ROMNHORÉ 18
E niha wa dza waihuꞌu dzaꞌra ni Cristo dzadawa dzamarĩꞌwa norĩ ĩꞌuptabi hã.
Tiꞌai mono bö daꞌahö uptabi na te tatsiwatsuꞌu dzaꞌra ni Cristo dzadawa dzamarĩꞌwa na. Tane nherẽ tô rowahutu na da te tsadze dzaꞌra õ di duré tô roti da te tsamarĩ wẽ dzaꞌra õ di. Taha wamhã, e niha wa dza waihuꞌu dzaꞌra ni Cristo dzadawa dzamarĩꞌwa norĩ ĩꞌuptabi hã.
1. E niha Cristo dzadawa dzamarĩꞌwa ĩꞌuptabi.
Cristo dzadawa dzamarĩꞌwa ĩꞌuptabi niꞌwa Jesus Cristo nebdzéb dzarina ꞌre ĩnomro mono. (Tsõré na Atos 11:26.) E niha niꞌwa te dza tsihöiꞌré Cristo dzadawa dzamarĩꞌwa ĩꞌuptabi na hã. Jesus tsiꞌuihö na te tinha: ‘Atsiptete tsina ĩ̱nhimiroti na ꞌre aihöimana dzaꞌra waꞌaba mono wamhã, ĩ̱dzadze uptabi ꞌwa te dza anomro aba mo.’ (João 8:31) Taha dzarina, Cristo dzadawa dzamarĩꞌwa norĩ ĩꞌuptabi Jesus nhimirowahudu te te ꞌre ĩtsadawa dzamarĩ dzaꞌra mono da tsi. Jesus Ropotoꞌwai mreme dzarina ma tô te te ꞌre rowahutu duré ma tô ꞌre höimana. Ãne duré Cristo dzadawa dzamarĩꞌwa norĩ ĩꞌuptabi Ropotoꞌwai mreme dzarina te ꞌre höimana dzaꞌra. — Tsõré na Lucas 24:27.
2. E niha Cristo dzadawa dzamarĩꞌwa norĩ ĩꞌuptabi ꞌre ĩtsitsawi petse dzaꞌra mono dzé hã te höiꞌré dzaꞌra.
Jesus tidzadawa dzamarĩꞌwa norĩ ma, ma tô roti: ‘Maꞌãpé, ꞌre atsitsawi petse dzaꞌra waꞌaba mono, te ꞌre ĩꞌaiꞌadzawi petse aba mono ne.’ (João 15:12) E niha Cristo ma tô te te ꞌre tsawi tidzadawa dzamarĩꞌwa norĩ hã. Õ hã te natsi ĩtsiré tihöimana dzaꞌra te te pawaptob dzaꞌra da duré te te tsiptete dzaꞌra da. Taha nhipai u Jesus ma tô tsada tidöꞌö dzaꞌra. (1 João 3:16) Jesus ne hã, ĩtsadawa dzamarĩꞌwa norĩ ĩꞌuptabi damreme na tsi ꞌre tsitsawi wapti dzaꞌra õ di. Te te ĩnharĩ dzaꞌra dzém na duré te te ĩꞌmanharĩ dzaꞌra dzém na te höiꞌré dzaꞌra ꞌre ĩtsitsawi uptabi dzaꞌra mono na hã.
3. E mahã Cristo dzadawa dzamarĩꞌwa norĩ ĩꞌuptabi nhimiromhuri danhipai u ĩpire hã.
Jesus ma tô tiꞌru tidzadawa dzamarĩꞌwa norĩ ma marĩ ĩpire uptabi na te te romhuri dzaꞌra da. ‘Ma tô datẽme tsatõrĩ dzaꞌra te te dama watsuꞌu dzaꞌra mono da’ Ropotoꞌwa nhimirobꞌrudzé watsuꞌu na. (Lucas 9:2) Cristo dzadawa dzamarĩꞌwa ĩmorĩꞌrata norĩ te te dama roꞌmahörö dzaꞌra õ di rowahutudzéb ãma tsi. Te natsi duré dama roꞌmahörö dzaꞌra tsiwaꞌru da te ꞌre ĩꞌubumroi mono dzém ãma duré danhorõwa mono bö. (Tsõré na Atos 5:42; 17:17.) Ã bötö na hã Cristo dzadawa dzamarĩꞌwa norĩ ĩꞌuptabi te te duré dama ꞌre roꞌmahörö dzaꞌra Ropotoꞌwai mreme nhimirowahutu uptabi norĩ na tsiwaꞌru ꞌre ĩdahöimana dzaꞌra mono dzéb ãma hã. Dadzawi te, robdzei uptabi na te te ꞌre uprotsi dzaꞌra tinhibödö duré tinhiptetedzé te te dama rowahutu dzaꞌra da Ropotoꞌwai mreme nhimirowahudu danhimiparidzém na duré dapẽꞌẽ hiridzém na. — Marcos 12:31.
