Isaías
6 Tsô ꞌre atsõpré dzaꞌra waꞌaba Jeová dzô tsõpẽtẽ waihuꞌu petse ré. ꞌMahörö dzaꞌra waꞌaba ꞌröwi wama ꞌre höimana dzaꞌra mono ré. 7 Ĩwatsété norĩ tite bödödi te te rẽme dzaꞌra, Duré ĩwatsété ꞌmanharĩꞌwa norĩ tinhimirotsaꞌrada te te rẽme dzaꞌra; Jeová tẽme te te tsina rotété dzaꞌra, dza ãma ĩtsiwãrĩ dzaꞌra tẽme hã, Wate Ropotoꞌwa hã, tsõprum na dza te te ꞌruiwapari dzaꞌra õ wa. 8 “Tawamhã Ĩ̱nhimirotsaꞌratadzé hã atsimirotsaꞌratadzém nei õ di, Duré ate bödödi norĩ hã ĩ̱te bödödi norĩ nei õ di”, ãne Jeová te tinha. 9 “Tawamhã ãne, höiwa höimo uptabi ne tiꞌa nhipai u, Ãne duré ĩ̱te bödödi norĩ höimo uptabi di ate bödödi norĩ nhipai u, Ĩ̱nhimirotsaꞌratadzéb dzama atsimirotsaꞌratadzém nhipai u. 10 Ãne duré, tãpini hã höiwa hawi ĩtsiꞌ ra mono ne tsaiꞌuri õ di dza apö höiwa u te ropéiꞌõ ré Tiꞌai ãma aꞌö duré ĩhawi maiꞌpoto õre robꞌre hã. Te te anhomri robꞌre hã robꞌreꞌwa norĩ ma duré pahu ãma ĩtsaihuri norĩ ma. 11 Ĩ̱mreme putsi wamhã, ꞌre tsihutu mono õ di ĩ̱ma apö marĩ te ꞌmanharĩ õ ré. Õhõ da te ĩtsatõrĩ dzarina te dza ãma uwaimra.