2 Crônicas
9 Te aiꞌabaꞌré Hilquias tẽme, sacerdote danhipai u ĩpire hã, duré te tãma tsõmri dzaꞌra robꞌuipradzé hã da te ĩꞌãwitsi dzaꞌra hã Ropotoꞌwa nhorõwa u. Levita norĩ te te ĩromhuri dzaꞌra hã ꞌriwada ꞌmadöꞌöꞌwa na ma tô aré ubumro Manassés nhihudu norĩ wi, Efraim nhihudu norĩ wi duré uburé ĩhöiba amo Israel nhihudu norĩ wi, Judá nhihudu norĩ wib dzama, Benjamim nhihudu norĩ wi duré Jerusalém ãma ꞌre ĩhöimana dzaꞌra mono norĩ wi. 10 Tawamhã, robꞌuipradzé hã ma tô tsõmri ni romhuri Jeová nhorõwa ãma te te ĩꞌmadöꞌö dzaꞌra norĩ ma. Duré Jeová nhorõwa ãma romhuriꞌwa norĩ ma tô ĩtsõrõwa hã ãma petse dzaꞌra duré ma tô ãma hiri wẽ dzaꞌra. 11 Robꞌuipradzé ma tô tsõmri ni roꞌmanharĩ petse ꞌwa norĩ ma duré ꞌriꞌwa norĩ ma, ẽtẽ nhidzöri norĩ te te tsiwi uipra da bururewaré duré toiꞌre te te ꞌmanharĩ dzaꞌra da ꞌri norĩ hã Judá ãma rotiꞌwa norĩ te te tsiwi ĩrẽme dzaꞌra tsiprum haré.