Damama, dana duré daꞌra norĩ, e niha tsimitsutu te dza atsima ĩrowẽ dzaꞌra waꞌwa. — Ĩwaꞌõno 2

Daꞌra norĩ Jeová nhibdzari. Õ hã, te tsima wẽ damama duré dana norĩ te te ꞌmadöꞌö wẽ dzaꞌra da ãhã danhibdzari. Jeová nhimiroti wẽ norĩ te pawaptob dzaꞌra damama duré dana norĩ ãne te te ꞌmanharĩ dzaꞌra da. Duré Ropotoꞌwa nhimiroti norĩ te höiꞌré dzaꞌra daꞌra norĩ ma te te ĩꞌmanharĩ dzaꞌra dzéb da hã damama duré dana norĩ me te te tsima ꞌre rowẽ dzaꞌra mono da.

1. E marĩ na Jeová te roti damama duré dana norĩ ma.

Jeová te tsima wẽ damama duré dana norĩ tiꞌra norĩ te te tsawi dzaꞌra da duré natsi tsiꞌubumroi uꞌötsi da ĩtsiré dzaꞌra. Te tsima wẽ duré damama dana norĩ me tiꞌra norĩ ꞌwawi ꞌre tsimapa dzaꞌra mono da duré ĩmreme nhimirowahutu dzarina te te ꞌre prédub dzaꞌra mono da. (Provérbios 1:8) Jeová te tinha damama norĩ ma: ‘Te dza atsimiroti wẽ na si ꞌre ĩpawapto wẽ dzaꞌra waꞌaba mo, Wanhibꞌapito nhimiroti dzarina, aiꞌra norĩ waꞌwa hã.’ (Tsõré na Efésios 6:4.) Jeová ma robdze ti damama duré dana norĩ tsiꞌuihö na ãhã roti te te tsadawa dzamarĩ dzaꞌra wamhã ãhã romhuri ĩhöiba amo norĩ ma te te pitsutu dzaꞌra da nherẽ.

2. E marĩ na Jeová te roti daꞌra norĩ ma.

Jeová te tinha daꞌra norĩ ma: ‘Aimama nhimiroti te dza ꞌre ĩwapari petse dzaꞌra waꞌaba mo, ana nhimiroti dzama.’ (Tsõré na Colossenses 3:20.) Daꞌra norĩ, timama duré tina te te wapari dzaꞌra wamhã duré te te wadzéb dzaꞌra wamhã, te dza rowẽ dzaꞌra Jeová ma. Damama duré dana norĩ ma robdze ti dza duré. (Provérbios 23:22-25) Jesus ma tô ãma atsanho wẽ taha na aiꞌuté ré. Jesus ĩhöimana upaiꞌõ. Ĩmama duré ĩna höimana upa dzahuré nherẽ, Jesus ma tô te te ꞌre tsadawa dzamarĩ dzahuré duré ma tô te te ꞌre wadzéb dzahuré. — Lucas 2:51, 52.

3. E niha damama, dana duré daꞌra norĩ te dza tsina rotété dzaꞌra Ropotoꞌwa tẽme.

A hã damama wamhã niwamhã dana wamhã, tô tsena te atsima ĩwẽ aiꞌra norĩ te te tsawi dzaꞌra da Jeová a hã ĩtsawi ne. E niha ãne te dza ãma ĩꞌuwaimra. Te dza ĩꞌmanha Ropotoꞌwai mreme te te ĩnharĩdzé: “Te dza natsi ãma ĩrowahutu uꞌö [Jeová mreme na] aiꞌra norĩ ma duré te dza ãma aimre atsõrõwa ꞌre atsãmra ré, bödödi ãma aimorĩ ré.” (Deuteronômio 6:7 TNM) Tô tsena aima waihuꞌu petse di ãma ꞌre ĩtsahu uꞌötsi mono da tsi, marĩ na aiꞌra norĩ ma ãma ꞌre tsipoꞌre puꞌu uꞌötsi dzaꞌra mono da. Tawamhã ãhã romnhihödö te ãma tinha a hã ꞌre ĩꞌatsiptete mono da tsi natsi robdzanhamri uꞌötsi da Jeová ãma aiꞌra norĩ ma. Wẽ uptabi di dza bödö pitsutu wamhã romhuri tsidöpötsi Jeová ãma ꞌre aiwata dzaꞌra waꞌaba mono da aimro me duré aiꞌra norĩ me. Aiꞌra baba nherẽ, wẽ uptabi di dza bödö pitsutu da romhuri tsidöpötsi Ropotoꞌwai mreme na romnhoré da.

