E Jeová Watsuꞌuꞌwa norĩ te pitsutu dzaꞌra Bíblia aimawi.
Jeová Watsuꞌuꞌwa norĩ ãté te pitsutu dzaꞌra Bíblia norĩ aimawi. Tadzahã wama rowẽ dzaꞌra di Tradução do Novo Mundo das Escrituras Sagradas, damreme mono bö ĩré hã.
Höimanaꞌuꞌö nhitsi ĩré hã. Bíblia ahö te te nharĩ õ di Höimanaꞌuꞌö nhitsi, õ hã bíblia ꞌmanharĩꞌwa. Ãma ĩtsimiré, mitsi bíblia ĩtsaprĩdzé 70 aibö norĩ duré piꞌõ norĩ ma tô tsaprĩ dzaꞌra duré ĩtsitsi norĩ ma tô tsẽrẽ dzaꞌra õhõ Bíblia ĩtsaprĩdzém na. Tadzahã ãhã ĩtsaprĩdzé te te nharĩ õ di Bíblia ꞌmanharĩꞌwa nhitsi — Jeová!
Tradução do Novo Mundo ãma, Jeová nhitsi hã ma tô apö tsẽrẽ ni romnhihödö danhipai u ĩꞌrata norĩ dzarina, duré niꞌwa te te waihuꞌu dzaꞌra õ di ĩtsaprĩꞌwa norĩ.
Ĩbö tsi. Niꞌwam norĩ ma tô tsapri dzaꞌra bíblia, tadzahã niꞌwam ĩtsaprĩdzé ĩböi õ di. Ãma itsimiré, mitsi ĩtsaprĩdzé hã te tinha Mateus 7:13 ãne: “Duré, unhama ro u ꞌre ĩdanhitsitsi mono dzé hã bödödi hã, tsaꞌẽtẽ uptabi di. Duré ĩtsitobdzé hã, tsaꞌẽtẽ uptabi di. Tahawa, dama wapure di, ãma ꞌre ĩdanomro mono dzéb da hã, bödödi hã tsaꞌẽtẽ uptabi wa. Taha wa, te daꞌahö uptabi na ãma ꞌre danomro, unhama ro u, tamomo ꞌre danhitsitsi mono wa, da te ꞌre robdzépata uꞌötsi dzaꞌra mono da.” Tadzahã, ĩtsihötö ĩꞌrata ĩré hã na damreme “daꞌuprotsidzé ”, mare di unhama ro hã . E marĩ wa ĩtsaprĩꞌwa norĩ te pitsutu dzaꞌra damreme “unhama ro”. Ãté, te tsadze dzaꞌra ĩwatsété norĩ te dza te te ꞌre ĩrobdzépata uꞌötsi dzaꞌra mono na hã. Tadzahã, unhama na rowahudu hã tsõꞌawi hã tsenai õ di. Taha wa, Tradução do Novo Mundo te tsaprĩ ãhã romnhihödö ãne: ‘Atsitsitsi dzaꞌra waꞌaba ĩtsitobdzé hã tsyry re di; e marĩ wa bödödi ĩtsaꞌẽne ĩdatsihutu na hã daꞌuprotsidzéb u hã.’
Wapu di waihuꞌu da. Bíblia Ĩtsaprĩdzé hã ĩbö tsi ĩpire uptabi, tadzahã ãhã tsi õ di, wapu di waihuꞌu da dzama. Ãma ĩtsimiré: Mateus 5:3 Jesus te tinha: “Rowẽ uꞌö ĩtsimarĩꞌõ norĩ ma hã, tite ĩhöiba tsãmriꞌõ na hã”. Ãhã romnhihötö português mreme na pire di waihuꞌu da, taha wa Tradução do Novo Mundo te tsaprĩ ãhã romnhihötö ãne: “Niꞌwam norĩ te te ĩwaihuꞌu petse dzaꞌra te tsô tiwi tirowaptöꞌö dzaꞌra Höimanaꞌuꞌö dzô, rowẽ na te dza ꞌre höimana dzaꞌra”, ãne wapu di waihuꞌu da.
Tradução do Novo Mundo Höimanaꞌuꞌö nhitsi ĩre hã, duré ĩbö tsi, duré wapu di waihuꞌu da duré marĩ ĩpire uptabi: õ hã waꞌöbö õ di. Taha wa, daꞌahö na daro mono bö Bíblia ĩré hã te te tsõré dzaꞌra da ĩmreme na.