XAAJ 4

Kan mooy Yàlla?

LI nit ñi di jaamu bare na. Waaye Mbind mu sell mi nee na benn Yàlla dëgg rekk moo am. Yàlla, kenn la te amul moroom, moo sut ñépp, te mooy sax ba fàww. Moom moo sàkk lépp li nekk ci asamaan ak ci suuf te moom moo ñu may dund. Kon moom rekk lañu war a jaamu.

Musaa a ngi yore xeer yi fi Yàlla bindoon Fukki Ndigal yi — *Sàrt bi wàcc ci yonent Yàlla Musaa, ‘ kàddug yoon la woon, wi Yàlla yégle jaarale ko ci malaaka yi ’*

Ni ñuy woowe Yàlla bare na waaye benn tur rekk la am. Tur boobu mooy YEXOWA. Lii la Yàlla wax Musaa : “ Waxal bànni Israyil : ‘ Aji Sax ji [Yexowa, MN], di Yàllay maam yi, Yàllay Ibrayima, Yàllay Isaaxa ak Yàllay Yanxóoba, moo ma yónni ci yéen. ’ Loolu mooy sama tur ba fàww. Noonu lañu may wooye ci ay maam ba ciy maamaat. ” (Gàddaay gi 3:15). Tur boobu feeñ na lu jege 7000 yoon ci Mbind mu sell mi. Ni ko Sabuur 83:18, MN waxe ci Yàlla, “ yow mii tudd Yexowa, yow rekk yaay Aji Kawe ji ci kaw suuf si sépp. ”

*Turu Yàlla feeñ na ci aaya bu ñu mën a jàng ci mbind mu yàgg lool te ñu gis ko ci wetu Géej gu amul dund (Mer morte ci tubaab)*

Kenn masul gis Yàlla. Lii la Yàlla wax Musaa : “ Doo mën a gis sama xar-kanam, ndaxte kenn mënu maa gis tey dund. ” (Gàddaay gi 33:20). Yàlla mu ngi asamaan te doomu Aadama mënu ko gis. Kon baaxul ñuy defar walla ñaan ay xërëm, ay nataal walla lépp lu ñuy méngale ak Yàlla. Lii la Yexowa digal, mu jaarale ko ci yonentam Musaa : “ Bul sàkkal sa bopp xërëm, di ko jox melow dara lu nekk ci kaw asamaan, mbaa ci suuf, mbaa ci ndox, yi suuf tiim. Bu leen sujjóotal te bu leen jaamu, ndaxte man maay Aji Sax ji, di Yàlla sa Boroom. Yàlla ju fiir laa. ” (Gàddaay gi 20:2-5). Ginnaaw loolu, lii la wax yonent Yàlla Esayi : “ Maay Aji Sax ji [Yexowa, MN], mooy sama tur ; duma bàyyeel sama ndam keneen mbaa sama sag xërëm yi. ” — Esayi 42:8.

Am na ay nit ñu gëm Yàlla waaye pur ñoom kenn mënu ko xam walla jege ko, te ragal ko moo ëpp solo bëgg ko. Loo ci xalaat ? Ndax Yàlla fonk na la, yow ci sa wàllu bopp ? Ndax mën nga ko xam, te dem ba jege ko ? Nañu seet lu neex li Mbind mu sell mi wax ci ay mbiri Yàlla yu rafet.

Xel mu sell mi jóge ci Yàlla ak Malaakaam yi

Lan la Yàlla di jëfandikoo ngir def coobareem ? Lenn lu muy jëfandikoo mooy xelam mu sell mi. Xel mu sell mi, du nit, du malaaka, mënuñu ko gis waaye doole la boo xam ne amul fu mu yem te ci la Yàlla di defe lépp lu mu bëgg. Moom la Yàlla jëfandikoo bi mu sàkkee asamaan ak suuf. “ Ci kàddoom la Yexowa sàkke asamaan, te ci xel mi jóge ci gémmiñam la sàkke lépp li asamaan ëmb. ” (Sabuur 33:6, MN) Njàlbéen ga 1:2 wax na ci jamono bi Yàlla doon waajal suuf si ngir nit mën cee dëkk, fekk ndox moo doon muur suuf si sépp. Aaya boobu nee na ‘ xelum Yàlla dafa doon wër, tiim ndox mi. ’ Ginnaaw loolu Yàlla dafa jëfandikoo xelam mu sell mi ngir sàkk lépp luy dund ci kaw suuf.

Yàlla dafay jaar itam ci malaaka yi ngir def coobareem. Yàlla dafa leen sàkk ngir ñu nekk ci asamaan ak moom. Bare nañu doole lool. Dañuy jottali kàddu yuy jóge ci Yàlla te def yeneen liggéey yu am solo. Loolu la Mbind mu sell mi wax ci Sàrt bi Yàlla wàcce woon ci Musaa. Dafa ne “ kàddug yoon [la woon], wi Yàlla yégle jaarale ko ci malaaka yi ”. Malaaka Yàlla yi dañuy jàpple itam jaami Yàlla yi nekk ci kaw suuf si. Mbind mu sell mi nee na “ ay xel lañu [. . .] yuy liggéeyal Yàlla, mu di leen yónni ñuy dimbali nit, ñi nar a jot mucc gi. ” — Yawut ya 1:14 ; 2:2.