E niha daꞌmadöꞌöꞌwa norĩ te höiꞌré dzaꞌra tinhimidzawidzé duré titsibadzé te te ãma ĩꞌupa dzaꞌra norĩ ãma hã.

1. E marĩ ãté te dza tsô watobro niꞌwa te te ãma ĩꞌupa ĩpipa na.

ROMNHORÉ ꞌrata na, wa ꞌmadöꞌö dzaꞌra ni e niha Paulo ma tô tãma roti dzaꞌra watsitsãnawã norĩ ubumro Corinto ãma aibö te te ãma ĩꞌupa ĩpipa na. Õ hã aibö tsiꞌruiwapari õ di, tahawa ma tô wadzere ni watsitsãnawã norĩ ubumroi hawi. Romanos 2:4 dzarina niꞌwa te te ãma upai wamhã ãté te dza tsiꞌruiwapa. (Rom. 2:4) Tadzahã e niha daꞌmadöꞌöꞌwa norĩ te dza pawapto niꞌwa tsiꞌruiwapari da.

2-3. E marĩ, wa te ĩꞌmanharĩ dzaꞌra da tsi wa te waihuꞌu dzaꞌra wamhã watsitsãnawã te te ãma ĩꞌupa ĩpipa na, duré e marĩ wa.

² Daꞌmadöꞌwa norĩ te te waihuꞌu dzaꞌra õ wamhã watsitsãnawã te te ãma ĩꞌupadzé hã ĩpipa na e tsada hã te te pawaptob dzaꞌra da. Mare di, tsadai õ di. E marĩ, wa dza ꞌmanharĩ dzaꞌra ni wa te waihuꞌu dzaꞌra wamhã watsitsãnawã te te ĩꞌupadzé ĩpipa na. Wa te tãma ĩroti dzaꞌra da tsi tsiwatsuꞌu da daꞌmadöꞌöꞌwa norĩ te te tsiwi pawaptob dzaꞌra da. — Isa. 1:18; Atos 20:28; 1 Ped. 5:2.

³ Te te tsima wẽ õ wamhã bété, e marĩ, wa dza ꞌmanharĩ dzaꞌra ni. Ãne wamhã wa norĩ hã wanhimidzawi petse na wa dza tãma watsuꞌu dzaꞌra ni daꞌmadöꞌöꞌwa norĩ ma. Ãne hã õ norĩ hã te dza pawaptob dzaꞌra. Ĩhöimanadzé te te ãma tsaprĩ õ wamhã Jeová ãma tsiwaihuꞌudzé te dza tinhibꞌuwa duré te te ĩꞌmanharĩdzé uꞌöbö ãté te dza rotsaꞌrata dzaꞌra ni watsété na Jeová ãma duré Jeová watsuꞌuꞌwai ubumroi ãma. Tawamhã wanhibꞌru na wa dza tãma watsuꞌu dzaꞌra ni daꞌmadöꞌöꞌwa norĩ ma pire nherẽ. Tahã te dza höiꞌré wanhimidzawi Jeová ãma duré watsitsãnawãi ãma. — Sal. 27:14.

E NIHA DAꞌMADÖꞌÖꞌWA NORĨ TE DZA PAWAPTOB DZAꞌRA NIꞌWA TE TE ÃMA ĨꞌUPA ĨPIPA NA.

4. E marĩ da, daꞌmadöꞌöꞌwa norĩ te dza tsiꞌrãꞌõtõ ĩꞌupaiꞌwai me.

⁴ E marĩ, daꞌmadöꞌöꞌwa norĩ te dza ꞌmanharĩ dzaꞌra niꞌwa te te ãma upai wamhã. Daꞌmadöꞌöꞌwa norĩ ubumro te dza pitsutu dzaꞌra tsiꞌubdatõ daꞌmadöꞌöꞌwa ĩꞌupaiꞌwai me tsiꞌrãꞌõtõ da. E marĩ da. Õ norĩ hã te dza tsiwatsutu dzaꞌra te te pawaptob dzaꞌra da ĩꞌupaiꞌwa hã tsiꞌruiwapari da. Tadzahã höimana wapu dzaꞌra wa tãma waihuꞌu petse dzaꞌra di te te ĩꞌrudzahi õ na hã niꞌwa te te ãma tsaprĩ da tihöimana na. (Deut. 30:19) Daꞌmadöꞌöꞌwa norĩ tãma waihuꞌu petse dzaꞌra di niꞌwam norĩ höimana dzaꞌra õ di Davi tsine tsiꞌruiwapari wamhã. (2 Sam. 12:13) Niꞌwam norĩ Jeová nhimiroti te te wapari dzaꞌra õ di dza. (Gen. 4:6-8) Taha nherẽ daꞌmadöꞌöꞌwa norĩ te tsiwatsutu dzaꞌra te te pawaptob dzaꞌra da ĩꞌupaiꞌwa tsiꞌruiwapari da. E niha daꞌmadöꞌöꞌwa norĩ te dza rotsaꞌrata dzaꞌra ĩbö na tsiꞌrãꞌõtõ wamhã ĩꞌupaiꞌwai me.

