Jó
2 Taha parimhã, bödö ma tô ĩwa waptãrã Ropotoꞌwa ĩꞌuptabi ꞌra norĩ hã Jeová nhoꞌremhã tsimatsa mono da, Satanás ma tô duré ĩwaꞌwab dzaꞌra ãdzé Jeová nhoꞌremhã tsab da. 2 Tawamhã Jeová te tsadanha Satanás: “E ma hawi te we aimo”. Satanás te tsadaꞌö Jeová: “Tiꞌai baba ꞌre ĩwara mono dzém hawi, duré Tiꞌai babamhã ꞌre ĩ̱morĩdzém hawi.” 3 Tawamhã Jeová te tinha Satanás ma: “E ma tô ĩꞌmadö ĩ̱ma romhuriꞌwa Jó. Niꞌwa ĩtsine ꞌmaihöimana õ di tiꞌai ꞌre. Õ hã, aibö ĩhöimana nhimiꞌupaiꞌõ duré ĩbö na ꞌre ĩhöimana mono, te te ꞌre ĩwadzé Ropotoꞌwa duré te te ꞌre ĩwẽꞌõ ĩwatsédé hã. Te te ãma ꞌre tsatsõmri tihöimana nhimiꞌupaiꞌõdzém na hã, ĩ̱ꞌwapé nherẽ tsada ĩ̱höimana da, taré te uprotsi da.” 4 Tadzahã, Satanás te tsadaꞌö Jeová: “Dahö dahö na. Te dza da te ꞌre tsõmri dzaꞌra hã uburé dama ĩhöimana hã tihöimanadzéb dzô. 5 Tadzahã, maꞌãpé atsibꞌrada wẽ na duré ĩhi hã adzöri duré ĩnhi hã, tawamhã tô tsena õ hã te dza aiwatsuꞌu watsété atsõꞌremhã.” 6 Tawamhã Jeová te tinha Satanás ma: “Maꞌãpé! Õ hã, atsibꞌrata te tihöiba. Tadzahã, wĩrĩ tõ!” 7 Ãne, Satanás ma tô aiꞌré Jeová nhiti duré ma adzö Jó utsi ĩtséi uptabi na hã, ĩpara hö hawi ĩꞌrãi u. 8 Tawamhã Jó ma tiꞌö dzéꞌa na ubꞌrẽ prum na tsihöꞌwari da ꞌruꞌa waꞌwamhã tsãmra tsina. 9 Tawamhã, ĩmro te tãma tinha: “E aihöimana upaiꞌõdzém na dzahadu te ꞌre anomro. Ropotoꞌwa watsuꞌu watsété duré atöꞌö!” 10 Tadzahã Jó te atsa tsadaꞌö: “Piꞌõ ĩtsimidzaꞌretseꞌõ ne te aimre. E wa dza watsima wẽ dzaꞌra ni ĩwẽ tsi Ropotoꞌwa ĩꞌuptabi hawi, ĩwatsédé wa te watsima wẽ dzaꞌra ãna.” Uburé tsô wairébé nherẽ, Jó watsété õ di tidzadawa na. 13 7 bötö ré, duré 7 marana dzama, ma tô tsimro Jó me, tadzahã, te te tãma robdzanhamri dzaꞌra ãna.