WAIHUꞌU DURÉ
Te dza ĩwaihu, e marĩ wa Cristo dzadawa dzamarĩꞌwa norĩ ĩꞌuptabi aiwab õ di Cristo tsitsanhodzé duré ĩtsimirowahutu dzarina ꞌre ĩhöimana dzaꞌra mono õ norĩ ne.
4. Te tsô tirĩtĩ dzaꞌra Ropotoꞌwai mreme nhimirowahutu uptabi dzô
Cristo dzadawa dzamarĩꞌwa ĩmorĩꞌrata norĩ te te ꞌre tsadawa dzamarĩ dzaꞌra Ropotoꞌwai mreme nhimirowahudu
Niꞌwam norĩ Cristo dzadawa dzamarĩꞌwa na ĩtsiwatsuꞌu dzaꞌra norĩ tsô ꞌre rĩtĩ dzaꞌra mono õ di Bíblia nhimirowahutu uptabi dzô. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã:
E niha danhibꞌihöꞌa norĩ rowahutudzéb ꞌremhã, ma tô dawi roꞌwaꞌrutu dzaꞌra Jesus nhimirowahudu da te waihuꞌu dzaꞌra tõ da.
Jesus ma tô rowahutu Ropotoꞌwai mreme nhimirowahutu uptabi na. Atsiré tsõré aba João 18:37. Taha parimhã atsima robdzanhamri aba ãhã dadzadanharĩ ãma piꞌrebamhã:
Jesus te te ĩnharĩdzéb dzarina e niha wa dza waihuꞌu dzaꞌra ni, e ꞌwam norĩ Cristo dzadawa dzamarĩꞌwa norĩ ‘tô tsena Ropotoꞌwa nhimiroti niwĩ ꞌre ĩhöimana dzaꞌra mono norĩ hã’.
5. Te dama rowahutu dzaꞌra Ropotoꞌwai mreme nhimirowahutu uptabi hã
Cristo dzadawa dzamarĩꞌwa ĩmorĩꞌrata norĩ te te dama ꞌre roꞌmahörö dzaꞌra
Höiwa u apö tsaiꞌuri wana ré Jesus ma tô pitsutu tidzadawa dzamarĩꞌwa norĩ ma romhuri ĩpire uptabi, ã bötö na hã dzahadu ꞌre ĩhöimana dzaꞌra mono hã. Atsiré tsõré aba Mateus 28:19, 20 duré Atos 1:8. Taha parimhã atsima robdzanhamri aba ãhã dadzadanharĩ ãma piꞌrebamhã:
E mame roꞌmahörö wẽ norĩ na te da te dama ꞌre roꞌmahörö dzaꞌra. E momo dama roꞌmahörö te dza tiꞌrãtsutu.
6. Ĩtsimirowahutu dzarina te ꞌre höimana dzaꞌra
E niha Tom ma tô tsima waihuꞌu Cristo dzadawa dzamarĩꞌwa norĩ ĩꞌuptabi te te ĩtsõpẽtẽ na hã. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ norĩ ãma piꞌrebamhã.
E marĩ wa, Tom ma tô tiwaꞌa danhimidzadze norĩ ãma.
E marĩ dzarina Tom ma tô tsima waihuꞌu Cristo dzadawa dzamarĩꞌwa norĩ ĩꞌuptabi te te ĩtsõpẽtẽ na hã.
Niꞌwa Cristo dzadawa dzamarĩꞌwa taré tsiwatsuꞌu da nherẽ tahã marĩ dai õ di. Ĩhöimanadzém na dzama te te ĩhöiꞌré da tsi. Atsiré tsõré aba Mateus 7:21. Taha parimhã atsima robdzanhamri aba ãhã dadzadanharĩ ãma piꞌrebamhã:
E marĩ danhipai u ĩpire Jesus ma: e wanhimidzadze na watsiwatsuꞌu dzaꞌra wamhã, e wanhimidzadze wa te höiꞌré dzaꞌra wamhã wa te ĩꞌmanharĩ dzaꞌra dzém na.
