ROMNHORÉ 10
E niha Jeová Watsuꞌuꞌwa norĩ tsiꞌrãꞌõno te dza aipawapto.
E ma tô nimahã na aimo Jeová Watsuꞌuꞌwa norĩ tsiꞌrãꞌõtõdzéb u. E dzahadu. Tawamhã, ãté aihötöꞌö di watsiré atsiꞌrãꞌõtõ dzaꞌra da. Ãté ꞌröwi te ĩrotsaꞌra: “E marĩ te tihöiba ta norĩ datsiꞌrãꞌõtõ ꞌremhã. E marĩ wa, tãma ĩpire dzaꞌra. E marĩ wa, ĩ̱morĩ da tsi.” Ãhã romnhoré na hã te dza ĩwaihu e niha datsiꞌrãꞌõtõ norĩ te dza aipawaptob dzaꞌra aihöimanadzém na hã duré Ropotoꞌwa tẽme atsina rotété da hã.
1. E marĩ da Jeová Watsuꞌuꞌwa norĩ te tsiꞌrãꞌõtõ.
Bíblia nhihötöꞌwa te tinha: ‘Ĩ̱tsitsãnawã norĩ ma, wa dza tãma te ꞌre aiwatsuꞌu wẽ dzaꞌra. Tsiré ꞌre tsiꞌrãꞌõtõ mono ré hã, wa dza aiꞌãma ꞌre ĩ̱wata uꞌötsi, ĩtsõꞌa dzaꞌra.’ (Hebreus 2:12) Ãmemhã, ĩtsihötöꞌwa te ãma rowatsuꞌu e marĩ da datsiꞌrãꞌõtõ norĩ: Ropotoꞌwai ãma dawata da. Taha dzarina, ã bötö na hã Jeová Watsuꞌuꞌwa norĩ hã tiꞌai mono bö te natsi tsiꞌrãꞌõtõ romhuri tsidöpötsi Ropotoꞌwai ãma wata dzaꞌra da, tsõꞌre dzaꞌra da duré te te rowaptẽrẽ dzaꞌra da. Nimahã bötö norĩ na wahub ré hã te duré tsiꞌrãꞌõtõ datsina ĩꞌubumro dzaꞌẽtẽ na. Jeová Watsuꞌuꞌwa norĩ hã tsiꞌrãꞌõtõ dzei uptabi di.
2. E marĩ te dza ĩwaihu watsiꞌrãꞌõtõ ãma hã.
Wa watsiꞌrãꞌõtõ ni Ropotoꞌwai mreme na wa te romnhoré dzaꞌra da. Wa tsõré dzaꞌra ni Ropotoꞌwai mreme wa te ‘ãma dama rowatsuꞌu dzaꞌra tsina, romnhihödö da te tsadaihuꞌu wẽ dzaꞌra da.’ (Tsõré na Neemias 8:8.) Datsiꞌrãꞌõtõ na te dza ĩwaihu Jeová ãma duré ĩhöimanadzém na hã. Jeová nhimidzawidzém na aiꞌãma ꞌre romnhoré mono tsidöpötsi danhipai u te dza ĩtẽme atsina ĩroté. Te dza ĩꞌuptsibi me duré e niha õ hã te dza aipawapto rowẽ na ꞌre aihöimana mono da. — Salmo 32:8.
3. E marĩ wa, aima wẽ di dza dawaihuꞌu wamhã datsiꞌrãꞌõtõ ãma hã.
Jeová te tinha ‘watsiꞌãma hã ꞌre wapoꞌre puꞌu uꞌötsi dzaꞌra mono da, marĩ na ꞌre ĩwatsipawaptob dzaꞌra mono dzéb da na, duré taha dzarina ꞌre ĩwatsitsawi petse dzaꞌra mono dzém na wa te watsima ãma ꞌre ĩꞌuwaimrami dzaꞌra mono dzéb da na, duré marĩ wẽ na wa te watsima ãma ꞌre ĩwaꞌrãmi wẽ dzaꞌra mono dzém na da dzama . . . watsiré ꞌre ĩwatsiꞌrãꞌõtõ mono dzé hã wa te watsiwi tsadzöri ãna.’ (Hebreus 10:24, 25) Datsiꞌrãꞌõtõ na te dza ĩdanhopẽ ꞌre ĩdatsitsawi petse dzaꞌra mono hã. Tamemhã, te dza ĩwapa marĩ ĩwẽ Ropotoꞌwai mreme na da te ĩnharĩ dzaꞌra dzé hã. (Tsõré na Romanos 1:11, 12.) Atsine, datsiꞌrãꞌõtõ na te datsima wẽ dzaꞌra ni Ropotoꞌwai ãma da te waihuꞌu dzaꞌra da duré. Taha nhipai u te dza ĩdaꞌawaihu da te datsima ĩrobdze dzaꞌra hã roꞌwaꞌrutu nherẽ. Tawamhã, tô tsena aima rowẽ uptabi di dza watsiré atsiꞌrãꞌõtõ wamhã Jeová te te tsima ĩwẽ dzéb dzarina!
