Ãma aiwata dzaꞌra waꞌaba Jeová ãma ate família norĩ me

Ãhã ĩtsõrédzém na hã ma tô ĩwaihu Bíblia nhimirowahudu ahö na dza te te ĩꞌaipawaptob dzaꞌra waꞌaba na hã ate família norĩ me hã. Tô tsena Jeová te tsima wẽ atsima rowẽ da. Õ hã ma tô ropitsutu, õhõ ãma tsi ĩꞌaiwata mono na hã ĩmorĩꞌrata na aihöimanadzéb ꞌremhã, “uburé marĩ norĩ hã te dza aima tsõmri dzaꞌra waꞌaba ni”. (Mateus 6:33 TNM) Höimanaꞌuꞌö te tsima wẽ petse ãma atsiwaihuꞌu da hã. Tawamhã, tsiptete Jeová ãma atsiwaihuꞌudzé tsaꞌẽtẽ da. Tahã danhibdzari hã uburé aꞌuwẽ norĩ ma danhipai u ĩpire hã. — Mateus 22:37, 38.

1 TSIPTETE ATSIMIDZADZE JEOVÁ ÃMA

BÍBLIA DZARINA: ‘Wa dza duré Aimama dzaꞌra waꞌaba na hã aima ꞌre ĩ̱höimana ꞌwa. Tawamhã ĩ̱ꞌra te dza duré oto ĩ̱ma ꞌre aihöimana dzaꞌra waꞌaba mo.’ (2 Coríntios 6:18) Höimanaꞌuꞌö te tsima wẽ ãma atsiwaihuꞌudzé hã tsiptete uꞌötsi na ꞌre höimana mono da. Taha da rowaptẽrẽ hã te dza aipawapto tsiptete da. Taha wa, Jeová te atsô hö õhõ ma ‘ꞌre aimreme uꞌötsi’ mono da. (1 Tessalonicenses 5:17) Õ hã te tsima wẽ petse aihötöꞌödzé hã duré atsimirotsaꞌrata ꞌröwi aipẽꞌẽ na te te waihuꞌu da. (Filipenses 4:6) Rowaptẽrẽ wamhã aimro me aiꞌra norĩ me hã, õ norĩ hã te dza ꞌmadöꞌö dzaꞌra aima hã Höimanaꞌuꞌö ĩꞌuptabi na hã.

Höimanaꞌuꞌö wi te dza ĩrowaptẽ, duré ĩwapari da tsi Höimanaꞌuꞌö mreme hã. Taha da romnhoré petse Bíblia na, duré ĩhöiwarobo norĩ, duré ĩtsõrẽdzé norĩ Bíblia dzarina. (Salmo 1:1, 2) Rotsaꞌrata petse marĩ norĩ hã ĩwaihuꞌu da hã. (Salmo 119:15, 97) Duré Höimanaꞌuꞌö wapari da, natsi ĩꞌmadöꞌö da tsi Datsiꞌrãꞌõno Jeová Watsuꞌuꞌwa norĩ te. — Salmo 122:1-4.

Jeová ãma dama ĩrowahudu hã aima ĩpire hã tsiptete da ãma atsiwaihuꞌudzé Jeová ãma. Höimanaꞌuꞌö na dama rowahutu wamhã, Höimanaꞌuꞌö tẽme te dza aiwi. — Mateus 28:19, 20.

TAHA DA ATSIPTETE:

• Tsõré na Bíblia duré rowaptẽrẽ bötö bö.

• ꞌRe ato dzaꞌra waꞌaba mo ate família norĩ me. Tadzahã tahã nhipai u ꞌre atsimipari dzaꞌra waꞌaba atsimidzadzedzéb dzô.

2 TSIMITSUTU ROMNHORÉ DZAꞌRA WAꞌABA BÍBLIA NA

BÍBLIA DZARINA: ‘Wamama u atsimirotsaꞌrata na ꞌre aihutu aba mono. Tawamhã õ hã te dza duré ꞌröwi atẽme ꞌre tsimatsitsi ꞌwa.’ (Tiago 4:8) Bödö atsima pitsutu romhuri tsidöpötsi, ãma aiwata dzaꞌra waꞌaba da Jeová ate família norĩ me hã, duré wapari atsimirowaꞌõtõdzé apö. (Gênesis 18:19) Tadzahã taha tsi õ di, natsi aimreme uꞌötsi Höimanaꞌuꞌö ãma “ꞌri ꞌre atsãmra wamhã, duré bödödi na aimorĩ wamhã, duré anomro wamhã, duré aiꞌutu wamhã”, ãne hã te dza ĩtsiptete ate família norĩ tsiwaihuꞌudzé Höimanaꞌuꞌö ãma. (Deuteronômio 6:6, 7 TNM) Atsima rowẽ na ꞌre aihöimana mono da Josué ne, te te ĩnharĩ hã ãne: ‘Wa dza tô wa norĩ hã wanhorõwa ꞌre, ꞌre ĩwahöimana dzaꞌra mono norĩ hã Uburé Danhibꞌapito ãmap tsi hã ꞌre wanomro.’ — Josué 24:15.

TAHA DA ATSIPTETE:

• Rowaꞌõtõ romnhorédzé Bíblia na romhuri tsidöpötsi dahöiba mono bö atsõrõwa ꞌre pawaptob dzaꞌra da.