Zenezi
ꞌRe ihâimana uꞌâsi mono, Noéhé ma, tinhimiropisutu zahi te te iꞌmanharĩzé wasuꞌu
9 Tawamhã ꞌRe ihâimana uꞌâsi mono, Noéhé ma, iꞌra norĩ me, iwẽ te te tãma pisutu zaꞌra sina, ma tô ãne tãma nharĩ zaꞌra:
— Maꞌãpé atébré aba oto, asihudu norĩ waꞌwa hã, uburé tiꞌai mono bâ te te ropéi mono da. 2 Tawamhã uburé abaze norĩ, si norĩ, diꞌi na ꞌre inomro mono norĩ, duré uburé â ꞌrowi tepe norĩ ꞌre ihâimana zaꞌra mono hã te za aima pahi na ꞌre hâimana zaꞌra waꞌwa. Ã norĩ hã te za duré aima wapu na asahâpâb zaꞌra waꞌaba hã ꞌre hâimana zaꞌra. 3 Uburé te za abaze norĩ hã ꞌre ihuri aba mo. Duré robꞌrã norĩ sipuꞌu pese na ꞌre ihâimana zaꞌra mono hã te za ꞌre ihuri aba mo, asazéb da, te aima ipisutu zaꞌra waꞌwa hã. 4 Tane nherẽ, romnhi waprui ré ꞌre huri aba mono tõ da, wa aiwi sawi pese zaꞌra waꞌwa. E marĩ wa. Dawapru na ãma ꞌre dahâimana zaꞌra mono na dâꞌâsina. 5 Wa hã te te ꞌre idanhimroi mono norĩ nhimiꞌmanharĩzé waꞌrãmimhã, wa za te tãma ꞌre awaꞌâbâ, ĩnhimiꞌmanharĩzém na hã, aiwab da. Duré abaze te te ꞌre idanhimroi mono norĩ nhimiꞌmanharĩzé waꞌrãmimhã, wa za duré te tãma ꞌre awaꞌâbâ, ĩnhimiꞌmanharĩzém na hã, aiwab da. 6 Ĩsine ꞌre dahâimana zaꞌra mono da, wa tô aꞌuwẽ hã te apoto. Tahawa, niꞌwa te te daꞌmaiwĩrĩ wamhã, te za duré wĩrĩ ni za, aiwab da.
7 — Te za oto atébré ꞌwa, asihudu norĩ waꞌwa tiꞌai mono bâ te te ropéi mono da.
8 Tawamhã ꞌRe ihâimana uꞌâsi mono, Noéhé ma, iꞌra norĩ me hã, te duré tãma nharĩ zaꞌra ãne:
9 — Ĩnhimiropisutu zahi, wa za oto aima ꞌmanharĩ zaꞌra waꞌwa, duré niwa romhutuꞌõ, asihudu norĩ ma ropibu ma, 10 duré uburé abaze norĩ ubaꞌre hawi asiré iwairébé norĩ ma hã, si norĩ ma hã, abaze da te ꞌre itébré zaꞌra mono norĩ ma hã, duré rom na ꞌre ihâimana zaꞌra mono norĩ ma hã, tô uburé pese tiꞌai ãma hâiba ré ꞌre ihâimana zaꞌra mono norĩ ma hã. 11 Tahawa wa za ãne ĩnhimiropisutu zahi hã aima ꞌmanharĩ zaꞌra waꞌwa: Iꞌâ pusi mono na niwamhã tiꞌai ãma hâiba ré ꞌre ihâimana zaꞌra mono norĩ, te iꞌuprosi na isahu da hã mare di za. Duré niwamhã tiꞌa, iꞌâ pusi mono na te iꞌuprosi na isahu da hã mare di za. 12 Aima zaꞌra waꞌaba, duré uburé abaze norĩ hâiba ré ꞌre ihâimana zaꞌra mono norĩ ma, ĩnhimiropisutu waihuꞌuzéb da, 13 wa za ĩte tãiwaipore hâiwaꞌa na te ãma ꞌre roꞌrahâri uꞌâsi. Tãiwaipore hã uburé tiꞌai ãma ꞌre idahâimana zaꞌra mono ma, te iropisutuzé te wasuꞌu. 14 Tawamhã duré wa hã hâiwa ꞌrã na te ꞌre hâiwa ubu mono wamhã, duré tãiwaipore na te ãma ꞌre roꞌrahâri mono wamhã, 15 wa za ĩnhimiropisutu zahi te aima iꞌmanharĩ zaꞌra waꞌaba zém na hã, duré uburé abaze norĩ ma, te iꞌmanharĩzém na hã ãma ꞌre ĩsipoꞌre puꞌu za. Ãne wamhã, uburé tiꞌai ãma hâiba ré ꞌre ihâimana zaꞌra mono norĩ te iꞌuprosi na isahu da hã mare di za. 16 Tawamhã duré tãiwaipore hâiwa na te te ꞌre roꞌrahâri mono wamhã, wa hã wa za uburé tiꞌai ãma hâiba ré ꞌre ihâimana zaꞌra mono norĩ ma, ĩnhimiropisudu te ĩꞌmanharĩzém na hã ãma ꞌre ĩsipoꞌre puꞌu uꞌâsi. 17 Tãiwaipore hã uburé tiꞌai ãma hâiba ré ꞌre ihâimana zaꞌra mono ma, te iropisutuzé, te wasuꞌu.
