“Kotou Taupau Takotou Logo Tahi ʼAe ʼe Kotou Maʼu Mai Te Laumalie Maʼoniʼoni”

Ko te logo tahi ʼae ʼe maʼu ʼi te kokelekasio ʼe “maʼu mai te laumalie maʼoniʼoni.” Ko tona fakaʼuhiga ʼe maʼu ia te logo tahi ʼuhi ko te malohi gaue ʼa te ʼAtua. Kae ohage ko tona ui e Paulo ʼe tonu ke taupau tatatou logo tahi ʼaia. Ke taupau ʼe ai? Ko tatou, ʼu tehina mo tuagaʼane takitokotahi ʼae ʼe tonu ke tou faiga ʼo taupau te logo tahi ʼae ʼe tou “maʼu mai te laumalie maʼoniʼoni.”

Ohage la, ʼe foaki atu he motoka foʼou. Ko ai ʼae ʼe tonu ke tokaga lelei ki ai? ʼE ke iloʼi lelei pe tona tali. Kapau ʼe mole kei haʼele te motoka he neʼe mole ke tokaga lelei ki ai, ʼe mole ke tukugakoviʼi anai ia ia ʼae neʼe ina foaki atu.

ʼO toe feia pe mo tatatou logo tahi ʼe ko he meʼa ʼofa mai ia Sehova, kae ʼe tonu ke tou tahi faiga ʼo taupau tatatou logo tahi. Kapau ʼe mole kei tou felogoi lelei mo he tehina peʼe ko he tuagaʼane, tou fai te fehuʼi ʼaeni kia tatou totonu: ‘ ʼE au faiga malohi koa ke au fakatokatoka te fihifihia moʼo taupau te logo tahi ʼo te kokelekasio?’

‘FAIGA MOʼONI’ KE KE TAUPAU TE LOGO TAHI

Ohage ko tona ui e Paulo, ʼi ʼihi temi ʼe tonu ke tou faiga malohi moʼo taupau te logo tahi ʼae ʼe tou maʼu mai te laumalie maʼoniʼoni. Tafito la moka fakamamahiʼi tatou e he tehina peʼe ko he tuagaʼane. Kae ʼe tonu tuʼumaʼu koa ke tou palalau kia ia ʼae neʼe ina fakamamahiʼi tatou moʼo taupau te logo tahi? Kailoa ia. Ke ke fai te fehuʼi ʼaeni: ‘Kapau ʼe au alu ʼo palalau kia ia, ʼe au taupau anai koa te logo tahi peʼe ʼasili ai te fihifihia?’ ʼI ʼihi temi ʼe lagi lelei age ke mole ke tokagaʼi te lakahala ʼae neʼe fai atu peʼe ke fakamolemole.​—Taag. 19:11; Mko. 11:25.

Ohage pe ko totatou fakalotomalohiʼi e Paulo, tou haga “fekatakiʼaki ʼi te ʼofa.” (Efe. 4:2) Neʼe ui ʼi he tohi ʼe feala ke toe fakaliliu fenei te ʼu kupu ʼaia: “Tou tali ia natou he ʼe ko tonatou pe ia ʼuhiga.” Ko tona fakaʼuhiga ke tou tali ʼe fai e ʼotatou tehina mo tuagaʼane he ʼu lakahala ohage pe ko tatou. ʼE moʼoni, ʼe tou faiga ke tou kofuʼi “te ʼuluagaaga foʼou.” (Efe. 4:​23, 24) Kae ʼe mole he tahi ia tatou ʼe haohaoa. (Loma 3:​23) Kapau ʼe tou manatuʼi te fahaʼi ʼaia, ʼe faigafua ai anai hatatou fekatakiʼaki, mo fefakamolemoleʼaki pea mo ‘taupau ai te logo tahi ʼae ʼe tou maʼu mai te laumalie maʼoniʼoni.’

Kapau ʼe tou fakamolemole kia ia ʼae neʼe ina fakamamahiʼi tatou pea mo tou galoʼi, ʼe hoko atu pe tatatou logo tahi ʼo tou “maʼuʼuli ʼi te tokalelei.” Ko te kupu Fakakeleka ʼae neʼe fakaliliu ʼaki “maʼuʼuli ʼi te tokalelei” ia Efeso 4:3 ʼe fakaʼuhiga ki “te ʼu ivi.” Pea ko te kupu ʼaia ʼe tou maʼu ia Kolose 2:​19. Ko te ʼu ivi malolohi ʼaia ʼe natou fakapipiki fakatahi te ʼu hui. ʼO toe feia pe ʼe tokoni mai totatou ʼofa ki ʼotatou tehina mo tuagaʼane pea mo te tokalelei ke tou nonofo ovi kia natou logo la he ʼu tokakovi ʼe feala ke hoko.

Koia kapau neʼe fakamamahiʼi koe e he tehina peʼe ko he tuagaʼane peʼe ke ita, faiga ke ke lotomanavaʼofa kia ia kae mole ke tokagaʼi pe te meʼa ʼae neʼe ina fai atu. (Kol. 3:​12) Ko tatou ʼe tou agahala fuli. Pea lagi neʼe mamahi pe la he tahi ʼuhi ko hau palalau peʼe ko he meʼa neʼe ke fai. Kapau ʼe ke manatuʼi te faʼahi ʼaia, ʼe tokoni atu anai ke ke faiga malohi ʼo “taupau te logo tahi ʼae ʼe [tou] maʼu mai te laumalie maʼoniʼoni.”