YUVU YA ALEKE
Ekuma Mfwete Sambilanga?
Lufimpu lumosi lwa vangama lusonganga vo aleke ayingi kuna América besambanga, kansi ndambu kaka bevanganga wo lumbu yawonso. Akaka muna yau bekukiyuvulanga: “Nga e sambu luvuvamu kaka kitwasanga yovo vena ye diambu diankaka kivanganga?
Nki i sambu?
Sambu i mokena yo Mvangi a lekwa yawonso. Yindula e lau diampwena tuna yau. Kanele vo Yave osundidi wantu awonso, “kavavukidi konso muntu ko muna yeto.” (Mavangu 17:27) Muna Bibila okutuvananga e mboka yayi yamfunu: “Nufinama Nzambi, oyandi mpe okunufinama.”—Yakobo 4:8.
Aweyi olenda finamena Nzambi?
Muna sambu—vava osambanga, omokenanga yo Nzambi.
Muna longoka Bibila—vava olongokanga e Bibila Nzambi “omokenanga” yaku.
E mbokena zazi, i sia vo, samba yo longoka e Bibila, dikusadisa mu kala ye kikundi kiakola yo Nzambi.
“Omokena yo Yave, i sia vo, yo muntu osundidi o mfunu mu nsema wawonso, i lau diampwena muntu kalenda kala diau.”—Jeremy.
“Ozayisa mambu mana mekuntokanesanga kwa Yave dikunsadisanga muna kumfinama.”—Miranda.
Nga Nzambi owanga kieleka e sambu?
Kana nkutu vo okwikilanga muna Nzambi yo samba kwa yandi, nanga olenda kala yo lukatikisu kana vo Nzambi owanga sambu yaku. Kansi, Bibila kivovanga vo Yave “owanga e sambu.” (Nkunga 65:2) Nzambi okulombanga nkutu vo ‘wayekeka kwa yandi mawonso mekutokanesanga.’ Ekuma? ‘Kadi mfunu kekuvuanga.’—1 Petelo 5:7.
Yindula diambu edi: Nga ovaulanga e ntangwa mu mokena ye akundi aku? Olenda vanga diau adimosi kwa Nzambi. Mokenanga yandi ntangwa zawonso muna sambu yo sadilanga nkumbu andi, Yave. (Nkunga 86:5-7; 88:9) E Bibila kikuvovesanga vo ‘sambanga ntangwa zawonso.’—1 Tesalonika 5:17.
“Muna sambu izayisanga mawonso mena muna ntim’ame kwa Se diame dia zulu.”—Moises.
“Izayisanga Yave mana ngina mau muna nsi a ntima, nze una imokenenanga yo mama yovo nkundi ame.”—Karen.
Nkia mambu ndenda lomba muna sambu?
Bibila kivovanga vo: “Muna mambu mawonso, muna sambu ye ludodokelo ye matondo, nuzayisa e ndomba zeno kwa Nzambi;”—Filipi 4:6.
Nga diadi disongele vo tulenda kweto samba mu kuma kia mambu meto? Elo. Kadi e Bibila kivovanga vo: “Yekeka e zitu diaku kwa Yave, oyandi okusadisa.”—Nkunga 55:22.
Kansi, vava osambanga kwa Nzambi kufwete vovelanga kaka mambu mekututokanesanga ko. Nleke mosi una ye nkumbu Chantelle wavova vo: “ E kikundi kiame yo Yave ke kiadi kumama ko kele vo yalombanga kaka lusadisu lwandi muna sambu. Yamona vo e diambu diantete mfwete vanga ivutula matondo, kadi mambu mayingi ngina mau mfwete vutulwila matondo.”
Yindula diambu edi: Nkia mambu ma zingu olenda vutulwila matondo? Nga olenda yindula mambu matatu mana olenda vutulwila matondo kwa Yave o unu?
“Kana nkutu lekwa yakete-kete, nze mvuma zambote-mbote, ilenda kutufila mu vutula matondo kwa Yave muna sambu.”—Anita.
“Yindula lekwa kimosi muna nsema kitoma kusivikisanga yovo diambu olongokele muna sono kia Bibila, i bosi vutula matondo kwa Yave.”—Brian.