Zenezi

ꞌRe ihâimana uꞌâsi mono, Abraꞌãhã ma, iꞌra na te te tãma iropisutuzé wasuꞌu

18 Tawamhã Uburé Danhibꞌapito, Abraꞌãhã ma, ma tô tãma sihâiꞌré, rowede iwazéb zahi, Mare na isisi ꞌrata hâimana ré. Tawamhã Abraꞌã, hâiwahâ tẽme rowaꞌro wa, ma tô romhâ ꞌmanharĩ na tinhorõwa ꞌridawa zahâpâmhã nhamra rowi. 2 ꞌRãi wahutu wa, te te robꞌmadâꞌâ wamhã, ma tô siꞌubdatõ aibâ norĩ isõꞌre isimasa ꞌmadâꞌâ zaꞌra. Te te ꞌmadâꞌâ zaꞌra wamhã, ma tô siꞌabaꞌré na itẽme tiwara zaꞌra, te te sina uzusi zaꞌra da. Tawamhã hiꞌrãtitõ, ma tô isõꞌreb zaꞌra nhamra. Tiꞌubu na tiꞌai u ma tô ropto.

3 Tawamhã ma tô ãne tãma nharĩ zaꞌra:

— Ĩnhibꞌapito norĩ, niha na asiwi ĩwẽsãmri aba wamhã, maꞌãpé wasitẽme wasihutu ãna wahâimana zaꞌra da hã, ĩnhorõwa ĩré asiwi saꞌrei waꞌaba õ di za. 4 Â hã wa za dama tiꞌru, da te we dasiwi ꞌmaiꞌaꞌâri da, ãma asipara upsõ zaꞌra waꞌaba zéb da hã. Taha parip si te za rowede zahâpâmhã aiwaꞌutu zaꞌra waꞌwa. 5 Dasa zama suru na wa za aima amrami zaꞌra waꞌwa aꞌâ, asiptete sina bâdâdi na aiꞌabaꞌréi waꞌaba zém na ãma uzusi zaꞌra waꞌaba da, aima romhuriꞌwa tẽme we ãwa ĩtẽme aihutu aba dâꞌâsina.

Tawamhã ma te ãne asa hã ãma tãma waꞌrãmi zaꞌra:

— Wẽ di tô. Marĩ õ di, wa ãma wasiwi asaze ni.

6 Tawamhã Abraꞌãhã ma tô siꞌabaꞌré na ꞌri para u hã ãzé, Saraha tẽme. Sébré wamhã, ma tô ãne tãma tinha:

— Maꞌãpé, aiꞌabaꞌré na 10 kilu na ipire pibuzém na trigu ꞌmaiꞌâri, iꞌuꞌẽtẽ wapu waptu na ꞌmaꞌmanharĩ da.

7 Tawamhã powawẽ ꞌre isimasa mono zéb u, ma tô sapraba sina wara. Tahawa ma tô powawẽ zapu iprédup té hã ꞌmaiꞌâ. Tawamhã tite romhuriꞌwai ma, ma tô tãma tisõ, dasa te te ãma ꞌmanharĩ da. 8 Tawamhã powawẽ hâiwaꞌu tom norĩ, ihâiwaꞌui me duré romnhi zebre norĩ me hã ma tô itẽme isihutu norĩ nhoꞌremhã tãma saꞌra zaꞌra. Tawamhã saihuri ré hã, ma tô Abraꞌã iꞌratab zaꞌra rowede zahâpâ hâiwim haré za. 9 Tawamhã imro zô, te ãne duré siwi sadanha:

— E mahãta aimro, Sara hã.

— ꞌRipara te nhamra. — Ãne te asa tãma wasuꞌu zaꞌra.

10 Tawamhã te Abraꞌãhã ma, nimahã tãma tinha ãne:

— Wahup tém na tô ã aꞌamo na wa za we apâ atẽme mo. Tawamhã taha na te za aimro Saraha ma, iꞌra hã tãma podo.

Tahawa, Sara ꞌridawa ãma ibabarã na isa hã ma tô isimirobzanhamrizé sina wapa. 11 Abraꞌã norĩ Saraha me hã hâiba prédub zahuré di oto. Tahawa Saraha ꞌrazéb da, ãma iwahu hã ma tô oto saꞌre. 12 Tahawa te sihâ sina ãne ꞌrâwi sima tinha:

— E niha wa za ĩnhibꞌapito ãma te ĩsima rosaꞌrata ze, wa norĩ hã oto ihire nherẽ, ãhã na hã. Sadai õ di.