5. 2 Timóteo 2:24-26 dzarina e niha daꞌmadöꞌöꞌwa norĩ te dza tihöimana dzaꞌra ĩꞌupaiꞌwai me tsiꞌrãꞌõtõ wamhã. (ꞌMadöꞌö dapodo duré.)

⁵ Daꞌmadöꞌöꞌwa norĩ ma hã ĩꞌupaiꞌwa poneꞌẽrebö ĩwẽ ĩtsimani ne hã. (Lucas 15:4, 6) Tawamhã ĩme tsiꞌrãꞌõtõ wamhã mreme tete dzaꞌra õ di duré tãma ꞌre höimana watsété dzaꞌra õ di. Ĩme tsiꞌrãꞌõtõ wamhã te dza tsadanharĩ dzaꞌra ĩwatobrodzém na, tadzahã taha tsi õ di, te tsiwatsutu dzaꞌra ꞌre höimana dzaꞌra mono da 2 Timóteo 2:24-26 dzarina. (Tsõré na.) Tawamhã atãma na te ꞌre höimana dzaꞌra duré te tãma ꞌre höimana wẽ dzaꞌra te te pẽꞌẽ hiri dzaꞌra da.

6. E niha daꞌmadöꞌöꞌwa norĩ röwi tipẽꞌẽ na te tsitsaꞌra wẽ dzaꞌra ĩꞌupaiꞌwai me tsiꞌrãꞌõtõ wana ré. (Romanos 2:4)

⁶ Daꞌmadöꞌöꞌwa norĩ te tsitsaꞌra wẽ dzaꞌra röwi tipẽꞌẽ na. Te tsiwatsutu dzaꞌra Jeová te te tsidzutsi dzaꞌra da datsiꞌrãꞌõtõ na. Te poꞌre puꞌu dzaꞌra Paulo te te ĩnharĩ na: ‘ꞌRe ĩhöimana uꞌötsi mono hã aiwatsété wi ꞌre aipidzari dzaꞌra waꞌaba mono da tsi, te tsimiꞌẽ na te te ꞌre aiꞌmadöꞌö dzaꞌra waꞌwa, tsimidzawi petse uptabi na.’ (Tsõré na Romanos 2:4.) Daꞌmadöꞌöꞌwa norĩ tãma waihuꞌu petse dzaꞌra di õ norĩ hã poneꞌẽrebö ꞌmadöꞌöꞌwa ne hã Jesus te te ĩtsaprõni na hã. (Isa. 11:3, 4; Mat. 18:18-20) Tawamhã ĩꞌupaiꞌwai me tsiꞌrãꞌõtõ wana ré te rowaptẽrẽ dzaꞌra te te ãma rotsaꞌrata petse dzaꞌra da, e niha te dza pawaptob dzaꞌra ĩꞌupaiꞌwa hã tsiꞌruiwapari da. Te romnhoré petse dzaꞌra Bíblia na, duré ĩhöiwarobo norĩ na te te waihuꞌu dzaꞌra da Jeová nhimirotsaꞌrada, duré te rowaptẽrẽ dzaꞌra rowaihuꞌu petse dzéb dzô. Daꞌmadöꞌöꞌwa norĩ te ãma rotsaꞌrata dzaꞌra ãma upaiꞌwa höimanadzém na duré tsô ĩwatobrodzém na, ãté ta norĩ hã ma tô rétsi dzaꞌra ĩtsimirotsaꞌrada duré te te ĩꞌmanharĩdzé. — Pro. 20:5.

7-8. E niha daꞌmadöꞌöꞌwa norĩ te dza tsitsudzi dzaꞌra Jeová nhimipari nhimiꞌẽ ĩꞌupaiꞌwai me tsiꞌrãꞌõtõ wamhã.

