Jó
1 Uz nhiptiꞌai ãma hã, aibö te ꞌre höimana Jó na ĩtsitsi hã. Õ hã, ĩhöimana nhimiꞌupaiꞌõ duré ĩbö na ꞌre ĩhöimana mono, te te ꞌre wadzé Ropotoꞌwa duré te te ꞌre wẽꞌõ ĩwatsédé hã. 6 Bödö ma tô ĩwa waptãrã Ropotoꞌwa ĩꞌuptabi ꞌra norĩ hã Jeová nhoꞌremhã tsimatsa mono da. Satanás ma tô duré ĩwaꞌwamhã ãdzé. 7 Tawamhã, Jeová te tsadanha Satanás: “E ma hawi te we aimo”. Satanás te atsa tsadaꞌö Jeová: “Tiꞌai baba ꞌre ĩwara mono dzém hawi, duré Tiꞌai babamhã ꞌre ĩ̱morĩdzém hawi.” 8 Tawamhã Jeová te tinha Satanás ma: “E ma tô ĩꞌmadö ĩ̱ma romhuriꞌwa Jó. Niꞌwa ĩtsine ꞌmaihöimana õ di tiꞌai ꞌre. Õ hã, aibö ĩhöimana nhimiꞌupaiꞌõ duré ĩbö na ꞌre ĩhöimana mono, te te ꞌre ĩwadzé Ropotoꞌwa duré te te ꞌre ĩwẽꞌõ ĩwatsédé hã.” 9 Satanás te atsa tãma tinha, Jeová ma: “E taré Jó te te ꞌre wadzé Ropotoꞌwa. 10 E ĩꞌwawimhã , ĩtsõrõwa waꞌra õ bö duré uburé ĩtsimarĩ norĩ ꞌwawimhã. A hã ma tô tãma atsõpru ĩtsibꞌrata nhimiromhuri uꞌöbö, duré ĩtsimidzama norĩ hã ma tô te te tsina höimo dzaꞌra daro mono bö. 11 Taha waꞌrãmimhã, maꞌãpé atsibꞌrada wẽ na duré adzöri uburé ĩtsimarĩ norĩ, tawamhã tô tsena õ hã te dza aiwatsuꞌu watsété atsõꞌremhã. 12 Tawamhã Jeová te tinha Satanás ma: “Maꞌãpé! Uburé ĩtsimarĩ norĩ atsibꞌrata te tihöiba. Tadzahã, upi tõ ĩhöiba hã!” Ãne, Satanás ma tô aiꞌré Jeová nhiti. 13 Tawamhã ĩꞌra tsiꞌaibö norĩ ĩꞌra tsipiꞌõ norĩ me tsaihuri mono ré duré uva ꞌrãi waꞌu ĩtsé te te öhuri mono ré ĩtsitsãnawã ĩpotoꞌrata nhorõwa ãma, 14 roꞌmahöröꞌwa Jó tẽme te mo duré te tinha: “Powawẽ norĩ te tsiwi waꞌi duré awaru poꞌre pore norĩ du hã te te tsiwi ꞌre huri ĩtsiniwĩ dzaꞌra, 15 tawamhã Sabá nhihudu norĩ ma tô wama robꞌmanharĩ watsété dzaꞌra abadze norĩ tsiptsaihuri dzaꞌra da; ma tô duré tsibꞌédzé ꞌwa pa na tsiwi tsimro aima romhuriꞌwa norĩ hã. Ĩ̱höiba tsi wa ĩ̱tsitsõꞌreptu te aima watsuꞌu da. 16 Dzahadu te te robdzanhamri ré, roꞌmahöröꞌwa ĩhöiba amo hã ma wi duré te tinha: “Udzö Ropotoꞌwai hawimhã ma waptãrã, höiwa hawi, duré ma tô dzata poneꞌẽrẽ bö norĩ duré ĩꞌmadöꞌöꞌwa norĩ me te te uprotsi dzaꞌra tsina. Ĩ̱höiba tsi wa ĩ̱tsitsõꞌreptu te aima watsuꞌu da. 17 Dzahadu te te robdzanhamri ré, roꞌmahöröꞌwa ĩhöiba amo hã ma wi duré te tinha: “Aibö norĩ Caldeia nhiptiꞌai hawi tsiꞌubdatõ daꞌubumro na te tsô tsitsaꞌre awaru baꞌõmo norĩ dzô duré te tsiwi waibu; ma tô duré tsibꞌédzé ꞌwa pa na tsiwi tsimro aima romhuriꞌwa norĩ hã. Ĩ̱höiba tsi wa ĩ̱tsitsõꞌreptu te aima watsuꞌu da. 18 Dzahadu te te robdzanhamri ré, duré rowatsuꞌuꞌwa ĩhöiba amo hã ma wi duré te tinha: “Aiꞌra norĩ tsaihuri ré duré uva ꞌrãi waꞌu ĩtsé te te öhuri ré ĩtsitsãnawã ĩpotoꞌrata nhorõwa ãma, 19 rotsaꞌretse õ ré, rowaꞌuꞌu dzaꞌẽne ma watobro ro ꞌre ĩrotsaꞌwari mono hawimhã, duré ma pru maparane tsiꞌuiwana ꞌri naꞌrata norĩ hã. Taha wa, ꞌri ma waptãrã ĩhöibatém norĩ nhitsiwi duré ma tô tidöꞌö dzaꞌra. Ĩ̱höiba tsi wa ĩ̱tsitsõꞌreptu te aima watsuꞌu da. 20 Tawamhã, Jó ma wahudu duré ma tô tiꞌudza hã höiwa dzu, ma tô duré tsiꞌrãpa; taha parimhã tiꞌai u ma tsime tiꞌai u te te ropto tsina 21 duré te tinha: “Aiꞌuréiwi ĩ̱na diꞌi hawi wa watobro, Duré aiꞌuréiwi wa dza apö ĩ̱tsina tsiri. Jeová ma tô ĩ̱ma titsõ, duré Jeová ma tô ĩ̱wi wadze. Jeová nhitsi ãma ꞌre dawata dzaꞌra mono.” 22 Uburé tsô wairébé nherẽ, Jó watsété õ di duré te te upai õ di Jeová te te ĩꞌmanharĩ na hã tiwatsédé hã.