13 Tawamhã Uburé Danhibꞌapito, te Abraꞌã hã sadanha ãne:

— E marĩ wa, te Sara hã aihâ. E marĩ da, te tinha, ihi wa, za oto iꞌra waihuꞌu õ na hã. 14 E Uburé Danhibꞌapito ma, marĩ hã ĩma waihuꞌu prã pâ. Uburé marĩ hã ĩma waihuꞌu pese di. Tahawa, te inharĩzéb zarina wahup tém na wa za we atẽme mo apâ. Tawamhã taha na te za iꞌra hã tãma podo, Saraha ma.

15 Tawamhã ãne na imreme te te wapari wamhã, ma tô Sara hã tãma tipahi. Tahawa te tiwi aiꞌudâ ãne:

— Ĩsihâ õ di.

Tane nherẽ, Uburé Danhibꞌapito, ma te ãma tãma waꞌrã ãne:

— Senai õ di iꞌasiwasuꞌuzé hã. Ma! Te tô aihâ.

Abraꞌã, Sodoma wa, ꞌre idahâimana zaꞌra mono norĩ ãma te te irowaptẽrẽzé wasuꞌu

16 Tawamhã itẽme isihutu norĩ, ihawi siꞌabaꞌré da, oto wahutu zaꞌra wamhã, ma tô ꞌri nhoꞌu Sodoma sisahâpâ siwi ꞌmadâ. Tahawa, Abraꞌã ma tô isiré timorĩ zaꞌra, bâdâdi te te aꞌâ tãma wasuꞌu zaꞌra mono da. 17 Tawamhã Uburé Danhibꞌapito te ꞌrâwi sima tinha, ãne: “Abraꞌãhã wi, za marĩ te iꞌmanharĩzé te tiwi iꞌudâ da hã mare di za. 18 Isihudu sidâpâsi ahâ uptabi na ꞌre hâimana zaꞌra mono wa, te za aꞌuwẽ misi ãma isitom na dama siptete na ꞌre hâimana zaꞌra. Ta norĩ uꞌâbâ wa za uburé aꞌuwẽ mono bâ iwẽ hã te tãma ꞌre sõmri zaꞌra, tiꞌai mono bâ. 19 Wa hã, Abraꞌã wa tô pisutu, tiꞌra norĩ ma, tinhihudu norĩ ma, ĩzadawa na si ꞌre sõpré mono da hã te te tãma ꞌre waihuꞌu zaꞌra mono da, tãma ĩnhimirotizé hã te te ꞌre wapari pese zaꞌra mono da, duré iꞌuwaibaba na si sena na ãma ꞌre nomro mono da. Tawamhã ta norĩ ĩmreme te te ꞌre iwapari pese zaꞌra mono na ꞌre hâimana zaꞌra mono wamhã, wa hã wa za Abraꞌãhã ma, te tãma iropisutuzé hã uburé ãma tãma aꞌuwaimra.”

20 Tawamhã Uburé Danhibꞌapito, te Abraꞌãhã ma oto tinha ãne:

— Sodoma norĩ ãma Gomora me, iwasédé da te ãma ꞌre inomri zahuré mono zé saꞌẽtẽ uptabi di. Duré iwa ꞌre idahâimana zaꞌra mono norĩ wasété zaꞌra zé hã pire uptabi di. 21 Tahawa, õwamhã ĩmorĩ da si, dawasédé te ꞌre iwapari mono, sena zô te waihuꞌu da, duré niha wamhã, taré na te waihuꞌu da.

22 Tawamhã maparane itẽme isimasi, ma tô oto tineb zahuré, Sodoma nhoꞌõmoi baba. Tane nherẽ, Uburé Danhibꞌapito si te Abraꞌãhã siré tihâiba, isaꞌu zahuré hã. 23 Tawamhã Abraꞌã ma tô itẽme sina rotété. Tahawa, te ãne sadanha:

— E ꞌre idanomro wasété mono norĩ zu, te za iwẽ norĩ hã isu iꞌupro. 24 Bété 50 na ꞌri nhoꞌõmo ꞌre, dawẽ norĩ dahâimana zaꞌra wamhã. E tane nherẽ, te za ꞌri nhoꞌu hã iré iꞌuprosi zaꞌra. E 50 na dawẽ norĩ aima isawi pe ihâimana zaꞌra zéb zarina, asimihâzé hã bété ꞌri nhoꞌõmo ma, baꞌa õ di za. 25 ꞌRe idanomro wasété mono zu, dawẽ na ꞌre idahâimana zaꞌra mono iꞌuprosi da hã te ãma rosaꞌrata waihuꞌu õ di, dasine tiwasédé te te ꞌre ꞌmanharĩ zaꞌra mono õ nherẽ. Asimirobꞌmanharĩzéb uwaibaba õ di, ãne hã. E marĩ wa. A hã uburé pese daꞌãma ꞌre irowairébé mono ꞌwa te ꞌre aihâimana mo. Tahawa te za iꞌuwaibaba na si niha na dama ꞌre iꞌabꞌmanharĩ mo.