7. Te ꞌre tsitsawi uptabi dzaꞌra
Cristo dzadawa dzamarĩꞌwa ĩmorĩꞌrata norĩ te ꞌre tsitsawi uptabi dzaꞌra
Cristo dzadawa dzamarĩꞌwa norĩ ĩꞌuptabi, e tô tsena titsitsãnawã norĩ ma tô pawaptob dzaꞌra döꞌö dzaꞌra da nherẽ. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
Ĩropoto dzarina, e marĩ ma tô rétsi Lloyd te te tsõꞌreptu da titsitsãnawã Johansson döꞌö da nherẽ.
Aima hã, e Lloyd ma tô tsihöiꞌré Cristo dzadawa dzamarĩꞌwa ĩꞌuptabi na.
Atsiré tsõré aba João 13:34, 35. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E niha Jesus dzadawa dzamarĩꞌwa norĩ ĩꞌuptabi te dama ꞌre höimana dzaꞌra dapoto aimawi niwamhã daro aimawi ꞌre ĩdahöimana dzaꞌra mono norĩ ma.
Ãma rotsaꞌrata datsiꞌwapé ĩwatobro na. E niha Jesus dzadawa dzamarĩꞌwa norĩ ĩꞌuptabi te dza höiꞌré dzaꞌra ꞌre ĩtsitsawi petse dzaꞌra mono na hã.
NIꞌWAM NORĨ TE NHARĨ DZAꞌRA ÃNE: “Marĩ õ di atsimidzadzedzé. Dama ꞌre atsõpru mono wamhã Jesus ne wẽ di dza.”
E mahã Ropotoꞌwai mreme nhihödö te aré ĩhöiꞌré ãma rowatsuꞌu da niha wa te ĩwaihuꞌu dzaꞌra dzém na hã Cristo dzadawa dzamarĩꞌwa norĩ ĩꞌuptabi ãma.
ĨWAIHUꞌUDZÉ HÃ
Cristo dzadawa dzamarĩꞌwa norĩ ĩꞌuptabi te te ꞌre tsadawa dzamarĩ dzaꞌra Ropotoꞌwai mreme nhimirowahudu, te ꞌre tsitsawi uptabi dzaꞌra duré te te dama ꞌre roꞌmahörö dzaꞌra Ropotoꞌwai mreme nhimiroꞌmahörö wẽ na.
Ãma aipoꞌre puꞌu
E marĩ dzarina Cristo dzadawa dzamarĩꞌwa norĩ ĩꞌuptabi te ꞌre höimana dzaꞌra.
E marĩ dzarina Cristo dzadawa dzamarĩꞌwa norĩ ĩꞌuptabi te dza da te ꞌre tsaꞌretse dzaꞌra.
E marĩ ĩpire uptabi na Cristo dzadawa dzamarĩꞌwa norĩ ĩꞌuptabi te romhuri dzaꞌra.
TSÔ AIRĨTĨ DURÉ
Waihuꞌu duré niꞌwam norĩ tsada ꞌre ĩtsiptete dzaꞌra mono hã Jesus Cristo tsitsanhodzé duré ĩtsimirowahudu te te tsadawa dzamarĩ dzaꞌra da.
ꞌMadöꞌö piꞌõ, ĩhöꞌa tsipiꞌõ nhimiromhuri te te ĩrẽme watsuꞌu duré e niha nimahã bötö pari ma tô tsõpẽtẽ “datsitsãnawã uptabi norĩ danhimidzadzedzém na”.
ꞌMadöꞌö, e niha Cristo dzadawa dzamarĩꞌwa norĩ ĩꞌuptabi te höiꞌré dzaꞌra ĩtsitsãnawã norĩ te te ꞌre ĩtsawi petse dzaꞌra mono na hã ropipa watobro wamhã.
Watsitsanawã norĩ pawaptobdzé ropipa ĩtsaꞌẽne ĩwatobrodzéb ãma hã — Ĩwaꞌõno (3:57)
Tsõré na, e niha Cristo dzadawa dzamarĩꞌwa norĩ ĩꞌuptabi ã bötö na hã te ꞌre höimana dzaꞌra Cristo dzadawa dzamarĩꞌwa ĩmorĩꞌrata norĩ ne Jesus nhimirowahutu dzadawa dzamarĩ tsina.