E niha Höimanaꞌuꞌö nhimirotsaꞌrada hã Tiꞌai ãma.

1. E marĩ da Höimanaꞌuꞌö ma ꞌmanha Tiꞌa hã.

Jeová ma ꞌmanha Tiꞌa hã ĩwa ꞌre wahöimana dzaꞌra mono da hã. Ta hã, wanhorõwa dzaꞌra. Tane, Höimanaꞌuꞌö te te poto õ di Adão duré Eva, höiwa ãma ꞌre höimana dzahuré mono da — ma tô poto dawatsuꞌuꞌwa norĩ höiwa ãma ꞌre höimana dzaꞌra mono da. (Jó 38:4, 7) Höimanaꞌuꞌö ma tô titsẽ Adão Ro Ĩwẽ uptabi ãma Éden na ĩtsitsi hã. (Gênesis 2:15-17) Jeová te aré tsima wẽ ta hã duré ĩꞌra norĩ hã ꞌre höimana uꞌötsi dzaꞌra mono da Tiꞌai ãma.—Tsõré na 1 João 2:17; Atos 17:26.

Duréihã, Éden tsi aré ro ĩwẽ. Adão duré Eva ĩꞌra dzahuré da tsi aré Tiꞌai ãma daꞌahö da. Bödö ãma morĩ tsidöpötsi, Adão nhihudu norĩ te aré te te ꞌre ꞌmadöꞌö dzaꞌra Tiꞌai wahuré, taha ꞌremhã rowẽ da hã. (Gênesis 1:28) Tiꞌa niwa da te uprotsi õ di dza. Ta hã, dza danhorõwa õne uꞌö.—Tsõré na Salmo 104:5.

ꞌMadöꞌö ĩropodo E marĩ wa Höimanaꞌuꞌö ma tô poto tiꞌa hã.

2. E marĩ wa Tiꞌa rowẽ õ di ã hã bötö na hã.

Adão duré Eva te te wapari dzahuré õ di Jeová, taha wa, ma tô tsani dzahuré Ro Ĩwẽ hawi. Ro Ĩwẽ hã ma aiꞌutõ duré apö da te ꞌmanharĩ waihuꞌu õ di. Ta hawim haré, Tiꞌai ãma dawatsété norĩ ꞌmatsitsi di.—Tsõré na Gênesis 3:23, 24.

Bété Jeová e te te ãma uwaimrami waihuꞌu petse di tinhimirotsaꞌrada hã daꞌãma. Tãma waihuꞌu petse di! Õ hã, tsiptete uptabi di; niwa te te upai waihuꞌu õ di. (Hebreus 10:23) Höimanaꞌuꞌö te dza ãma uwaimra te te tsima ĩwẽdzé hã ꞌre dahöimana uꞌötsi dzaꞌra mono da Tiꞌai ãma.—Tsõré na Romanos 8:20, 21.

3. E niha Ro Ĩwẽ apö te dza tihöiba.

Ro Ĩwẽ hã apö te dza tihöiba Tiꞌai ãma Jesus te te ꞌre roti mono ré Rotiꞌwa na Höimanaꞌuꞌö nhimipitsutu na. Datsiꞌwapé na Armagedom na ĩtsitsi, Jesus duré dawatsuꞌuꞌwa norĩ te dza uprotsi dzaꞌra Höimanaꞌuꞌö dzada ꞌre ĩhöimana dzaꞌra mono norĩ hã. Taha parimhã, Jesus te dza Satanás pawatsitsi mil na wahub ré. Höimanaꞌuꞌö nhibꞌaꞌuwẽ norĩ te dza tsõꞌreptu dzaꞌra ni daꞌuprotsidzém ãma. Jesus te dza tãma roti dzaꞌra duré te dza ꞌmadöꞌö dzaꞌra. Õ norĩ hã, te dza ꞌre höimana wẽ dzaꞌra mono õne uꞌö Ro Ĩwẽ ãma Tiꞌai ãma.—Tsõré na Apocalipse 20:1-3; 21:3, 4.

4. E niwa robdzépada hã te dza aiꞌutõ.

E niwa Höimanaꞌuꞌö te dza uprotsi marĩ watsédé Tiꞌai ãma. Jesus ma tô watsuꞌu ‘marĩ ĩwatobrodzé’ robꞌrãtsutu u romhutu wamhã. Marĩ norĩ ꞌre ĩwairébé mono Tiꞌai ãma te te ꞌre amhödzépa dahöimanadzé hã duré te watsuꞌu ‘robꞌrãtsudu hã’, niwamhã rowatsété ꞌrãtsudu romhutu na.—Tsõré na Mateus 24:3, 7-14, 21, 22.

Te te ꞌre roti mono ré mil na wahum na Tiꞌai ãma, Jesus te dza robdzépada hã uprotsi. (Apocalipse 7:17; 11:15) Te dza romhu Rotiꞌwa na duré sacerdote danhipai u ĩpire na. Sacerdote danhipai u ĩpire na te dza tipa Jeová dzawiꞌwa norĩ watsédé. Ãne, Jesus hawi, Höimanaꞌuꞌö te dza uprotsi dahödzé, datsiꞌĩhi duré dadö.—Tsõré na 1 Coríntios 15:26; Apocalipse 21:4.

5. E ꞌwam norĩ te dza ꞌre höimana dzaꞌra Ro Ĩwẽ ãma aptoꞌoré hã.

Höimanaꞌuꞌö wapari petse ꞌwa norĩ hã te dza ꞌre höimana dzaꞌra Ro Ĩwẽ ãma. (1 João 2:17) Jesus ma tô tsatõ ĩtsiré ꞌre ĩnomro mono norĩ hã ĩwẽ norĩ dzô te te tãma waihuꞌu dzaꞌra da duré te te ꞌmanharĩ dzaꞌra da Höimanaꞌuꞌö te te tsima ĩwẽdzé hã. Ã hã bötö mono na hã, Jeová te dawairo daꞌahö uptabi na Ro Ĩwẽ ãma Tiꞌai ãma ꞌre dahöimana dzaꞌra mono da. (Sofonias 2:3) Jeová Watsuꞌuꞌwa norĩ Tsiꞌrãꞌõtõdzém ãma hã, da te ꞌre waihuꞌu dzaꞌra datsina damro wẽ dzé, datsidamama wẽ dzé duré datsidana wẽ dzé hã.Daꞌra norĩ timama norĩ me Höimanaꞌuꞌö ãma te tiwata dzaꞌra duré te waihuꞌu dzaꞌra dahöimana wẽ dzé ĩtsimiroti na.—Tsõré na Apocalipse 15:4.