⁷ Daꞌmadöꞌöꞌwa norĩ te tsidzutsi dzaꞌra Jeová nhimipari nhimiꞌẽ. Te tsiwatsutu dzaꞌra te te tsidzutsi dzaꞌra da Jeová nhimipawaptob dzé. Ãma ĩtsimiré, duréi hã Jeová atãma na ma tô tãma robdzanha Caim ma, ma tô tãma roti tsô ĩwatobro dzé tiwatsété parimhã duré ma tô tãma höiꞌré e niha ĩwẽ uptabi aré te te ãma tsaprĩ waꞌöhã. (Gên. 4:6, 7) Jeová ma tô tãma roti Davi roꞌmahörö ꞌrata ꞌwa Natã hawi, duré romnhimiréꞌé ma tô tãma watsuꞌu te te pẽꞌẽ rétsi da. (2 Sam. 12:1-7) Duré bötö tsidöpötsi Jeová te te tsaprõni roꞌmahörö ꞌrata ꞌwa norĩ israelita ĩpoꞌre õ dzaꞌra norĩ u te te pawaptob dzaꞌra da. Tawamhã Jeová te te pawaptob dzaꞌra õ di tsiꞌruiwapari dzaꞌra waptsi. (Jer. 7:24, 25) Ĩmorĩꞌrata na te tsiwatsutu dzaꞌra te te pawaptob dzaꞌra da te te ãma upa dzaꞌra ré, duré ma tô tiwi waptẽrẽ dzaꞌra tsiꞌruiwapari dzaꞌra da.

⁸ Jeová te te tsidzutsi dzaꞌra da, daꞌmadöꞌöꞌwa norĩ te tsiwatsutu dzaꞌra ꞌre höimana dzaꞌra mono da 2 Timóteo 4:2 dzarina, atãma na te ꞌre höimana dzaꞌra duré danhimipari nhimiꞌẽ na, te te pawaptob dzaꞌra da ĩꞌupaiꞌwa höimanadzé te te ãma tsaprĩ da. Ĩtsahi na niwamhã robdzeiꞌõ na höimana wamhã ãté ĩtsimiroti te te wapari õ di dza, niwamhã tsiꞌruiwapari õ di dza.

9-10. E niha daꞌmadöꞌöꞌwa norĩ te dza pawaptob dzaꞌra ĩꞌupaiꞌwa te te rotsaꞌrata da te te ãma ĩꞌupadzém na.

⁹ Daꞌmadöꞌöꞌwa norĩ te te pawaptob dzaꞌra ĩꞌupaiꞌwa te te rotsaꞌrata da e marĩ uꞌöbö ma tô ãma upa. E te te dama rowahutu õ di. E te te tsima romnhoré õ di Bíblia na. E röwi tipẽꞌẽ na te te rowaptẽrẽ õ di. E ma tô tsima tsaꞌré te te rotsaꞌrata da marĩ watsété na niwamhã marĩ nhitsébꞌõ na. E ma tô tsima pitsutu datsiwaihuꞌu ĩwẽꞌõ niwamhã dato ĩwẽꞌõ. E niha ta norĩ hã ma tô rétsi ĩtsimirotsaꞌrada duré te te tsima ĩpitsutudzé. E tãma waihuꞌu petse di e niha ma tô tãma rowẽꞌõ petse Jeová ma.

¹⁰ Daꞌmadöꞌöꞌwa norĩ te dza tsadanharĩ dzaꞌra te te waihuꞌu dzaꞌra da e marĩ ma tsô roꞌwaꞌré duré e marĩ ma tô rétsi te te ãma upa da. Tadzahã te dza tãma ꞌre höimana wẽ dzaꞌra dawadzéb petse na duré darĩtĩ petse ãna. (Pro. 20:5) Nimahã na hã daꞌmadöꞌöꞌwa norĩ romnhimiréꞌédzém na te dza tãma watsuꞌu dzaꞌra te te tsina rotsaꞌrata da te te ãma ĩꞌupadzé. Ãté datsiꞌrãꞌõtõ ĩmorĩꞌrata na te dza waihuꞌu e niha te te ãma ĩꞌupadzé ĩpipa uptabi, te dza tiwi robdzeiꞌõ petse, duré te dza tsiꞌruiwapa.

