Zenezi

ꞌRe ihâimana uꞌâsi mono, Abraꞌã sena zô te te ipibuzé wasuꞌu

22 Tawamhã wahu hã duré siꞌutõrĩ mono pari, ꞌRe ihâimana uꞌâsi mono, ma tô Abraꞌã hã pibu, sena na te te sina ꞌre umnhasi pese mono zô. Tahawa isisi na te te ꞌmahârâ wamhã, ma tô ãne sadaꞌâ asa:

— E marĩ. Ãhãta ãme wa za.

2 Tawamhã ꞌRe ihâimana uꞌâsi mono te ãne tãma tinha:

— Misi uptabi aiꞌra siꞌaibâ Izaqui, ꞌre isawi pese mono hã maꞌãpé saprõni, Moria na romnhisi u. Tawamhã tame ẽne te aima ihâiꞌré ãma, te za aiꞌra unhama na iza, ĩma ãma asõprub da hã.

3 Tawamhã Abraꞌã mara hâ ré robzaꞌrã ré, utu wamhã, ma tô awaru poꞌre pore sima bazadâ. Duré mi, ma tô sima anhihâ, tinhoprubzé te te ãma izatazéb da hã. Taha pari, ꞌRe ihâimana uꞌâsi mono, ro te te tãma iwasuꞌu u morĩ da, ma tô oto watobro. Tawamhã Izaqui norĩ, maparane tãma romhuriꞌwa norĩ me, ma tô isiré aiꞌabaꞌré. 4 Tawamhã siꞌubdatõ bâtâ ãma zahadu itẽme siꞌabaꞌréi ré, ma tô romhâ na ré ẽne te te tãma iwasuꞌu hã tisã. 5 Tahawa te tite romhuriꞌwa norĩ ma tãma nharĩ zahuré ãne:

— Ãme aimasisi aba, awaru poꞌre pore ꞌrata. Wa norĩ si wa za ĩꞌra siꞌwatébrémi me hã wanem ni õwamhã, ꞌRe ihâimana uꞌâsi mono ãma wawata da. Ãma wawata parip si, wa za we apâ wanem ni za.

6 Tawamhã Abraꞌã, ꞌRe ihâimana uꞌâsi mono ma, tinhoprub zata zéb da mimi wasi te te saꞌrai wamhã, ma tô tiꞌra Izaquihi nhisé tãma tihi. Tahawa sibꞌézé, préꞌa me ma tô imama hã timra. Taha pari, ma tô oto siré tineb zahuré. 7 Ineb zahuré na ãma ronomro õ ré, te Izaqui, timama ma tinha ãne:

— Ĩmama.

— Ĩꞌra, e marĩ. — Ãne Abraꞌã, ma te asa tiꞌra hã sadaꞌâ:

Tawamhã Izaqui, te timama sadanha ãne:

— Ãhãta mi, duré ãhãta uzâ. E mame te bété poneꞌẽrebâ iꞌrare hã za, izata da hã, ꞌRe ihâimana uꞌâsi mono ma.

8 Tawamhã imama Abraꞌã, ma te ãma sadaꞌâ ãne asa:

— Ĩꞌra, ꞌRe ihâimana uꞌâsi mono si te za poneꞌẽrebâ iꞌrare, te tãma izata na ãma tãma ĩnhoprub da hã tisõ.

Ãne pari te duré siré tineb zahuré. 9 Tawamhã ꞌRe ihâimana uꞌâsi mono, ẽne te te tãma ipisutu u oto simasisi wamhã, ma tô Abraꞌã, ẽtẽ zaꞌra hã ꞌmanha. Duré ẽtẽ nhisi wi, ma tô mi hã saꞌra. Taha pari, ma tô tiꞌra Izaqui pa ubumro, te te wapre mono da. Te te wapre mono pari, ma tô mimi zaꞌra nhisi wi oto tihi. 10 Tawamhã awaꞌawi sibꞌézé, ma tô sada sarõtõ, tiꞌra te te ãma wĩrĩ da. 11 Tane nherẽ, te te sada sarõtõ wi, Uburé Danhibꞌapito te, hâiwa ãma romhuriꞌwa, te hâiwa hawi ꞌmahâ ãne:

— Abraꞌã. Abraꞌã.

