Zenezi
Aga norĩ wasuꞌu, Ismaeu me
16 Tawamhã Saraꞌi, Abrãhã mro te zahadu timro ma, ꞌra ãna ꞌre hâimana. Tawamhã Saraꞌihi ma, romhuriꞌwa te Aga na isisi tãma ꞌre ꞌmaihâimana, ezipsiu norĩ nhipiꞌõ hã. 2 Tawamhã nimahã bâtâ na Saraꞌi ꞌra õ wa, te Abrãhã ma tãma tinha ãne:
— Uburé Danhibꞌapito, ĩꞌra da te te ĩma rowairébé õ ꞌru te, maꞌãpé ĩma romhuriꞌwai ãma aihâimana mono. Ãhã wamhã, taha hâiba uꞌâbâ ãté te za ĩꞌra ne ĩma ꞌre hâimana zaꞌra.
Tawamhã Abrã, Saraꞌi tinhimirosaꞌrada te te ãne tãma iwaihuꞌuzém na ma tô ãma saze.
3 Tahawa, ma tô Aga imro prã na tãma ꞌre ihâimana mono da hã oto tãma tisõ. Abrã Canaꞌã na romnhisi ãma ꞌre ihâimana mono zém na 10 na ãma iwahub ãma ma tô ãne na tiromhâiba. 4 Tawamhã Abrã, Agaha ãma hâimana mono wa, ma tô oto tiwasã. Tawamhã oto tiwasã na siwaihuꞌu wamhã, ma tô Aga hã, Saraꞌi tinhibꞌihâꞌa tãma iꞌmadâꞌâ wapure zarina oto siwi wẽꞌõ pese ꞌrâwi. 5 Tahawa Saraꞌi te Abrãhã ma tinha ãne:
— A hã iꞌupai uꞌâbâmhã ma tô Aga siwi ĩwẽꞌõ. Tô wa hã asibꞌrata te aima sõmri nherẽ, oto tiwasã na siwaihuꞌu wamhã, ma tô siwi ĩwẽꞌõ pese tô. Tahawa, Uburé Danhibꞌapito si te za wawaihuꞌu, tiha na wa te iꞌupazém na hã, a hã wamhã, duré wa hã wamhã. 6 Tawamhã Abrã, ma te ãma tãma waꞌrã ãne:
— Wẽ di tô, marĩ õ di. Aga, aima romhuriꞌwa te asimiꞌmadâꞌâ na ꞌre hâimana. Tahawa asima iwẽzéb uwaibaba, te za niha marĩ tãma iꞌmanha.
Tawamhã Saraꞌi nasi te te wadaꞌuri pese wa, duré nasi timreme nhitiꞌru na te te tãma nharĩ wa, ma tô oto aꞌubuni u tiwi aimani. 7 Tawamhã aꞌubuni wi rop si ꞌre irosaꞌwari mono ãma, Su na romnhisi u bâdâdi inomro ꞌrata ubꞌre ihâimana ãma sãmra ré, ma tô Uburé Danhibꞌapito ma, hâiwa ãma romhuriꞌwa sô ꞌre irĩtĩ mono hã tisã. 8 Tahawa, ta hã te ãne sadanha:
— Aga, Saraꞌihi ma romhuriꞌwa, e ma hawi te wei aimo. E momo te za aimo.
Tawamhã Aga ma asa ãma sadaꞌâ ãne:
— Ĩnhibꞌapito wi, wa we tiwi aimani, Saraꞌihi wi.
9 Tawamhã Uburé Danhibꞌapito ma, hâiwa ãma romhuriꞌwa, ma te ãne tãma waihuꞌu:
— Apâ te za asibꞌapito u aimo. Isapari ꞌre iꞌaihâimana mono na te za imreme ꞌre iwapari pese mo.
10 Tawamhã te duré ãne tãma tinha:
“Asihudu norĩ ahâ uptabi na ꞌre hâimana zaꞌra mono da, wa za ꞌmanha.
Ahâ uptabi wa, da te ꞌre saꞌrata waihuꞌu zaꞌra mono õ di za.
11 Ma tô, tô aiwasã, aiꞌra aima hâimana da hã. Tahawa, te za isisi, Ismaeu* na.
E marĩ wa. Uburé Danhibꞌapito, robzépata wa, ꞌre iꞌasadari mono zé te te wapari wa.
12 Ã hã aiꞌra te za awaru poꞌre pore rom na sima iwẽ na ꞌre ihâimana zaꞌra mono ne ꞌre hâimana.
Ta hã te za uburé te te ꞌre daꞌaꞌwapé. Te za uburé da te dasiwi ꞌre ꞌwapé.
Duré uburé tisisãnawã norĩ nhiti te za ta hã romhâ na ꞌre hâimana.”
13 Tawamhã Aga, ma tô Uburé Danhibꞌapito hã sisi, ãne: “ꞌRe ihâimana uꞌâsi mono si te te ꞌre ĩꞌmadâꞌâ mono.” Ãne ꞌRe ihâimana uꞌâsi mono te te tãma nharĩ wa, ma tô aré ꞌrâwi sima tinha, ãne: “E ta hã te te ꞌre ĩꞌmadâꞌâ mono hã wa te sena na ĩtõmo na ꞌmadâ, ĩdâꞌâ ãna.” 14 Tahawa â zô abꞌre Cadi norĩ ꞌre, Berete na ꞌri waꞌõtõ nhisi me ihâiba hã ma tô da te ꞌre sisi zaꞌra, ãne: “Â zô abꞌre, ꞌRe ihâimana uꞌâsi mono te, te te ꞌre ĩꞌmadâꞌâ mono te.”
15 Tawamhã Abrãhã ma, Agaha zéꞌre hawi ma tô iꞌra tãma podo. Tahawa, ꞌwatébrémi hã imama, ma tô sisi, Ismaeu na. 16 Abrãhã ãma 86 na iwahub ãma, ma tô Ismaeu podo.