetaʼi ki toku kiʼi tehina mo te ʼu kiʼi tokolua mo kiʼi tehina ʼo toku ʼohoana ʼi tanatou tokakaga lelei ki ʼamatou matuʼā. Neʼe natou faʼa kataki mo fiafia pe pea mo ʼofa. (1 Tim. 5:4) Kae, ʼi ʼihi temi neʼe mā tauʼi he ʼu manatu fakalotovaivai. Neʼe mā ʼamusia age ke mā nonofo ovi ʼo tokoni kia naua ʼi hamā tokoni pe mai mamaʼo.

Ann-Catrin: ʼI te 1983, neʼe au tau mo he mahaki kovi ko te choléra ʼi Zaïre. Neʼe ui fenei e te toketa kia Mats: “Ke ke foimo ʼave neinei tou ʼohoana ki he tahi fenua!” ʼI te ʼaho ake, neʼe mā toʼo te vakalele ʼae ʼe fetuku uta. Pea neʼe ko te vakalele pe ʼaia ʼe tahi neʼe ava pea neʼe toe alu ki Suède.

Mats: Neʼe mā manatu kua ʼosi tamā gaue misionea koia neʼe mā tagi mamahi ʼosi. Kae neʼe toe lelei leva te mahaki ʼo Ann-Catrin, logo foki la neʼe mole ko te tala ʼaia ʼa te toketa. Pea hili ki ai te taʼu katoa, neʼe mā toe liliu ki Zaïre, ki he kiʼi kokelekasio Swahili ʼi Lubumbashi.

Ann-Catrin: Lolotoga tamā maʼuʼuli ʼi Lubumbashi, neʼe to toku fatu. Logo la neʼe mole mā fakatuʼutuʼu ke mā maʼu hamā toe, kae ʼi te mate ʼo tamā kiʼi toe neʼe faigataʼa ʼosi kia au. Kae lolotoga te temi mamahi ʼaia, neʼe foaki mai e Sehova he meʼa ʼofa neʼe mole mā ʼamanaki ki ai. Neʼe lahi te ʼu ako neʼe mā kamata ʼo laka age ia ʼi muʼa atu. Kae neʼe heʼeki taʼu katoa pe la, neʼe tuputupu te kokelekasio. ʼI muʼa atu, ko kau faifakamafola ʼe toko 35, pea ʼi te temi nei kua kaku ʼo 70. Pea ko te kaugamalie ʼae ʼe kau ki te ʼu fono ko te toko 220, kae ʼi muʼa atu neʼe ko te toko 40 pe. Neʼe mā maʼumaʼua ʼaupito ʼi te minisitelio, pea neʼe lahi te ʼu tapuakina neʼe foaki mai e Sehova ʼo mā logoʼi ai he toe lotofimalie lahi. Kae, neʼe mā manatuʼi mo palalau tuʼumaʼu pe ki tamā kiʼi toe. Pea ʼe mā fakaʼamu lahi ke mā sisio pe ʼe fakamalolo feafeaʼi anai e Sehova ʼo talu ai te ʼu mamahi ʼae ʼe mā logoʼi ʼi tomā loto.

Mats: ʼI te tahi lakaga, neʼe gaʼegaʼe kovi ʼosi ai ia Ann-Catrin. Pea neʼe tala mai kia au ʼe au maʼu te kosea ʼo te colon, kae neʼe kua kovi ʼosi. Pea neʼe tonu ke tafa lahi au. Kae ʼi te temi nei kua au lelei pe, pea ʼe fai pe e Ann-Catrin te meʼa ʼe ina lavaʼi maʼa Sehova.

Neʼe mā mahino ʼe mole ko maua pe ʼe tau mo he ʼu ʼahiʼahi. Hili te mātea ʼae neʼe hoko ʼi te 1994 ʼi Rwanda, neʼe lahi ʼomā kaumeʼa neʼe mā olo ʼo fakasiosio ʼi te ʼu nofoʼaga ʼae neʼe feholaki mai ki ai te hahaʼi. Neʼe mā sisio mata ki tanatou tui, mo tanatou faʼa kataki pea mo tanatou tali kaiga lelei. Koia, neʼe mā ako ai te ʼuhiga mafimafi ʼo Sehova, he ʼe lava tokoni ki tana hahaʼi tatau aipe pe kotea te ʼu ʼahiʼahi ʼe natou tau mo ia.​—Pes. 55:22.

Ann-Catrin: Neʼe hoko te tahi fihifihia ʼi tamā kau ki te avahi ʼo te filiale foʼou ʼo Ouganda ʼi te 2007. Hili te fakatahi, neʼe mā olo ki Nairobi ʼi Kenya mo he kutuga misionea mo Petelite ʼe teitei toko 25. ʼI muʼa ʼo tamatou kaku ki Kenya, neʼe haʼu malohi he foʼi kamio ʼi tomatou kauala ʼo fakaʼi matou. Neʼe mamate atu aipe te sofea mo he ʼu tehina mo tuagaʼane ʼe toko nima, pea ki muli age neʼe mate mo he kiʼi tehina ʼi te lopitali. ʼE mā fakaʼamu lahi ke mā toe sisio ki ʼomā kaumeʼa.​—Sopo 14:​13-​15.