WAIHUꞌU DURÉ
Te dza ĩꞌuptsibi me ĩwatobrodzé Jeová Watsuꞌuꞌwa norĩ tsiꞌrãꞌõtõ ãma. Te dza ĩwaihu duré e marĩ wa, aima rowẽ di dza tsada atsiptete wamhã datsiꞌrãꞌõtõ u aimorĩ da.
4. Waihuꞌu Jeová Watsuꞌuꞌwa norĩ tsiꞌrãꞌõno
Cristo dzadawa dzamarĩꞌwa ĩmorĩꞌrata norĩ te natsi tsiꞌrãꞌõtõ Jeová ãma wata dzaꞌra da. (Romanos 16:3-5) Atsiré tsõré aba Colossenses 3:16. Taha parimhã atsima robdzanhamri aba ãhã dadzadanharĩ ãma piꞌrebamhã:
E niha Cristo dzadawa dzamarĩꞌwa norĩ te ꞌre wata dzaꞌra Jeová ãma.
à bötö na hã duré, Jeová Watsuꞌuꞌwa norĩ te natsi tsiꞌrãꞌõtõ Ropotoꞌwai ãma wata dzaꞌra da. Waihuꞌu da ĩwatobrodzé datsiꞌrãꞌõtõ ãma ꞌmadöꞌö aba ĨROPODO. Taha parimhã, ꞌmadöꞌö aba datsiꞌrãꞌõtõ podo duré atsima robdzanhamri aba ãhã dadzadanharĩ norĩ ãma piꞌrebamhã:
Ĩropoto na ma tô ĩꞌmadö ĩwatobrodzé Jeová Watsuꞌuꞌwa norĩ tsiꞌrãꞌõtõdzéb ãma. Colossenses 3:16 ꞌremhã te te ĩwatsuꞌudzém na hã, e marĩ aiwa Jeová Watsuꞌuꞌwa norĩ tsiꞌrãꞌõtõdzém na hã.
Ĩropodo niwamhã dapoto dzarina, e marĩ duré ma aima rowẽ datsiꞌrãꞌõtõ na.
Atsiré tsõré aba 2 Coríntios 9:7. Taha parimhã atsima robdzanhamri aba ãhã dadzadanharĩ ãma piꞌrebamhã:
E marĩ wa Jeová Watsuꞌuꞌwa norĩ te te dawi waptẽrẽ dzaꞌra õ di robꞌuipradzé datsiꞌrãꞌõtõ ãma.
Aima rowahutuꞌwai me, ꞌmadöꞌö wa te ĩromnhoré dzaꞌra dzé hã dza nimahã datsiꞌrãꞌõtõ na ãhã romhuri ꞌremhã.
Aima hã, e marĩ datsiꞌrãꞌõtõ ꞌremhã te dza aipawapto danhipai u niwamhã aima danhipai u wapari dze ti dza.
E ma tô ĩwaihu.
Site jw.org ãma, te dza ĩtsõpẽ bödö duré datsiꞌrãꞌõtõ nhopẽtẽdzé tiꞌai mono bö.
Watsiꞌrãꞌõtõ na ĩré hã rowahudu, datsitsanhodzé duré ĩropodo. Ĩtsãnaꞌratadzém na duré ĩꞌrãtsutudzém na ĩré hã danhoꞌre duré rowaptẽrẽ.
Nimahã datsiꞌrãꞌõtõ waꞌõtõ norĩ ãma ĩré hã dadzadanharĩ da te ĩtsadaꞌöbö dzaꞌra da hã datsima ĩwẽ dzarina.
Aihĩni rowẽ na datsihutudzé — aibö, piꞌõ, ĩhi duré aiꞌuté norĩ.
Jeová Watsuꞌuꞌwa norĩ tsiꞌrãꞌõno waꞌöbö õ di. Duré tame robꞌuipradzé wa te dawi waptẽrẽ dzaꞌra õ di.
