Nkaambo Nzi Bakamboni ba Jehova Ncobacita Mulalilo wa Mwami Munzila Iindene Azikombelo Zimbi?

Tulaatobela kapati malailile aamu Bbaibbele ciindi notucita “Mulalilo wa Mwami,” naa Ciibalusyo calufwu lwa Jesu. (1 Bakorinto 11:20) Mukwiimpana, bunji bwazintu zisyomwa alimwi akucitwa muzikombelo zimbi kujatikizya Mulalilo wa Mwami tazizwi mu Bbaibbele.

Makanze

Makanze aakucita Mulalilo wa Mwami ngakuyeeya Jesu, kutondezya kulumba kukulyaaba nkwaakacita akaambo kandiswe. (Matayo 20:28; 1 Bakorinto 11:24) Bubambe oobu talilipobwe pe, naa cilengwa cabukombi calo cicitwa kutegwa muntu alekelelwe zibi. Ibbaibbele liyiisya kuti zibi zyesu zilakonzya kulekelelwa, kutalika kwiinda muzilengwa zyabukombi, pele kwiinda mulusyomo muli Jesu.​—Baroma 3:​25; 1 Johane 2:​1, 2.

Ziindi zyongaye?

Jesu wakalailila basikwiiya bakwe kucita Mulalilo wa Mwami, pele tanaakaamba cacigaminina kuti ziindi zyongaye. (Luka 22:19) Bamwi bayeeya kuti inga kabacita oobo mwezi amwezi, nsondo ansondo, buzuba abuzuba, ziindi zinji mubuzuba, naa kufwumbwa buyo ciindi muntu ncayeeya kuti cili kabotu kucita boobo. Nokuba boobo, kuli twaambo tumwi tweelede kulangwa-langwa.

Jesu wakatalisya Mulalilo wa Mwami mubuzuba mbobakali kucita Pobwe Lyakwiindilila ba Juda, alimwi wakafwa mubuzuba mbubwenya oobo. (Matayo 26:​1, 2) Eeci tiicakalicitikila buyo. Magwalo akozyanisya kulyaaba kwa Jesu kucituuzyo camwanaambelele wa Pobwe Lyakwiindilila. (1 Bakorinto 5:​7, 8) Pobwe Lyakwiindilila lyakali kucitwa ciindi comwe amwaka. (Kulonga 12:​1-6; Levitiko 23:5) Mbubwenya buyo, Banakristo bamumwaanda wakusaanguna bakali kucita Ciibalusyo calufwu lwa Jesu ciindi comwe buyo amwaka, aboobo, abalo Bakamboni ba Jehova balacitobela cilengwa eeci cizwa mu Bbaibbele.

Buzuba aciindi

Mbwaakacicita Ciibalusyo cakusaanguna Jesu citugwasya kuzyiba naa tweelede kucicita ziindi zyongaye, buzuba notweelede kucicita alimwi aciindi. Wakacita Ciibalusyo nolyakabbila zuba mu Nisani 14, 33 C.E., kweelana akkalenda yamu Bbaibbele. (Matayo 26:18-​20, 26) Tulazumanana kucita Ciibalusyo mubuzuba oobu mwaka amwaka, kutobela cilengwa ca Banakristo bamumwaanda wakusaanguna.

Nokuba kuti Nisani 14, 33 C.E. yakali muli Bwasanu, buzuba oobo bulakonzya kuwida mubuzuba bumbi bwansondo mwaka amwaka. Tulabuzyiba buzuba oobo bwa Nisani 14 mpobuwida mwaka amwaka kwiinda mukubelesya nzila njoonya njobakalikubelesya muciindi ca Jesu, muciindi cakubelesya nzila iibelesyegwa mu Kkalenda yamazuba aano yaba Juda.a

Cinkwa awaini

Kupobwe lipya eeli, Jesu wakabelesya cinkwa citakwe bumena alimwi awaini uusalala izyakasyaala ku Pobwe Lyakwiindilila. (Matayo 26:26-​28) Kutobela cikozyanyo cakwe, tubelesya cinkwa citajisi bumena naa citabikkidwe budodoodo buli boonse alimwi awaini uusalala uutavweledwe.

