Pe e Tatau Ona Ou Tatalo i Sagato?

Le tali a le Tusi Paia

Leai. Ua faaalia i le Tusi Paia e na o le Atua e tatau ona tatou tatalo atu i ai, e ala atu i le suafa o Iesu. Na faapea atu Iesu i ona soo: “Ia faapea ona outou tatalo: ‘Lo matou Tamā e o i le lagi, ia faapaiaina lou suafa.’” (Mataio 6:9) E leʻi faatonuina e Iesu ona soo ia tatalo atu i sagato, agelu, po o se isi lava e ese mai i le Atua.

Na fetalai foʻi Iesu i ona soo: “O aʻu o le ala, o le upu moni ma le ola. E leai se tasi e alu atu i le Tamā pe a lē ui mai iā te aʻu.” (Ioane 14:6) E na o Iesu ua tofia e le Atua e ʻaiʻoi atu mo i tatou.—Eperu 7:25.

Ae ā pe a ou tatalo i le Atua ma tatalo foʻi i sagato?

Na fetalai le Atua i se tasi o vaega o Tulafono e Sefulu: “O aʻu o le ALII lou Atua, o le Atua fuā.” (Esoto 20:5, New American Bible) I le ā le itu e “fuā” ai le Atua? I le faaopoopoga pito i lalo i le New American Bible, o loo taʻua ai o lona “finagalo ia faamaoni atoatoa atu iā te ia.” O lenā faamaoni po o le tapuaʻiga, e aofia ai ma le tatalo, e finagalo le Atua ia tuusaʻo atu iā te ia.—Isaia 48:11.

E tatou te faatigā i le finagalo o le Atua pe a tatou tatalo atu i so o se tasi, e tusa lava po o sagato po o agelu paia. Ina ua taumafai le aposetolo o Ioane e tapuaʻi atu i se agelu, na taofi o ia e le agelu ma faapea atu i ai: “Aua! O aʻu o lou uso a auauna, o so o lou ʻauuso foʻi ua i ai le mau iā Iesu. Ia e tapuaʻi atu i le Atua.”—Faaaliga 19:10, New American Bible.