11. E niha Jesus ma tô ꞌre höimana dzaꞌra ĩꞌupaiꞌwa norĩ ma.

¹¹ Daꞌmadöꞌwa norĩ te tsiwatsutu dzaꞌra Jesus te te tsidzutsi dzaꞌra da. Saulo te te robdzanhamri wamhã Jesus ma tô tsadanha te te höiꞌré da ĩtsimirotsaꞌrada röwi tipẽꞌẽ na: ‘Saulo, Saulo. E marĩ wa, te ĩ̱ma ꞌre ĩrobꞌmanharĩ watsété mo.’ Ãne Jesus ma tô pawapto te te waihuꞌu da ĩhöimanadzé ĩwẽꞌõ na hã. (Atos 9:3-6) Duré piꞌõ Jezabel ãma Jesus te tinha: ‘Ãma ĩ̱waꞌa õ di aré, te ĩꞌadzöridzéb da hã. Tiwatsété wi tsipiꞌra da newa, wa tô aré te ꞌre ꞌmadöꞌö.’ — Apo. 2:20, 21.

12-13. E niha daꞌmadöꞌöꞌwa norĩ atãma na te ꞌre höimana dzaꞌra te te pawaptob dzaꞌra da ĩꞌupaiꞌwa tsiꞌruiwapari da. (ꞌMadöꞌö dapodo duré.)

¹² Jesus ne hã daꞌmadöꞌöꞌwa norĩ waptu na te te rotsaꞌrata dzaꞌra õ di dza ĩꞌupaiꞌwa ĩtsiꞌruiwapari õ na hã. Niꞌwam norĩ hã te dza tsiꞌruiwapari dzaꞌra datsiꞌrãꞌõtõ ĩmorĩꞌrata na. Ĩhöiba amo norĩ ãnei õ di. Tahawa tsada hã daꞌmadöꞌöꞌwa norĩ ĩme tsiꞌrãꞌõtõ da hã apö. Ãté datsiꞌrãꞌõtõ ĩmorĩꞌrata pari te dza rotsaꞌrata petse daꞌmadöꞌöꞌwa norĩ te te ĩnharĩdzé duré dahöimana wapu na te dza rowaptẽ Jeová wi. (Sal. 32:5; 38:18) Ãne hã ãté datsiꞌrãꞌõtõ maparane ãma te dza tsiꞌruiwapa.

¹³ Te te pawaptob dzaꞌra da, daꞌmadöꞌöꞌwa norĩ te ꞌre höimana wẽ dzaꞌra duré te rotsaꞌrata dzaꞌra e niha aré õ norĩ ãma hã tsô watobro waꞌöhã. Te rowaptẽrẽ dzaꞌra Jeová nhimipawaptobdzéb dzô, te tsima wẽ dzaꞌra watsitsãnawã te te tsina waihuꞌu da te te ãma ĩꞌupadzé, duré tsiꞌruiwapari da. — 2 Tim. 2:25, 26.

14. E ꞌwa hã tô tsena te pawapto ĩꞌupaiꞌwa tsiꞌruiwapari da.

¹⁴ Ĩꞌupaiꞌwa tsiꞌruiwapari wamhã tô tsena wa watsima rowẽ dzaꞌra ni. (Lucas 15:7, 10) Tadzahã e ꞌwa hã tô tsena ma tô pawapto. E daꞌmadöꞌöꞌwa norĩ. Ãma aipoꞌre puꞌu Paulo te te ĩnharĩdzém na: Ãté tawamhã te dza ꞌRe ĩhöimana uꞌötsi mono hã te te [ꞌre apawapto], ĩwatsété wi ꞌre tsipidzari dzaꞌra mono da’. (2 Tim. 2:25) Ãhã romnhihödö te wama höiꞌré Jeová ĩmorĩꞌrata uptabi te te ĩpawaptom na hã, aibö norĩ õ di. Tô tsena Jeová te pawaptob dzaꞌra Jesus dzadawa dzamarĩꞌwa norĩ ĩhöimana dzaꞌra dzé duré ĩtsimirotsaꞌrata dzaꞌra te te ãma tsaprĩ dzaꞌra da. Taha pari Paulo te tinha tsô ĩwatobrodzé tsiꞌruiwapari parimhã: Ĩꞌupaiꞌwa hã te dza apö ĩtsimirotsaꞌrata ꞌre tãma ꞌre romnhoꞌa dzaꞌra. Waꞌuburé nhimimramidzém hawi te dza duré ꞌre wairébé. — 2Ti 2:26.