— E marĩ. Ãhãta wa za. — Ãne ma asa sadaꞌâ.

12 Tawamhã hâiwa ãma romhuriꞌwa te tãma tinha ãne:

— Tôꞌã. ꞌWatébrémi hã uꞌa tõ. Iwasédé hã tãma ꞌmanharĩ tõ. Wa tô oto aiwaihuꞌu, ꞌRe ihâimana uꞌâsi mono ꞌre iwazé pese mono na, aiꞌra siꞌaibâ misi nherẽ hã tiwi sawi õ wa.

13 Tawamhã Abraꞌã sibabarãi u te te ꞌre robꞌmadâꞌâ mono wamhã, ma tô poneꞌẽrebâ zéré mapure siꞌaibâ wede zapore panhipti waꞌrudu te te iꞌõmo tédé hã tisã. Te te sãmri wamhã, ma tô sô mo. Ma tô tiꞌâ. Tawamhã ma tô tiꞌra hâiba upana ꞌRe ihâimana uꞌâsi mono ma tãma zata, ãma tãma sõprub da. 14 Tawamhã Abraꞌã taha ẽne hã ma tô sisi, “Uburé Danhibꞌapito, te za marĩ ibâ na te te dama ꞌre anhomri uꞌâsi”. Tahawa te ta hawim haré da te ãma ꞌre romnhisi zaꞌra, ãne: “Uburé Danhibꞌapito, tite ẽtẽ ãma marĩ ibâ na te te dama ꞌre iꞌanhomri uꞌâsi mono” na.

15 Tawamhã Uburé Danhibꞌapito te, hâiwa ãma romhuriꞌwa te duré ꞌmahâ hâiwa hawi, Abraꞌã hã. 16 Te tãma tinha ãne:

— Ãne hã ꞌmanharĩ wa, aiꞌra siꞌaibâ misi nherẽ, ĩwi sawi waihuꞌu õ wa, ĩnhisi na wa za wa hã Uburé Danhibꞌapito aima ropisutu, iwẽ hã te aima ꞌre apisutu uꞌâsi mono da. 17 Asihudu sidâpâsi ahâ uptabi na ꞌre hâimana zaꞌra mono da, wa za ꞌmanha, wasi, hâiwa na ꞌre isimasa mono ne, duré pazaihâ na supara ꞌre isimiꞌwara mono ne. Asihudu norĩ hã te za tinhitobꞌru norĩ te, ꞌri nhoꞌõmo norĩ ãma te te ꞌre aiꞌuté zaꞌra. 18 Asihudu norĩ uꞌâbâmhã wa za aꞌuwẽ mono bâ ropâ ꞌre idahâimana zaꞌra mono iwẽ hã te tãma ꞌre apisutu, a hã te aima iwaihuꞌuzém na ĩwapari pese wa, ãne hã ꞌmanharĩ wa.

19 Tawamhã Abraꞌã, tite romhuriꞌwa norĩ isimasisi zahuré zéb u ma tô apâ mo. Tamomo apâ wisi wamhã, ma tô siré oto aiꞌabaꞌré, Beseba na ꞌri waꞌõtõ u. Tawamhã tame te oto ꞌre sãmra, Abraꞌã hã.

Naoho nhihudu norĩ wasuꞌu

20 Tawamhã wahu hã duré siꞌutõrĩ mono pari, ma tô Abraꞌã tisisãnawã Naoho ꞌra, imro Milcaha zéꞌre hawi 8 na tãma ipoto zaꞌra wasuꞌu hã wapa. 21 Ta norĩ ꞌremhã dama ipotoꞌrada hã Uz na isisi hã. Isõsi hã Buz na isisi, Quemuꞌé na isisi, Arãhã mama hã. 22 Taha pari, ipoto zaꞌra nhisi hã ãne: Quesede, Hazo, Pilda, Zidlafe, duré Betuꞌé. 23 Betuꞌé hã, Rebecaha mama. Ã norĩ hã 8 na Milca zéꞌre hawi ipoto zaꞌra, Naor, Abraꞌãhã sisãnawãi ma. 24 Tawamhã duré imro prã Reumahã ꞌra nhisi hã ãne: Teba, Gaꞌã, Taꞌasi, duré Maꞌaca.