1 Reis
5 Tahã bötö mono ré Adonias, Hagite ꞌra, te dama tsina höimo ãne: “Wa dza ĩ̱tsirotiꞌwa!” Ma tô tsina rowaꞌõtõ robduri rotiꞌwa te, duré awaru maprabaꞌwa norĩ, duré 50 aibö norĩ ĩtsõꞌre tsitsaꞌre mono da. 6 Tadzahã niwa ĩmama hã te te tãma pẽtẽ õ di, te te tãma nharĩ da hã: “E marĩ wa tahã te ĩꞌmanha.” Õ hã duré ĩꞌmadöꞌö dzei uptabi di, Absalão parimhã ĩpodo. 7 Adonias ma tô tãma robdzanha Joabe, Zeruia ꞌra, duré Abiatar sacerdote ma hã, õ norĩ hã ma tô ropitsutu dzahuré dza te te ĩpawaptob dzahuré na hã, duré te te ĩꞌupari dzahuré na hã. 8 Tadzahã Zadoque, sacerdote hã, Benaia, Jeoiada ꞌra hã, Natã, roꞌmahörö ꞌrata ꞌwa hã, Simei, Reí, duré datsiꞌwapéiꞌwa ĩtsibꞌru norĩ hã Davi te hã te te upari dzaꞌra õ di Adonias.