ROMNHIHÖDÖ 4
E ꞌwa hã Jesus Cristo.
1. E ma hawimhã Jesus.
Dahöiba mono bö Jesus ma da te ꞌre robdzanhamri dze dzaꞌra mono di aré. E niha bö. — MATEUS 11:29; MARCOS 10:13-16.
Watsine dzaꞌra õ na, Jesus ma tô ꞌre höimana höiwa ãma ĩhöiba tsamriꞌõ na Tiꞌai ãma waptãꞌã wanaré. (João 8:23) Õ hã, Höimanaꞌuꞌö nhimipotoꞌrada duré ma tô pawapto ropoto na. Jesus tsi õne haré Jeová nhimipoto wa, ĩmahörödzé hã Höimanaꞌuꞌö ꞌra na “mitsire”. (João 1:14, Apocalipse 19:13) Jesus ma tô ꞌre mreme uburé Timama te te tãma ĩꞌrudzéb dzarina, taha wa, ĩmahörödzé ‘Höimanaꞌuꞌö Mreme’ na hã.—Tsõré na Colossenses 1:15, 16.
2. E marĩ da Jesus Tiꞌai u ma tô wei wi.
Te te tsatõrĩ da Tiꞌra Tiꞌai u, Höimanaꞌuꞌö ma ãma tsaprĩ ĩhöimanadzé hã höiwa hawi Maria diꞌi u, ĩꞌubuni judeu tsipiꞌõ. Ãne, Jesus aꞌuwẽ ĩmama baba di. (Lucas 1:30-35)Tiꞌai u ma tô wei wi (1) te te dama waihuꞌu da tsena hã Höimanaꞌuꞌö watsuꞌu, (2) te te wama waihuꞌu dzaꞌra daꞌãma ĩtsitsanho dzarina wa te ꞌre ꞌmanharĩ dzaꞌra mono da Höimanaꞌuꞌö te te tsima ĩwẽdzé hã, ropipa nherẽ duré (3) ‘döꞌö da, daꞌupana te te daꞌawaꞌöbö da’. —Tsõré na Mateus 20:28.
3. E marĩ wa, dawaꞌöbödzé te tsô wawi tirowaptöꞌö dzaꞌra.
E marĩ dawaꞌöbödzé. Dadzanidzéb da dadöꞌö wi. (Êxodo 21:29, 30, TNM) Robnaꞌrata hawimhã, Höimanaꞌuꞌö te te tsima ꞌre wẽ mono õ di dadöꞌö da duré datsiꞌĩhi da. E niha wama waihuꞌu petse dzaꞌra di. Höimanaꞌuꞌö aibö ĩmorĩꞌrata ma, Adão ma, te tinha watsété wamhã dza ĩdöꞌö na hã. Ãne, Adão watsété õ ꞌwaꞌöhã, niwa döꞌö õ di aré. (Gênesis 2:16, 17; 3:19) Bíblia dzarina, dadö ‘ma tô tinhanaꞌrata’ Adão watsété hawimhã. Taha wa, Adão ma tô ãma ropé dawatsédé hã duré dadö aihĩni tinhihudu norĩ ma. Dawaꞌöbödzé te tsô wawi tirowaptöꞌö dzaꞌra da te wadzani dzaꞌra da dawatsété hawi Adão te te wama ĩropé dzaꞌra hawi. —Tsõré na Romanos 5:12; 1 Coríntios 15:21, 22.
E ꞌwa te dza wawaꞌöbö dzaꞌra te te wadzani dzaꞌra da dadöꞌö hawi. Dadö hã dawatsété waꞌöbödzé. Wawatsété dzaꞌra wa, wa te dawaꞌöbö waihuꞌu dzaꞌra õ di.—Tsõré na Romanos 3:23.
4. E marĩ wa Jesus ma tô dörö.
Watsine dzaꞌra Jesus watsété õ di. Taha wa, döꞌö õ di aré tiwatsété wa — niwa watsété õ di. Jesus ma tô dörö ĩhöiba amo norĩ watsété dzaꞌra wa. Höimanaꞌuꞌö ma tô höiꞌré daꞌãma tinhimidzawi petse dzé Tiꞌra hã we te te tsatõrĩ wamhã wadzada döꞌö da. Jesus duré ma tô höiꞌré tinhimidzawidzé waꞌãma Timama te te tsadawa dzamarĩ wa duré tihöiba te te tsõmri wa wawatsété dzaꞌra wa.—Tsõré na 1 João 4:9; Romanos 5:18, 19.
ꞌMadöꞌö ĩropodo E marĩ wa Jesus ma tô dörö.
5. E marĩ Jesus te ꞌmanha ã hã bötö na hã.
Tiꞌab ré, Jesus ma apetse ĩhödzé ré norĩ hã, ma tô dahöiwaꞌutu ĩdadöꞌö dzaꞌra duré ma tô dama awapu robdzépada hã. Ãne na, ma tô ãma tsimiréꞌé dza te te ĩꞌmanharĩdzé hã aptoꞌoré aihĩni ĩpoꞌre petse norĩ ma. (Mateus 15:30, 31; João 5:28) Jesus döꞌö parimhã, Höimanaꞌuꞌö ma tô höiwaꞌutu ĩhöiba tsamrĩꞌõ na. (1 Pedro 3:18) Tawamhã, Jesus ma tô ꞌre tsimipari Höimanaꞌuꞌö nhimire niwĩ ĩtsiptetedzé Jeová te te tãma ĩtsõmridzéb dzô Rotiꞌwa da hã Tiꞌai ãma wahuré. (Hebreus 10:12, 13) Ã hã bötö na hã, te te ꞌre roti mono, duré ĩtsadawa dzamarĩꞌwa norĩ hã ‘rowatsuꞌu wẽ hã’ te te ꞌre watsuꞌu dzaꞌra Tiꞌai mono bö.—Tsõré na Apocalipse 11:15; Mateus 24:14.
Romhutu na, Jesus te dza tinhiptetedzém na Rotiꞌwa na aꞌuprotsi robdzépada hã duré ĩꞌmanharĩꞌwa norĩ hã. Aihĩni te te ĩtsadzei petse dzaꞌra norĩ hã poꞌre petse na Jesus na, te dza ꞌre höimana wẽ dzaꞌra mono Ro Ĩwẽ ãma Tiꞌai ãma.—Tsõré na 2 Tessalonicenses 1:6-8.