ROMNHORÉ 30
Aima ĩtsawi petse norĩ ĩdöꞌö dzaꞌra te dza apö tihöiwaꞌutu dzaꞌra!
Tô tsena tsé di niꞌwa döꞌö wamhã. Taha wa, Ropotoꞌwai mreme te tinha dadöꞌödzé hã dadzada ꞌre ĩhöimana mono na hã danhitobꞌru ne hã. (1 Coríntios 15:26) Romnhoré 27 ãma, ma tô ĩwaihu Jeová dza te te ĩꞌuprotsi na hã ãhã wanhitobꞌru. E marĩ bété te dza watobro ĩdadöꞌö dzaꞌra norĩ dzô. Ãhã romnhoré ꞌremhã te dza ĩwaihu Jeová nhimiropitsutu wẽ ĩhöiba amoi ãma. Õ hã te dza daꞌahöiwaꞌutu daꞌahö uptabi na õne uꞌö ꞌre dahöimana dzaꞌra mono da. E tahã tô tsena te dza watobro. E mame te dza ꞌre dahöimana dzaꞌra dahöiwaꞌutu dzaꞌra parimhã. E höiwa u e Tiꞌai ãma.
1. E marĩ Jeová te tsima wẽ te te ꞌmanharĩ da wama ĩtsawi petse dzaꞌra norĩ ĩdöꞌö dzaꞌra ma hã.
Jeová te tsima wẽ petse te te höiwaꞌutu da ĩdöꞌö dzaꞌra hã. Duréihã aibö Jó na ĩtsitsi ma tô umnhatsi Ropotoꞌwa dza ãma ĩpoꞌre tsiꞌöri õ na hã döꞌö parimhã. Õ hã te tinha Ropotoꞌwai ma hã: “A hã te dza ĩ̱ꞌmahö duré wa dza atsadaꞌö [Abꞌre hawi].” — Tsõré na Jó 14:13-15 TNM.
2. E marĩ dzarina wama waihuꞌu petse dzaꞌra di adöꞌö norĩ hã dza apö ĩhöiwaꞌutu dzaꞌra na hã.
Jesus Tiꞌai ãma ꞌre morĩ ré Ropotoꞌwa ma tô tãma titsõ ĩtsiptede hã te te dahöiwaꞌutu da. Taha uꞌöbö Jesus ma tô höiwaꞌutu baꞌõno 12 ãma ĩwahu duré piꞌõ ĩmrotõ ꞌra hã. (Marcos 5:41, 42; Lucas 7:12-15) Titsiwaihu Lázaro döꞌö parimhã Jesus ma tô höiwaꞌutu maparane tsiꞌuiwana bödö ãma morĩ nherẽ abꞌre ꞌre nomro mono ré. Jesus ma tô rowaptẽ Ropotoꞌwai wi duré mreme ꞌrãihö na te tinha: ‘Lázaro, rob u we aiwatobro.’ Tawamhã ‘ĩdö hã rob u ma tô watobro.’ Aibö ma tô ꞌre höimana apö! (João 11:43, 44) Ãma rotsaꞌrata e niha ĩrobdzei uptabi Lázaro tsiwaihuꞌu norĩ ma duré ĩhidiba norĩ ma!
3. Aima ĩtsawi petse norĩ e te dza apö tihöiwaꞌutu dzaꞌra.
Ropotoꞌwai mreme te ropitsutu ‘dahöiwaꞌutudzé’ dza ĩhöimana na hã. (Atos 24:14, 15) Jesus nhimihöiwaꞌutu norĩ höiwa u tsiꞌabaꞌréi õ di. (João 3:13) Jesus ma tô höiwaꞌutu dzaꞌra ãme Tiꞌai ãma ꞌre höimana dzaꞌra mono da duré tãma rowẽ dzaꞌra di taha na. Ãne duré romhutu na Jesus te dza daꞌahöiwaꞌutu daꞌahö uptabi na, õne uꞌö ꞌre dahöimana dzaꞌra mono da Ro ĩwẽ ãma Tiꞌai ꞌre. Õ hã te tinha aihĩni Ropotoꞌwa tsitsaꞌratadzéb ꞌremhã ĩhöimana dzaꞌra norĩ hã dza apö ĩhöiwaꞌutu dzaꞌra na hã, ta norĩ ãma oto datsipoꞌre puꞌu waihuꞌu dzaꞌra õ nherẽ. — João 5:28, 29.
WAIHUꞌU DURÉ
Te dza ĩꞌmadö e niha Ropotoꞌwai mreme te wama uptabi dzaꞌra ĩdöꞌö norĩ ĩhöiwaꞌutu waihuꞌu petse dzaꞌra na hã duré tahã dza tô ĩwatobro na hã. Te dza ĩwaihu duré e niha ropitsudu hã dahöiwaꞌutudzém na te dza aima rowẽ wadze.
4. Jesus ma tô höiꞌré te te ĩdaꞌahöiwaꞌutu waihuꞌu petse na hã
Waihuꞌu petse Jesus te te ĩꞌmanharĩdzém na hã titsiwaihuꞌu ma Lázaro ma. Atsiré tsõré aba João 11:14, 38-44. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E marĩ dzarina wama waihuꞌu petse dzaꞌra di Lázaro tô tsena ĩdöꞌö na hã. — ꞌMadöꞌö aba ĩtsihötö ꞌrare 39.