Zikombelo zimwi zibelesya cinkwa cijisi bumena, pele mu Bbaibbele kanji-kanji bumena bwiiminina cibi akusofwaala. (Luka 12:1; 1 Bakorinto 5:​6-8; Bagalatiya 5:​7-9) Aboobo, cilikke cinkwa citajisi bumena abudodoodo buli boonse ncecikonzya kweelela kwiiminina mubili wa Kristo uutakwe cibi. (1 Petro 2:​22) Acimbi cilengwa citali camu Bbaibbele ncakubelesya minsaansa kupanga waini. Zikombelo zimwi zilacita oobo akaambo katwaambo tutali twamumagwalo twakukasya bantu kunywa bukoko.​—1 Timoteyo 5:​23.

Zitondezyo, kutali mubili wini abulowa

Cinkwa citajisi bumena awaini uusalala izibelesyegwa lya Ciibalusyo nzitondezyo zyamubili wa Kristo abulowa. Tazicincwi camaleele naa kusanganizyigwa amubili wini wa Kristo naa bulowa, kweelana ambobayeeya bamwi. Amulange-lange ncaamba Magwalo kujatikizya makani aaya.

• Ikuti Jesu wakalailila basikwiiya bakwe kunywa bulowa bwakwe, nkokuti wakali kubaambila kutyola mulawo wa Leza uujatikizya kulya bulowa. (Matalikilo 9:4; Milimo 15:28, 29) Kunyina nocakacitika eeco, nkaambo Jesu takonzyi kwaambila bamwi kutyola mulawo wa Leza uujatikizya mbobusetekene bulowa.​—Johane 8:​28, 29.

• Ikuti baapostolo bakali kunywa bulowa bwa Jesu bwini, nkokuti Jesu naatakaamba kuti bulowa bwakwe “bweelede kutilwa ansi,” icitondezya kuti cipaizyo cakali kuyooboola kumbele.​—Matayo 26:28.

• Cipaizyo ca Jesu cakacitika “ciindi comwe buyo.” (Bahebrayo 9:​25, 26) Nokuba boobo, ikuti cinkwa awaini zyakacincwa kuba mubili wini wa Jesu alimwi abulowa ciindi ca Mulalilo wa Mwami, nkokuti aabo ibalya nobali kupa cipaizyo eeco cakwinduluka-induluka.

• Jesu wakaamba kuti: “Kamucita oobu lyoonse kutegwa kamundiyeeya,” kutali “kundituula.”​—1 Bakorinto 11:24.

Aabo basyoma kuti cinkwa awaini zilacinca kuba mubili wini wa Jesu alimwi abulowa, njiisyo yabo iyeeme amajwi aamwi aamutupango twamu Bbaibbele. Mucikozyanyo, muma Bbaibbele manji, Jesu waamba boobu kujatikizya waini: ‘Oobu mbulowa bwangu.’ (Matayo 26:28) Nokuba boobo, majwi aa Jesu alimwi alakonzya kusandululwa kuti: “Eeci ciiminina bulowa bwangu.” Mbubwenya mbwaakali kucita ziindi zinji, Jesu aawa wakali kuyiisya kwiinda mukubelesya maambilambali.​—Matayo 13:34, 35.

Mbaani balya?

Ciindi Bakamboni ba Jehova nobacita Mulalilo wa Mwami, mbasyoonto buyo ibalya cinkwa alimwi akunywa waini. Nkaambo nzi ncocili boobo?

Bulowa mbwaakatila Jesu bwakatalisya “cizuminano cipya” calo cakanjila mubusena bwacizuminano icakali akati ka Jehova alimwi acisi cakaindi cabana Israyeli. (Bahebrayo 8:​10-​13) Aabo ibali mucizuminano eeco cipya mbabalya zitondezyo lya Ciibalusyo. Cizuminano eeco tacibikkilizyi Banakristo boonse, pele buyo “baabo bakaitwa” munzila iilibedelede a Leza. (Bahebrayo 9:​15; Luka 22:20) Aaba mbabayoolela kujulu antoomwe a Kristo, alimwi Bbaibbele lyaamba kuti aabo bajisi coolwe eeci bali buyo 144,000.​—Luka 22:28-​30; Ciyubunuzyo 5:​9, 10; 14:​1, 3.

Mukwiimpana ‘akatanga kaniini’ kabaabo ibayoolela a Kristo, bunji bwesu tujisi bulangizi bwakuba cibeela ‘cankamu mpati’ iiyootambula buumi butamani anyika. (Luka 12:32; Ciyubunuzyo 7:​9, 10) Aboobo swebo notujisi bulangizi bwakuyoopona anyika tatunywi naa kulya zitondezyo lya Ciibalusyo, pele tulabasangana mukutondezya kulumba kukulyaaba nkwaakacita Jesu akaambo kandiswe.​—1 Johane 2:2.