WAIHUꞌU DURÉ

4. Aiꞌra norĩ prédu wẽ na atsimidzawi na

Daꞌra norĩ prédu wẽ da pire di. E niha Ropotoꞌwai mreme te dza pawapto. Atsiré tsõré aba Tiago 1:19, 20. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

• E niha damama duré dana te dza höiꞌré dzaꞌra tinhimidzawidzé tiꞌra norĩ ma te te robdzanhamri dzaꞌra wamhã.

• E marĩ wa, damama niwamhã dana niwa te te pẽtẽ õ di dza tiꞌra norĩ ma ꞌrãi waꞌro ré.a

5. Aiꞌra norĩ ꞌwawi ꞌre aimapa mono

Aiꞌra norĩ ꞌwawi aimapa da ĩpire uptabi tãma roti dzaꞌra da datsina dahöimana ãma hã, aima rowadzém nherẽ. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ norĩ ãma piꞌrebamhã.

ĨROPODO: Aiꞌra norĩ ꞌwawi aimapa na ĩwatsété wi (2:58)

• E marĩ wa, pire di niꞌwa damama duré dana norĩ ma, te te roti dzaꞌra da tiꞌra norĩ ma datsina dahöimana ãma hã.

• E niha niꞌwa damama duré dana norĩ, ma tô roti dzaꞌra datsina dahöimana ãma hã tiꞌra norĩ ma.

Ropotoꞌwai mreme te te ĩrowatsuꞌu tsirõmo dzarina Waꞌuburé nhimiroꞌmadöꞌödzé te tirowatsété mono. Atsiré tsõré aba 2 Timóteo 3:1, 13. Taha parimhã atsima robdzanhamri aba ãhã dadzadanharĩ ãma piꞌrebamhã:

• Ĩtsihötö ꞌrare 13 te watsuꞌu ĩwatsété norĩ. Wama waihuꞌu petse dzaꞌra di niꞌwam norĩ höimana nhitsébꞌõ na te te ĩrobꞌmanharĩ watsété dzaꞌra na aiꞌuté norĩ ma. Ãne na hã, e marĩ wa, ĩpire uptabi damama duré dana norĩ te te roti dzaꞌra da tiꞌra norĩ ma hã datsina dahöimana ãma hã duré te te tãma waihuꞌu dzaꞌra da tsiꞌmadöꞌö dzaꞌra da robꞌmanharĩ watsété ꞌwa ĩhöimana nhitsébꞌõ norĩ wi hã.

E ma tô ĩwaihu.

Jeová Watsuꞌuꞌwa norĩ nhimiromnhorédzé ahö di te te pawaptob da damama duré dana norĩ te te roti dzaꞌra da tiꞌra norĩ ma hã datsina dahöimana ãma hã duré te te tãma rowahutu dzaꞌra da tsiꞌmadöꞌö dzaꞌra da robꞌmanharĩ watsété ꞌwa ĩhöimana nhitsébꞌõ norĩ wi hã. ꞌMadöꞌö nimahã romnhorédzém norĩ:

• Aiꞌra norĩ ꞌwawi aimapa na (ĩropodo)

• Waihuꞌu rowahutuꞌwa ĩtsaꞌẽtẽ me, romnhoré 10 duré 32

• “E niha te dza ĩroti aiꞌra norĩ ma hã datsina dahöimana ãma hã.” (Atsimidzaꞌretse!, n.º 5 2016 na)

6. Wadzé na aimama duré ana

ĨROPODO: E niha wa dza robdzanha ĩ̱mama ma duré ĩ̱na ma. (2:19)

• E marĩ wa, wẽ di aiꞌuté duré ĩhöibatém norĩ te te natsi robdzanhamri uꞌötsi dzaꞌra wamhã timama ma duré tina ma.

• E niha aiꞌuté niwamhã ĩhöibaté te dza höiꞌré tinhimiwadzé tina ãma niwamhã timama ãma te te tãma robdzanhamri wamhã.

Atsiré tsõré aba Provérbios 1:8. Taha parimhã atsima robdzanhamri aba ãhã dadzadanharĩ ãma piꞌrebamhã:

• E marĩ aiꞌuté niwamhã ĩhöibaté te dza ꞌmanha ĩmama niwamhã ĩna marĩ te te tãma ꞌrui wamhã.

7. Damama, dana duré daꞌra norĩ Jeová ãma tsimitsutu ꞌre aiwata dzaꞌra waꞌaba mono

Damama, dana duré daꞌra Jeová Watsuꞌuꞌwa norĩ bödö te tsima pitsutu dzaꞌra Ropotoꞌwai mreme na tsiré te te romnhoré dzaꞌra da romhuri tsidöpötsi. Ãhã romnhoré nhitsi hã ãma dawatadzé família na. E niha ãhã romnhoré. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

ĨROPODO: Ãma dawatadzé família na — rowẽ ãwitsidzé pire nherẽ (8:04)

• E niha damama, dana duré daꞌra norĩ te dza tsima rowaꞌõtõ dzaꞌra ãma dawatadzé família na te te ꞌmanharĩ dzaꞌra da romhuri tsidöpötsi.