ʼAki te temi, neʼe kua lelei pe ʼoku lavea. Kae ko au mo Mats pea mo ʼihi neʼe kei matou lotohoha ʼaupito ʼuhi ko te fakaʼi ʼaia. Ko au ia neʼe au tau logoʼi te faʼahi ʼaia ʼi te poʼuli, ʼo ʼoho ai taku moe, he neʼe hage taku hoha ʼaia ʼe meʼa ke tuʼu toku mafu. Neʼe fakamataku ʼosi. Kae neʼe mā faikole malohi kia Sehova mo lau he ʼu vaega fakalotofimalie neʼe mā leleiʼia ʼo tokoni mai ke mā lava tauʼi tomā hoha. Neʼe toe tokoni lahi mai kia maua tamā olo ki he ʼu toketa ki te mahaki ʼulu. ʼI temi nei, ʼe mole kei mā lotohoha ke feafeaʼi. Pea ʼe mā haga faikole tuʼumaʼu kia Sehova ke tokoni mai ke mā fakalotofimalieʼi ia natou ʼae ʼe tau mo he mahaki feia.

ʼI takolua fakamatala mai takolua faʼahiga tauʼi te ʼu aluʼaga faigataʼa, neʼe kolua ui mai neʼe hage neʼe toʼo koulua e Sehova “ohage ko he ʼu foʼi moa mata.” Kotea tona fakaʼuhiga?

Mats: ʼE haʼu te ʼu palalau ʼaia mai te takuga lea ʼaeni Swahili: “Tumebebwa kama mayai mabichi,” ko tona fakaʼuhiga, “Neʼe toʼo maua ohage ko he ʼu foʼi moa mata.” Ohage pe ko te tokaga ʼa he tahi moka ʼe ina toʼo he ʼu foʼi moa mata ke mole foa, neʼe toe tokoni feia mai pe ia Sehova ki te ʼu gaue fuli neʼe mā fai. Neʼe mā maʼu tuʼumaʼu pe te ʼu meʼa ʼae neʼe ʼaoga mai kia maua, pea ʼi ʼihi temi neʼe ina foaki mai ʼo laka age. Neʼe mā toe logoʼi te ʼofa mo te tokoni ʼa Sehova ʼi te lotomahino mai ʼa te Kolesi Pule.

Ann-Catrin: ʼE au fia fakamatala atu he aluʼaga neʼe ha ai te lototokaga ʼa Sehova. ʼI te tahi ʼaho, neʼe pauʼi mai he tahi ʼo fakaha mai ko taku tamai, ʼae ʼe maʼuli ʼi Suède ʼe tuku ʼi te koma. Neʼe hoki lelei age pe ia Mats mai te mahaki ʼae ko te paludisme, pea neʼe mole hamā foʼi falā moʼo totogi ʼaki ʼomā tohi folau. Neʼe mā fakatuʼutuʼu ke mā fakatau tamā motoka. Pea neʼe ʼi ai te ʼu faitelefoni ʼe lua kia maua. Ko te tahi neʼe ko he taumatuʼa neʼe nā logo ki te aluʼaga neʼe mā tau mo ia pea neʼe nā fia totogi he tohi folau ʼe tahi. Pea ko te tahi neʼe ko he kiʼi tehina kua vaivai neʼe ina tanaki tana kiʼi foʼi falā ki he kiʼi puha pea neʼe ina tohi ai “Maʼa he tahi ʼe ʼaoga ki ai.” ʼEi, neʼe mole pe la fualoa neʼe tokoni mai ia Sehova kia maua.​—Hep. 13:6.

Kotea ʼae neʼe kolua ako ʼi te ʼu taʼu ʼe 50 ʼae neʼe kolua gaue te temi katoa ai?

Ann-Catrin: Neʼe au ako ʼe mā maʼu te malohi moka ‘ ʼe mole mā hoha kae ʼe mā falala kia Sehova.’ ʼEi, ka mā falala kia te ia, ʼe tau ia maʼa maua. (Esa. 30:15; 2 Klk. 20:​15, 17) ʼE mā fai ia meʼa fuli ʼe mā lavaʼi ʼi te ʼu gaue takitahi ʼe mā fai ʼi tamā tauhi kia Sehova. Koia, neʼe lahi age te ʼu tapuakina neʼe mā maʼu ai. Ka na neʼe mā fai he tahi age ʼu gaue, ʼe mole maʼu tapuakina feia maua.

Mats: Ko te ako tafito neʼe au maʼu mai ai, ʼe ko taku tuku taku falala kia Sehova ia aluʼaga fuli, pea mo sio pe kotea ka ina fai maʼa ʼaku. (Pes. 37:5) Neʼe ina fakahoko tuʼumaʼu pe tana fakapapau ʼae ʼe tokoni mai anai. Pea ʼe kei mā sisio pe ki te moʼoni ʼo te ʼu palalau ʼaia ʼi te gaue ʼe mā lolotoga fai nei ʼi te Petele ʼo Birmanie.

ʼE mā fakaʼamu lahi, ʼe iloʼi anai e te tokolahi ʼo te kau tupulaga ʼae ʼe natou fia fakalahi tanatou minisitelio, ia te ʼofa agatonu ʼae neʼe fakaha mai e Sehova kia maua. ʼE mā tui papau ʼe tokoni anai ia Sehova kia natou ke natou fakamamahani mo te ʼu fetogi, pea ke natou fiafia tuʼumaʼu pe ʼi te fahaʼi ʼae ʼe hinoʼi natou ki ai.