E niha te dza ĩrowaꞌõtõ robꞌuipradzém na hã.

Robꞌuipradzém na tsi wa natsi robꞌuipra dzaꞌra ni datsa norĩ, daꞌudza, duré uburé marĩ norĩ hã, taha wa robꞌuipradzé te wawi tsô tirowaptöꞌö dzaꞌra. (Provérbios 30:8) Ãne wamhã, ‘ĩtsimarĩ petse norĩ ꞌwawimhã te dza ĩtsibro hã ꞌre tsimapa dzaꞌra.’ (Provérbios 10:15) Tadzahã ĩmro ré norĩ ma te te tsima robdzanhamri dzahuré wamhã robꞌuipradzém na hã tãma pire dzahuré di, tane nherẽ atsiꞌwapéi aba õ di dza robꞌuipradzém na hã. (Efésios 4:32) Atsima robdzanhamri aba marĩ norĩ ãma ĩꞌuipra aba dzéb da hã, atsiꞌumnhatsi aba, duré tsimitsutu atsiré atsina rotsaꞌrata aba.

1 ATSIMA ROWAꞌÕTÕ PETSE ABA

BÍBLIA DZARINA: ‘Ãté te dza atsima ĩꞌmairotsaꞌrata ꞌwa, atsima ꞌmaiꞌri waꞌaba da, robꞌmadöꞌödzéb da. Tahawa, te dza aꞌö ãma ĩꞌmairowaꞌõtõ wẽ waꞌwa, ꞌri waꞌöbödzéb da, robꞌuipradzé hã ĩwab dzô.’ (Lucas 14:28) Atsima rowaꞌõtõ aba na hã robꞌuipradzém na hã ĩpire uptabi. (Amós 3:3) Pitsutu aba ĩꞌuipra aba dzéb da tsi, duré e niha robꞌuipradzé hã te dza ĩꞌuprotsi waꞌwa. (Provérbios 31:16) Ĩꞌuprotsi aba tõ da tsi uburé ate waꞌwa hã robꞌuipradzé. Tsada ꞌre atsiptete uꞌötsi aba mono, robꞌuipradzé dawi, niwamhã Wedehöbö wi waptẽrẽ aba õ di dza, duré danhimarĩ norĩ dawi ꞌre uipra aba mono õ di dza apötsi awaꞌöbö aba da. Uprotsi aba ate waꞌwa robꞌuipradzé ĩhöimana na tsi. — Provérbios 21:5; 22:7.

TAHA DA ATSIPTETE:

• Aꞌamo ꞌrãtsutu u robꞌuipradzé taréme wamhã, atsiré atsima pitsutu aba e niha te dza ĩꞌuprotsi waꞌwa, niwamhã mare di.

• Robꞌuipradzé aiwi tsô ꞌrowaptö aba wamhã, te dza ãma ĩꞌmairowaꞌõtõ wẽ waꞌwa, ãma ĩtsuru da ĩwaꞌöbödzé. E niha. ꞌRi ꞌre atsipi aba mono, datsa ꞌre aiꞌuipra aba mono tõ da. Taré uprotsi aba tõ uburé ate waꞌwa robꞌuipradzé. Duré uipra aba tõ datsa dzeire, duré uburé petse aiꞌra norĩ te te tsima ĩwẽ dzaꞌra dzé hã, robꞌuipradzé ĩhöimana na tsi.

2 TÔ TSENA AIMREME

BÍBLIA DZARINA: ‘Ĩꞌuwaibaba, wa te ãma ĩꞌuwaimrami dzaꞌra da tsi, wa tô ĩré watsima robꞌmadöꞌö dzaꞌra ni, Wanhibꞌapito nhoꞌa, duré uburé danhoꞌa dzama.’ (2 Coríntios 8:21) Tô tsena aimro ma robdzanhamri ate robꞌuipradzém na hã, aipawaꞌöbödzém na, duré ĩꞌuipradzém na.

Natsi robdzanhamri uꞌötsi aimro ma ĩpitsutudzém na, robꞌuipradzém na hã, ĩꞌuipradzém na hã, ĩpawaꞌöbödzém na dzama. (Provérbios 13:10) Robꞌuipradzé ãma ꞌre atsima ĩrobdzanhamri wẽ aba wamhã, atsina aimrodzé waꞌwa hã te dza ꞌre höimana wẽ. Robꞌuipradzé ĩré wamhã, rotsaꞌrata aba tõ ãne: “ãhã ĩ̱te hã robꞌuipradzé”, niwamhã “ate hã robꞌuipradzé”. Ãne rotsaꞌrata aba: “wate hã robꞌuipradzé”. — 1 Timóteo 5:8.

TAHA DA ATSIPTETE:

• Atsiré pitsutu aba e niha uburé hã robꞌuipradzém na dza ĩꞌuprotsidzém na hã, aimro ma apö watsuꞌu tõ da.

• Atsimipari aba tõ atsima robdzanhamri aba da robꞌuipradzém na roꞌwaꞌrutu atsô watobro aba pariptsi.