15. E niha daꞌmadöꞌöꞌwa norĩ te dza pawaptob dzaꞌra ĩꞌupaiꞌwa hã.

¹⁵ Niꞌwa tsiꞌruiwapari wamhã, tsiꞌubdatõ daꞌmadöꞌöꞌwa ĩme ĩtsiꞌrãꞌõtõ na hã te dza te te ꞌre tsabui dzaꞌra mono te te ꞌre pawaptob dzaꞌra mono da, te te ãma upa dzahu tõ da, duré ĩbö dzarina ꞌre höimana mono da. (Heb. 12:12, 13) Daꞌmadöꞌöꞌwa norĩ niwa te te watsuꞌu õ di dza, ĩꞌupaiꞌwa te te ĩꞌmanharĩdzém na niꞌwai ma. Tadzahã e marĩ na watsitsãnawã norĩ ubumro da te ĩroꞌmahörö dzaꞌra da tsi.

‘AIMREME NA TÃMA ꞌRE PẼTẼ DZAꞌRA MONO TE TE ĨꞌMADÖꞌÖ DZAꞌRA NORĨ NHOꞌA’

16. 1 Timóteo 5:20 dzarina e ꞌwam norĩ ãma, te watsuꞌu ‘ĩtsiré daꞌmadöꞌöꞌwa norĩ’.

¹⁶ Tsõré na 1 Timóteo 5:20. Daꞌmadöꞌöꞌwa Timóteo ma Paulo ma tô robꞌuiꞌéré te te tãma höiꞌré da, tãma ꞌre ĩhöimana mono dzé te te ãma ĩꞌupa dzaꞌra norĩ ma. Tadzahã e ꞌwam norĩ ãma te watsuꞌu ‘ĩtsiré daꞌmadöꞌöꞌwa norĩ’ ãhã romnhihötö na. E te watsuꞌu aihĩni watsitsãnawã norĩ ubumro datsiꞌrãꞌõtõdzéb ꞌre. Ãté nimahã na tsi. Paulo te te nharĩ wamhã ‘te te ĩꞌmadöꞌö dzaꞌra norĩ’ ãma hã, te watsuꞌu ãma ĩꞌupadzé te te ĩwaihuꞌu dzaꞌra norĩ tsi. Ãté ma tô ꞌmadöꞌö dzaꞌra ãma ĩꞌupadzé niwamhã ĩꞌupaiꞌwa ma tô tãma watsuꞌu dzaꞌra te te ĩꞌmanharĩdzé. Ãne wamhã õ norĩ ma tsi daꞌmadöꞌöꞌwa norĩ te te ĩwatsuꞌu dzaꞌra da tsi, oto ĩme ĩtsiꞌrãꞌõtõ na hã duré da te tãma ĩpẽtẽ dzaꞌra na hã.

17. Nimahã na hã ãté ãma ĩꞌupa dzé ma tô dama waihuꞌu dzaꞌra, niwamhã te dza dama waihuꞌu dzaꞌra. Ãne hã e niha daꞌmadöꞌöꞌwa norĩ te dza dama roꞌmahörö dzaꞌra, duré e marĩ wa.

¹⁷ Nimahã na hã ãté ãma ĩꞌupa dzé ma tô dama waihuꞌu dzaꞌra niwamhã te dza dama waihuꞌu dzaꞌra. Ãne wamhã ‘ĩtsiré daꞌmadöꞌöꞌwa norĩ’ te watsuꞌu aihĩni watsitsãnawã norĩ ubumro datsiꞌrãꞌõtõ dzéb ꞌre. Ãne hã nimahã daꞌmadöꞌöꞌwa te dza tãma watsuꞌu dzaꞌra watsitsãnawã norĩ ubumroi ma watsitsãnawã da te tãma ĩpẽtẽ na hã. E marĩ wa. Paulo ma tô watsuꞌu ‘te te tsina ꞌre hötöꞌö dzaꞌra mono da’, ãne hã ĩtsine ꞌre höimana dzaꞌra mono õ di dza ĩwatsété na.

18. E niha daꞌmadöꞌöꞌwa norĩ te dza tãma ꞌre höimana dzaꞌra niꞌwai ma ĩꞌrãtiꞌi ré ãma upai wamhã 18 ãma ĩwahu õ ré hã (ꞌMadöꞌö dapodo duré.)

