YIZE AKWEZE AKUHULA
Shina Chili Lume Chilemu Kulemba?
Kulita ni chimwe kuhengwola, unji wa akweze mu América kakuzanga kulemba, alioze akehe wika e akulemba hita tangwa. Kwamba pundu, unji wa akweze jacho kota kakulihula ngwo: ‘Shina kulemba chili wika chuma chize twakulinga hanga tulivwe kanawa nyi chuma chikwo nawa?’
Kulemba yika chinalumbunuka?
Kulemba chili kuhanjika ni Sakatanga wa yuma yeswe. Nyonga yimwe ndambu chize chino chinalumbunuka! Yehova kahiana atu eswe mu milali yeswe. Chipwe chocho, “katwamine kusuku ni yetu eswe, mutu ni mutu.” (Yilinga 17:27) Mbimbiliya yinatwehe umwe mutambi upema: “Kundamenu kuli Zambi, mba iye kumakakundama kuli yenu.”—Tiangu 4:8.
Kuchi muhasa kukundama kuli Zambi?
Jila yimwe yili kulemba—muze unalembe, unahanjika ni Zambi.
Jila yikwo kutanga Mbimbiliya—muze unatange Mbimbiliya, Zambi “kanahanjika” ni yena.
Kuhanjika ni Yehova kupalikila mu yilemba ni longeso lia Mbimbiliya, muchikukwasa kukolesa usepa we ni Zambi.
“Yehova kali mutu mulemu chinji mu malilu ni hashi, kashika kuhanjika nenyi chili kuyuka chinene chize mweswawo mutu mahasa kupwa nacho.”—Jeremy.
“Kulweza Yehova manyonga jami ni chize nakwivwa chakungukwasa kukundama kuli Iye.”—Miranda
Shina Zambi kakupanjika lume yilemba?
Chipwe ngwe wakufuliela muli Zambi ni kulemba kuli iye, nihindu muchihasa kukukaliwila kutayiza ngwe Yehova kakwivwa yilemba. Alioze Mbimbiliya yakwamba ngwo Yehova mukwa ‘kwivwa kulemba.’ (Samu 65:2) Mbimbiliya yinatulweze nawa hanga ‘tukunjike yipikalo yetu yeswe kuli iye.’ Mumu liaka? Mumu iye ‘kakutufunga.’—1 Petulu 5:7.
Achinyonga yimwe ndambu: Shina wakusa mashimbu hanga uhanjike ni masepa je? Chino muhasa nawa kuchilinga ni Zambi. Hanjika nenyi mashimbu eswe ni kuzachisa jina lienyi, Yehova. (Samu 86:5-7; 88:9) Mbimbiliya yinatulweze ngwo “Lembenu, kanda nulitwamina nichimwe.”—1 A-Tesalonika 5:17.
“Muze nakulemba nakuhanjika ni Tata wa mu malilu ni kumulweza manyonga jami ni chize nakwivwa.”—Moises.
“Nakulweza Yehova yuma yize ngulinayo mu mbunge ngwe chizechene nakuhanjika ni mama hanji sepa liami.”—Karen.
Yuma yika natamba kwita mu yilemba?
Mbimbiliya yinambe ngwo: “Ha yuma yeswe ku kulemba ni kuliumba hamwe ni kusakwila, kwita chenu akachinyingike kuli Zambi.”—A-Fwilipu 4:6.
Shina mutuhasa kulemba hakutwala ku yipikalo yetu? Ewa! Kwamba pundu Mbimbiliya yakwamba ngwo: “Mbila chiteli che hali Yehova, iye makakukolesa.”—Samu 55:22.
Muze mulemba, kanda uhanjika wika hakutwala ku yipikalo ye. Umwe mwana pwo avuluka ngwo Chantelle yamba ngwenyi: “Usepa wami ni Yehova kuuchi kupema nyi muze mungulemba kuli iye munguhanjika wika hakutwala ku yipikalo yami. Natamba chitangu kusakwilila. Nguli ni yuma yinji yize natamba kumusakwilila.”
Achinyonga yimwe ndambu: Yuma yika ulinayo ku mwono we yize watamba kusakwilila? Shina muhasa kunyonga ha yuma yitatu yize muhasa kusakwilila Yehova musono?
“Chipwe yuma yikehe-yikehe, ngwe kutala chimwe chitemo mutuhasa kusakwilila Yehova.”—Anita
“Nyonga ha chimwe chitangiwa chize chakukukomwesa chinji hanji kupukuna ha chimwe chisoneko chize wakuzanga, hanyima sakwilila Yehova ha yuma yacho.”