• E niha damama duré dana norĩ te dza ãma uwaimrami dzaꞌra daꞌra norĩ te te tsima robdze dzaꞌra da duré te te rowaihuꞌu dzaꞌra da ãma dawatadzém na família na. ꞌMadöꞌö aba dapodo romnhoré naꞌratadzém na.

• A hã bété, e marĩ te te aiwi roꞌwaꞌré waihuꞌu petse di dza romnhoré da ate família tsiré.

Duréihã, Jeová te tsima wẽ família norĩ Israel nhihudu norĩ ꞌremhã te te natsi tsima robdzanhamri uꞌötsi dzaꞌra da Ropotoꞌwai mreme na. Atsiré tsõré aba Deuteronômio 6:6, 7 TNM. Taha parimhã atsima robdzanhamri aba ãhã dadzadanharĩ ãma piꞌrebamhã:

• E niha a hã te dza ãma ĩtsama ãhã roti hã.

Marĩ ꞌmanharĩ da ãma dawatadzém na família na:

• Tsada romnhoré dzaꞌra waꞌaba datsiꞌrãꞌõtõ norĩ wana ré.

• Ropotoꞌwai mreme watsuꞌu, tsõré dzaꞌra waꞌaba duré taha parimhã ãma atsima robdzanhamri dzaꞌra waꞌaba.

• Aiꞌra aiꞌuté ĩré wamhã, ꞌwani na niwamhã wadzere romhuri ꞌmanharĩdzé aiꞌuté ma site jw.org hawimhã.

• Aiꞌra ĩhöibaté ĩré wamhã, tãma robdzanhamri ĩtsihötödzém na ĩhöibaté ma site jw.org hawimhã.

• ꞌManhidzutsi dzaꞌra waꞌaba Ropotoꞌwai mreme watsuꞌu aiꞌra norĩ me.

• ꞌMadöꞌö dzaꞌra waꞌaba ĩropodo site jw.org hawimhã taha parimhã ãma atsima robdzanhamri dzaꞌra waꞌaba.

ĨWAIHUꞌUDZÉ HÃ

Jeová te tsima wẽ damama duré dana norĩ tiꞌra norĩ te te tsawi dzaꞌra da, te te prédu wẽ dzaꞌra da, duré ĩꞌwawi ꞌre tsimapa dzaꞌra mono da. Te tsima wẽ duré daꞌra norĩ timama duré tina te te wapari dzaꞌra da duré te te wadzéb dzaꞌra da. Jeová te tsima wẽ duré família norĩ tsimitsutu ãma ꞌre wata dzaꞌra mono da.

Ãma aipoꞌre puꞌu

• E niha damama duré dana norĩ te dza tiꞌra norĩ prédu wẽ dzaꞌra duré ĩꞌwawi te dza ꞌre tsimapa dzaꞌra.

• E niha daꞌra norĩ te dza timama duré tina wadzéb dzaꞌra.

• E marĩ wa, wẽ di te te tsina romnhoré dzaꞌra da família tsiré ãma dawatadzém na família na romhuri tsidöpötsi.

TSÔ AIRĨTĨ DURÉ

E mahã roti norĩ te dza pawaptob dzaꞌra aiꞌra norĩ prédub dzaꞌra wab da.

“6 roti norĩ aiꞌra norĩ ma roti da” (Atsimidzaꞌretse!, n.º 2 2019 na)

ꞌMadöꞌö Ropotoꞌwai mreme nhimiroti ĩmama duré ĩna ĩhi te te ĩꞌmadöꞌö dzaꞌra norĩ ma.

“E Ropotoꞌwa te tsima wẽ wa te ꞌmadöꞌö dzaꞌra da wamama duré wana tsiꞌihi dzaꞌra wamhã.” (Ĩtsihötödzé jw.org na)

ꞌMadöꞌö te te ĩpawaptobdzé aibö tiꞌra norĩ te te prédu wẽ dzaꞌra da.

Jeová ma wapawapto waꞌra norĩ wa te prédu wẽ dzaꞌra da (5:58)

ꞌMadöꞌö e niha damama te dza tsiptete titsiwaihuꞌudzé tiꞌra ãma.

“E niha damama te dza te te tsina rotété tiꞌra tẽme.” (Roꞌmadöꞌöꞌwa, 1.° novembro na 2011 na)