Noéhé ꞌra norĩ wasuꞌu
18 Noéhé ꞌra norĩ, ubaꞌre hawi isiré iwairébé norĩ hã, Sẽ, Cã, duré Zafé (Cã hã, Canaꞌã na isisi mama.). 19 Ã norĩ siꞌubdatõ hã Noéhé ꞌra norĩ. Tawamhã taha nhihudu norĩ hã ma tô uburé tiꞌai mono bâ te te ropé.
20 Tawamhã Noé robꞌre na romhuriꞌwa na te ꞌre hâimana. Ta hã ma tô imorĩꞌrata uptabi na uva dama aꞌre naꞌrata. 21 Tawamhã nimahã bâtâ na uva ꞌru ꞌrãi waꞌu isé na ma tô ãma siꞌrãiwamna. Tahawa aiꞌuréiwi, romhâ ꞌmanharĩ na tinhorõwa ꞌremhã ma tô nomro. 22 Taha ré Cã, Canaꞌã mama hã ma tô timama aiꞌuréiwi nomro ré ꞌmadâ. Tahawa ꞌripara hawimhã ma tô rob u watobro, tisisãnawã norĩ ma, te te tãma wasuꞌu zahuré da. 23 Tawamhã Sẽ norĩ Zaféhé me, ma tô dasiꞌubuzé ꞌmaiꞌâri zahuré. Duré tawamhã tinhisé na te te sima hiri zahuré wamhã, ma tô ba niwĩ unhiniwĩmhã itẽme tineb zahuré, te te ãma ubu zahuré da, timama hã. Tawamhã timama aiꞌuréiwi nomro ré, te te ꞌmadâꞌâ zahuré tõ da, ma tô uꞌrata sina te te robꞌmadâꞌâ zahuré. 24 Tawamhã Noé, siꞌrãiwamnarĩ pari oto apâ tãma romnhoꞌa wamhã, ma tô iꞌra danhobabati te te tãma iꞌmanharĩzé hã sina waihuꞌu. 25 Tahawa te ãne isimiꞌmanharĩzé ma hã tinha:
“Wẽ bâ Canaꞌã! Iwẽꞌõ hã wa za te tãma ꞌre apisutu. Ta hã te za tisisãnawã norĩ ma, pawaꞌâbâ ãna te te tãma ꞌre romhuri uꞌâsi zaꞌra, ta norĩ ma pawaꞌâbâ ãna te te tãma ꞌre iromhuri zaꞌra mono norĩ zahâpâmhã.”
26 Te duré tinha ãne, Noé hã:
“Uburé Danhibꞌapito ãma ꞌre wawata zaꞌra waꞌaba mono, Sẽhẽ nhibꞌapito ãma. Canaꞌã hã pawaꞌâbâ õ nherẽ, isibꞌaꞌuwẽ na tãma ꞌre hâimana mono.
27 ꞌRe ihâimana uꞌâsi mono, maꞌãpé Zaféhé ma, isiptiꞌa saꞌẽtẽ na tãma ꞌre hâimana mono da tãma apraba. Duré isihudu norĩ hã Sẽhẽ nhorõwa ãma romhâ ꞌmanharĩ na ꞌri nhoré wa, iwa ꞌre hâimana zaꞌra mono da, tãma azaꞌré zaꞌra na.
Tawamhã duré Canaꞌã, Zaféhé* ma pawaꞌâbâ ãna romhuriꞌwa na hã tãma ꞌre hâimana mono.”
28 Noé hã â pusi mono parimhã, ma tô duré 350 na ãma iwahum na hã ꞌre hâimana. 29 Tawamhã 950 na ãma iwahub ãma, ma tô oto dârâ.