Jesus ma tô höiwaꞌutu Lázaro Tiꞌai ãma apö ꞌre höimana mono da. Lázaro höiwa u morĩ ꞌwaꞌöhã döꞌö parimhã e Jesus te aré höiwaꞌutu Tiꞌai ãma apö ꞌre höimana mono da.
5. Daꞌahö na te dza apö ꞌre dahöiwaꞌutu dzaꞌra!
Atsiré tsõré aba Provérbios 2:21. Taha parimhã atsima robdzanhamri aba ãhã dadzadanharĩ ãma piꞌrebamhã:
Daꞌahö uptabi na te dza apö ꞌre dahöiwaꞌutu dzaꞌra. E mame te dza ꞌre dahöimana dzaꞌra.
Jesus te te höiwaꞌutu õ di dza Jeová ãma ĩwata dzaꞌra norĩ tsi. Te dza duré ahöiwaꞌutu ĩhöiba amo norĩ. Atsiré tsõré aba Atos 24:14, 15. Taha parimhã atsima robdzanhamri aba ãhã dadzadanharĩ ãma piꞌrebamhã:
Dahöiwaꞌutudzé watobro wamhã e ꞌwa te atsima ĩwẽ pe apö tsõpẽtẽ da.
Damama tiꞌra te te ĩꞌutu wapu ne hã Jesus te te höiwaꞌutu wapu di adöꞌö norĩ hã.
6. Ropitsudu hã dahöiwaꞌutudzém na te dza aima rowẽ wadze
Jairo ꞌra tsipiꞌõ höiwaꞌutudzé watsuꞌu te te ꞌre rowẽ wadzere ĩtsiwaꞌõ dzaꞌra norĩ ma tãma ĩtsawi petse dzaꞌra norĩ dzô döꞌödzéb ãma. Atsiré tsõré aba ãhã rowatsuꞌu uptabi Lucas 8:40-42, 49-56 ãma.
Jesus hã Jairo ꞌra te te höiwaꞌutu wana ré, õ hã te tãma tinha Jairo ma hã: ‘Aipahi tõ. Maꞌãpé atsina ĩ̱ꞌumnhatsi.’ (ꞌMadöꞌö aba ĩtsihötö ꞌrare 50.) E niha ropitsudu hã dahöiwaꞌutudzém na te dza aipawapto . . .
niꞌwa aima ĩtsawi pe aiwi tsiꞌutõrĩ wamhã.
a hã atöꞌö da wamhã.
ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã:
E niha ropitsudu hã dahöiwaꞌutudzém na ma tô pẽꞌẽ nomri dzahuré duré ma tô tsibꞌru dzahuré Phelicity mama hã duré ĩna hã.
NIꞌWAM NORĨ TE NHARĨ DZAꞌRA ÃNE: “Wadöꞌö dzaꞌra waptsi wa dza apö tsõpẽtẽ dzaꞌra ni wama ĩtsawi petse dzaꞌra norĩ ĩdöꞌö dzaꞌra höiwa u.”
E niha te ãma ĩrotsaꞌra.
E ma hã romnhihödö te dza ĩhöiꞌré niꞌwai ma ãma rowatsuꞌu da dahöiwaꞌutudzé dza tô ĩwatobro na hã Tiꞌai ãma.
ĨWAIHUꞌUDZÉ HÃ
Ropotoꞌwai mreme te ropitsutu adöꞌö norĩ ahö na dza apö ĩhöiwaꞌutu dzaꞌra na hã. Jeová te tsima wẽ petse apö ꞌre höimana dzaꞌra mono da, taha wa ĩtsiptede ma tô titsõ Jesus ma te te dahöiwaꞌutu da.
Ãma aipoꞌre puꞌu
E marĩ Jeová duré Jesus robdze na te dza ꞌmanharĩ dzahuré ĩdöꞌö dzaꞌra norĩ ma hã.
E mame ĩhöiwaꞌutu dzaꞌra norĩ ahö uptabi na te dza ꞌre höimana dzaꞌra. E marĩ wa, ãne te ĩrotsaꞌra.
E te ãma atsimidzadze aima ĩtsawi petse norĩ dza apö ĩhöiwaꞌutu dzaꞌra na hã. E marĩ wa.
TSÔ AIRĨTĨ DURÉ
ꞌMadöꞌö e niha te dza ĩꞌwapé robdzé hã niꞌwa aima ĩtsawi petse dzô aiwi maꞌwanhiꞌriti wa.
E Ropotoꞌwai mreme te te dapawapto waihuꞌu petse di niꞌwa dama ĩtsawi petse dzô dawi maꞌwanhiꞌriti wamhã.
E niha te dza ĩꞌwapé robdzé niꞌwa aima ĩtsawi petse dzô aiwi maꞌwanhiꞌriti wamhã. (5:06)
E niha te dza ĩpawapto aiꞌuté te te ꞌwapé da robdzé hã niꞌwa tãma ĩtsawi pe döꞌö wamhã.
E niꞌwa te dza höiwaꞌudu höiwa ãma ꞌre höimana mono da. E ꞌwam norĩ höiwaꞌutu dzaꞌra õ di dza.