26 Tawamhã Uburé Danhibꞌapito, ma te Abraꞌãhã ma ãma tãma waꞌrã ãne:

— Sodoma ꞌre, 50 na ꞌre idanomro wẽ mono na dahâiba te waihuꞌu wamhã, ta norĩ uꞌâbâ wa za uburé ꞌri nhoꞌõmo ꞌre aꞌuwẽ norĩ ma tãma baꞌa zaꞌra za, ĩnhimihâzé hã.

27 Tawamhã Abraꞌã te duré apâ tãma tinha ãne:

— Ĩꞌruiwaparĩ õ di za, aima ĩwapure nherẽ, za apâ te aima inharĩ na te isahu na hã. E marĩ wa. A hã Uburé Danhibꞌapito. Wa hã tarére hã tiꞌai ãma aꞌuwẽ. 28 Bété 45 na si dawẽ norĩ dahâimana zaꞌra wamhã, e te za tane nherẽ, marĩ hã tihâiba. Duré e 5 na sô irowaptâꞌâ zarina te za ꞌri nhoꞌu hã daré iꞌupro.

Tawamhã ꞌRe ihâimana uꞌâsi mono, ma te ãma sadaꞌâ ãne:

— 45 na ꞌre idanomro wẽ mono, dahâiba na te waihuꞌu wamhã, ꞌri nhoꞌu hã te uprosi õ di za.

29 Te duré Abraꞌã tãma tinha ãne:

— Bété ꞌre idanomro wẽ mono 40 na dahâiba wamhã, e niha te za tawamhã tiromhâiba.

— 40 na dawẽ norĩ dahâiba wamhã, ĩma isawi zaꞌra zéb zarina, ꞌri nhoꞌu hã te uprosi õ di za. — Ãne ma te asa ãma sadaꞌâ, ꞌRe ihâimana uꞌâsi mono hã.

30 Tawamhã Abraꞌã te duré ãne tãma tinha:

— Ĩnhibꞌapito, ĩzada asitiꞌrui õ di za, za duré te aima inharĩzém na hã. Bété 30 na ꞌre idanomro wẽ mono dahâiba wamhã, e niha za tawamhã.

Tawamhã ꞌRe ihâimana uꞌâsi mono, ma ãne ãma sadaꞌâ asa:

— 30 na ꞌre idanomro wẽ mono dahâiba wamhã, te uprosi õ di za, ꞌrinhoꞌu hã.

31 Abraꞌã te duré ãne tãma tinha:

— Ĩnhibꞌapito, ĩmreme nhisébꞌõ na wa tô aima nharĩ siwapto. Tane nherẽ, ĩꞌruiwapari õ di za. Bété 20 na ꞌre idanomro wẽ mono dahâiba wamhã, e niha za duré.

— 20 na dawẽ norĩ dahâiba wamhã, ĩma isawi zaꞌra zéb zarina, ꞌri nhoꞌu hã te uprosi õ di za. — Ãne ma te asa ãma sadaꞌâ ꞌRe ihâimana uꞌâsi mono hã.

32 Abraꞌã hã irẽme ma, te duré ãne tãma tinha:

— Ĩnhibꞌapito, ĩzada asitiꞌru tõ. Irẽme ma wa za oto asadanha. Bété 10 na ꞌre idanomro wẽ mono dahâiba wamhã, e ta norĩ uꞌâbâ ꞌri nhoꞌu hã uprosi õ di za.

— 10 na ꞌre idanomro wẽ mono dahâiba uꞌâbâmhã, ꞌri nhoꞌu te duré uprosi õ di za. — Ãne ma te asa ãma sadaꞌâ ꞌRe ihâimana uꞌâsi mono hã.

33 Tawamhã Uburé Danhibꞌapito, Abraꞌãhã ma, te te nharĩ pari, ma tô oto tiwi mo apâ. Abraꞌãhã zama te duré oto apâ mo, tinhorõwa u.