¹⁸ Niꞌwa ĩꞌrãtiꞌi ré te te ãma upa ĩpipa wamhã tadzahã dzahadu 18 ãma ĩwahu õ ré, e marĩ te dza watobro. Daꞌmadöꞌöꞌwa norĩ ubumro te dza pitsutu dzaꞌra maparane daꞌmadöꞌöꞌwa norĩ ĩme timama norĩ me dzama tsiꞌrãꞌõtõ da.a Daꞌmadöꞌöꞌwa norĩ te dza tsadanharĩ dzahuré timama norĩ ma e niha te pawaptob dzahuré tiꞌra tsiꞌruiwapari da. Tiꞌra hã oto ĩbö dzarina höimana wamhã, duré timama norĩ oto te te pawaptob dzahuré wamhã te te ãma tsaprĩ da ĩhöimanadzé, maparane daꞌmadöꞌöꞌwa norĩ te dza tsaꞌré te te ꞌre pawaptob dzahuré mono da. E marĩ wa. Jeová ma tô tãma roti dzaꞌra damama norĩ ma daꞌra norĩ ma te te tãma pẽtẽ dzaꞌra da dadzawi petse na. (Deut. 6:6, 7; Pro. 6:20; 22:6; Efé. 6:2-4) Nimahã na hã, daꞌmadöꞌöꞌwa norĩ te dza tãma robdzanhamri dzaꞌra damama norĩ ma, te te waihuꞌu dzaꞌra da tiꞌra norĩ ma te te ĩpawaptob dzahuré dzém na. Bété ĩhöibaté tihöimanadzé te te ãma tsaprĩ õ wamhã, duré natsi te te ãma upa uꞌötsi wamhã. Ãne hã tsiꞌubdatõ daꞌmadöꞌöꞌwa norĩ ĩme timama norĩ me dzama te dza tsiꞌrãꞌõtõ.

JEOVÁ ĨTSIMIDZAWIPE DURÉ ÃMA ĨTSIBAPE

19. E niha daꞌmadöꞌöꞌwa norĩ te tsiwatsutu dzaꞌra te te tsidzutsi dzaꞌra da Jeová ĩꞌupaiꞌwai ma ꞌre höimana dzaꞌra da.

19 Daꞌmadöꞌwa norĩ te tsiwatsutu dzaꞌra watsitsãnawãi ubumroi ꞌwawi Jeová nhimiroti te te ĩwapari dzaꞌra õ norĩ tsimapari dzaꞌra da. (1 Cor. 5:7) Taha nherẽ te tsima wẽ petse dzaꞌra ĩꞌupaiꞌwa ĩtsiꞌruiwapari na hã. Taha da, rowẽ na te tsimipari dzaꞌra ĩhöimanadzé te te ãma ĩtsaprĩ dzaꞌra dzô. E marĩ wa. Te te tsidzutsi dzaꞌra wa Jeová ĩtsimidzawi petse na duré ĩtsiba petse na. (Tia. 5:11) ꞌMadöꞌö e niha apóstolo João ma tô höiꞌré ĩtsimidzawidzé watsitsãnawã norĩ ma, ma tô robꞌuiꞌéré: ‘Ĩ̱ꞌra norĩre, ãne hã wa aima robꞌuiꞌéré dzaꞌra waꞌwa, aiwatsédé hã ꞌre ꞌmanharĩ dzaꞌra waꞌaba mono tõ da. Tane nherẽ, niꞌwa hã tiwatsédé te te ꞌmanharĩ wamhã, wate dzaꞌra ĩré hã waꞌwawi ꞌre ĩtsimapa mono ꞌwa hã, Timama nho ꞌre. Ta hã Jesus Cristo, marĩ ĩꞌuwaibaba tsi te te ꞌre ĩꞌabꞌmanharĩ mono.’ — 1 João 2:1.

20. E marĩ wa dza ꞌmadöꞌö dzaꞌra ni romnhoré amo na.

²⁰ Nimahã na hã ĩꞌupaiꞌwa tsiꞌruiwapari õ di dza. Taha watobro wamhã, da te ĩwadzere da tsi watsitsãnawãi ubumroi hawi. Ãne na hã e niha daꞌmadöꞌöꞌwa norĩ te dza tihöimana dzaꞌra. Wa dza waihuꞌu dzaꞌra ni taha na romnhoré amo na.