5. Ĩwatsiwatsutu dzaꞌra da tsi datsiꞌrãꞌõtõ u watsiꞌabaꞌré da
ꞌMadöꞌö Jesus norĩ tsitsanhodzé. Wahup tsidöpötsi te aiꞌabaꞌré, timama me, tina me duré titsitsãnawã norĩ me Nazaré hawi ãma dawatadzéb u Jerusalém ãma. Datsiꞌabaꞌrédzé hã wapu õ di. Te aiꞌabaꞌré nimahã 100 quilômetro, niwamhã tsiꞌubdatõ bötö ré, ẽtẽ ꞌrãihö baba. Atsiré tsõré aba Lucas 2:39-42. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E ĩtsiwatsutu dzaꞌra da tsi Jerusalém u tsiꞌabaꞌré da.
E marĩ norĩ ãté te dza aiwi roꞌwaꞌré datsiꞌrãꞌõno ꞌmadöꞌö da. E niha te dza ãma ĩꞌaiꞌuté dzaꞌra.
E aima rowẽ di dza ãne ꞌmanharĩ wamhã. E marĩ wa, ãne te ĩrotsaꞌra.
Ropotoꞌwai mreme te tinha datsiré datsiꞌrãꞌõno ĩpire uptabi na hã Jeová ãma dawatadzéb da. Atsiré tsõré aba Hebreus 10:24, 25. Taha parimhã atsima robdzanhamri aba ãhã dadzadanharĩ ãma piꞌrebamhã:
E marĩ wa, natsi ĩwatsiꞌabaꞌré da tsi datsiꞌrãꞌõtõ u.
NIꞌWAM NORĨ TE NHARĨ DZAꞌRA ÃNE: “Marĩ õ di datsiré atsiꞌrãꞌõtõ õ wamhã Ropotoꞌwai ãma aiwata da. Ĩmreme atsiwaprotsi tsõré nherẽ, wẽ di oto.”
E ma hã romnhihödö Ropotoꞌwai mreme na te dza dama ĩhöiꞌré dama waihuꞌu da Jeová nhimirotsaꞌrada taha na.
ĨWAIHUꞌUDZÉ HÃ
Datsiꞌrãꞌõtõ u aimorĩ wamhã te dza ĩwaihuꞌu pe Jeová ãma, duré ãma atsiwaihuꞌudzé te dza tinhiptete. Taha nhipai u, datsiꞌrãꞌõtõ ãma te dza datsiré aiwa Ropotoꞌwai ãma.
Ãma aipoꞌre puꞌu
E marĩ wa, Jeová te tsima wẽ datsiré watsiꞌrãꞌõtõ dzaꞌra da.
E marĩ te dza ĩwaihu Jeová Watsuꞌuꞌwa norĩ tsiꞌrãꞌõtõdzéb ãma.
E marĩ na duré datsiꞌrãꞌõtõ norĩ te dza aipawaptob dzaꞌra.
TSÔ AIRĨTĨ DURÉ
E aihötöꞌö di datsiꞌrãꞌõtõ u aimorĩ da. Tahã ma watobro aibö dzô. Uptsibi me na e niha datsiꞌrãꞌõno ma tãma rowẽ ãne te te rotsaꞌrata nherẽ.
Wa tô ãma watobꞌudzu ni niha na te te ĩwadzawi dzaꞌra dzém na hã (4:16)
ꞌMadöꞌö e marĩ wa ĩhöibaté ma tãma rowẽ datsiꞌrãꞌõno duré te te ĩꞌmanharĩdzé niwa te te tsimini tõ da.
Uptsibi me na danhimirotsaꞌrada datsiꞌrãꞌõtõ ãma.
“E marĩ wa, wẽ di Jeová Watsuꞌuꞌwa norĩ tsiꞌrãꞌõtõdzéb u dane.” (Ĩtsihötödzé jw.org na)
Waihuꞌu aibö aré ĩtsimihödze duré ĩwatsété norĩ me ꞌre ĩmorĩ. ꞌMadöꞌö e niha ma ãma tsaprĩ tihöimanadzém na Jeová Watsuꞌuꞌwa norĩ tsiꞌrãꞌõtõ u morĩ parimhã.
“Niwa ĩ̱watobro õ di ĩ̱nhimnhiꞌãtsi ãna” (Roꞌmadöꞌöꞌwa, 1º julho na 2014 na)