ʼE Tonu Koa Ke Tuku Taku Sofea?

ʼE ke tau koa mo he aluʼaga feia? Kapau koia, kotea ʼe tokoni atu pe ʼe tonu ke ke hoko atu tau sofea?

ʼI ʼihi fenua, ʼe tonu ke fakasiosio, peʼe fakamoʼoni e he toketa te aluʼaga ʼo te kau sofea ʼae kua vaivavai, pe ʼe tonu ke hoko atu tanatou taki motoka. ʼE fakalogo te kau Fakamoʼoni ʼa Sehova ʼo te ʼu fenua ʼaia ki te ʼu lao mo te ʼu tonu ʼa te Puleʼaga. (Loma 13:1) Tatau aipe pe ʼe kofea ʼae ʼe ke maʼuli ai, kae ʼe ʼi ai te ʼu aluʼaga ke ke fakasiosio ai pe ʼe kei ke lava hoko atu tau taki motoka.

FAI KIA KOE TE ʼU FEHUʼI ʼAENI

ʼE ʼi ai te kautahi ʼi Amelika maʼa te hahaʼi matutuʼa ʼe natou fakalotomalohiʼi ke natou fai te ʼu fehuʼi ʼaeni:

• ʼE faigataʼa koa taku lau te ʼu pano ʼo te ala peʼe ko taku sio ʼi te poʼuli?

• ʼE kei au lava sio koa ki te ʼu sioʼata ʼae ki muli ʼo feia pe mo te ʼu tafaʼaki?

• ʼE faigataʼa koa kia au haku foimo lomiʼi te taʼofi moka hoko he aluʼaga?

• Ka au taki motoka, ʼe au alualu mamalie koa ʼo tupu ai te haʼele tuʼu ʼo te ʼu motoka mai muli?

• Neʼe tuʼa lahi koa te meʼa ʼae ke au faifakaʼi? ʼE ʼi ai koa he ʼu koko peʼe ko he ʼu mahalu ʼi taku motoka, ʼuhi neʼe au fakaʼi he ʼu meʼa?

• Neʼe kua taʼofi koa au e he polisi ʼuhi ko taku sofea?

• Neʼe kua au tule moe koa moka ʼe au sofea?

• ʼE au toʼo koa he ʼu foʼi ʼakau ʼo fua kovi ai ki taku sofea?

• Neʼe kua fakaha mai koa e natou ʼo toku famili, peʼe ko hoku ʼu kaumeʼa tanatou tuʼania ki taku sofea?

Kapau ʼe ke ʼio ki he fehuʼi ʼe tahi peʼe lua, pea ʼe lelei ke ke fai he ʼu kiʼi fetogi. Ohage la, ʼe feala ke ke fakatuʼutuʼu ke mole ke sofea tuʼumaʼu, tafito la ʼi te poʼuli. Ke ke vakaʼi tuʼumaʼu pe ʼe tonu ke hoko atu tau taki motoka. ʼE feala hau fakalavelave ki he tahi ʼo tou famili, peʼe ko hou kaumeʼa pe kotea tana manatu ki tau sofea. ʼE feala hau toe fakatuʼutuʼu ke ke toʼo he ʼu ako sofea ʼe tokoni atu anai pe ʼe kei tonu ke hoko atu tau taki motoka. Kae kapau neʼe lahi te ʼu fehuʼi ʼae ʼi aluga neʼe ke ʼio ki ai, pea ʼe lagi lelei ke ke tuku tau sofea.a

TUKU KE TAKI KOE E TE ʼU PELESEPETO FAKATOHI-TAPU

ʼE lagi faigataʼa kia tatou tatatou sio ʼae ʼe mole kei lelei tatatou sofea. Pea ʼe lagi feala ke tou iita peʼe tou mamahi mo kapau ʼe tonu ke tuku tatatou sofea. Koia, kotea te ʼu pelesepeto ʼe tokoni atu ke ke fakakaukau lelei, pea mo toʼo he tonu ʼe fakapotopoto? Ke ke vakaʼi pelesepeto ʼe lua.

Ke ke fiamalalo. (Taag. 11:2) Ka tou vaivavai, ʼe mole kei lelei tatatou sio mo tatatou logo, ʼe mole kei tatau totatou malohi, pea mole kei vave tatatou fai he ʼu meʼa moka tou sofea. Ohage la, tokolahi ʼe mole kei natou fai ʼihi faigaoʼi moka natou vaivavai, koteʼuhi ʼe natou tokagaʼi ʼe feala hanatou lavevea ai. ʼE tou maʼu he pelesepeto feia ʼe fakaʼuhiga ki te taki motoka. Ka fiamalalo he tahi, ʼe tuku anai tana sofea ke mole tuʼutamaki ai. (Taag. 22:3) Pea ko he tahi ʼe fiamalalo, ʼe ina tali lelei mo fagono anai mo kapau ʼe fakaha age e ʼihi tanatou tuʼania.​—Vakaʼi ia 2 Samuele 21:​15-​17.

ʼAua naʼa tukugakoviʼi koe ʼuhi ko he ligi toto. (Tet. 22:8) Ka mole taki lelei he motoka, pea ʼe feala ke hoko ai he tuʼutamaki. Kapau ʼe hoko atu pe te sofea ʼa he tahi maʼia pe ʼe mole kei taki motoka lelei, ʼe feala pe ke mate ai pea mo ʼihi. Pea kapau ʼe hoko he fakaʼi ʼo mate ai he tahi, pea ʼe feala pe ke tukugakoviʼi ia ia ʼi te mate ʼa te kilisitiano ʼaia.

Kapau ʼe tonu ke ke tuku tau sofea, ʼaua naʼa ke manatu ʼe mole kei ʼi ai hou matagafua, peʼe ko hou ʼuhiga. ʼE ʼofa Sehova ia koe he ʼe ʼi ai ʼou kalitate ohage la, ʼe ke fiamalalo mo agavaivai pea ʼe ke lototokaga ki ʼihi. Pea ʼe ina fakapapau atu ʼe tokoni pea mo ina fakalotofimalieʼi anai koe. (Esa. 46:4) ʼE mole ina liʼaki anai koe ʼi he temi. Koia, ke ke kole kia te ia ke tokoni atu ke ke maʼu te poto, mo te fakasiosio tonu moka ke toʼo te tonu ʼae ke ke tuku tau sofea.