Kati Aku Patut Besampi Ngagai Saint?

Saut ari Bup Kudus

Enda. Bup Kudus madahka, kitai semina patut besampi ngagai Petara nengah nama Jesus. Jesus madah ngagai bala murid iya: “Baka tu ku chara kita patut besampi: ‘Apai kami ti di serega: Kudus meh nama nuan.’” (Matthew 6:9) Iya nadai kala ngasuh bala murid iya besampi ngagai saint, bala melikat, tauka orang bukai kelimpah ari Petara.

Jesus madah ngagai bala murid iya: ‘Aku tu meh jalai, pemendar, enggau pengidup. Nadai orang ulih datai ngagai Apai enti enda nengah aku.’ (John 14:6) Semina Jesus aja ke dipilih Petara nyadi orang tengah entara Petara enggau mensia.—Hebrew 7:25.

Baka ni enti aku besampi ngagai Petara, lalu ba maya ti sama besampi ngagai saint?

Lebuh Petara meri Sepuluh Pesan, Iya madah: ‘Aku tu Jehovah, Petara ti chemburu.’ (Pemansut 20:5) Nama reti rambai jaku “Petara ti chemburu”? Nota kaki ba New American Bible madah, Jehovah “dekaka orang nyembah iya seiku aja.” Petara dekaka kitai nyembah iya seiku aja, nyengkaum besampi ngagai Iya aja.—Isaiah 48:11.

Enti kitai besampi ngagai orang bukai, nyengkaum saint tauka melikat, kitai benung ngemediska ati Petara. Lebuh rasul John meremi nyembah seiku melikat, melikat nya nagang iya lalu madah: ‘Anang nyembah aku! Aku tu pen ulun baka nuan, baka semua orang bukai ke arapka pemendar ti dipandangka Jesus. Sembah Petara!’—Pemandang 19:10.