E ma norĩ hã Jeová Watsuꞌuꞌwa norĩ nhimidzadze uptabi hã.

Jeová Watsuꞌuꞌwa norĩ ne, wa natsi tsada tsiptete dzaꞌra ni wa te wapari dzaꞌra da Jesus rowahudu hã, apóstolo norĩ ãne hã. Ãhã romnhihödö te dza ãma rowatsuꞌu: E ma norĩ hã Jeová Watsuꞌuꞌwa norĩ nhimidzadze uptabi hã.

1. Höimanaꞌuꞌö. Wa wawata dzaꞌra ni mitsi haré Höimanaꞌuꞌö ĩꞌuptabi hã, Jeová õhõ Ropotoꞌwa duré danhipaiꞌwa. (Salmo 83:18; Apocalipse 4:11) Õ hã Höimanaꞌuꞌö Abraão te, duré Moisés te, duré Jesus te.

2. Bíblia. Wa tsadzei petse dzaꞌra ni Bíblia hã Höimanaꞌuꞌö mreme. (João 17:17; 2 Timóteo 3:16) Duré wa tsadze dzaꞌra ni Bíblia na 66 ĩhöiwarobo norĩ tô tsena Höimanaꞌuꞌö hawi. Mitsi dama romnhoréꞌwa Jason D. BeDuhn te tinha ãne ĩbö Jeová Watsuꞌuꞌwa norĩ te tsimidzatsei petse dzaꞌra Bíblia na, duré te te tsaprĩ dzaꞌra õ di Bíblia nhimirowahudu hã.a

   Bíblia na wa te tsadzei dzaꞌra nherẽ, wa waihuꞌu dzaꞌra ni Bíblia ĩtsimiréꞌédzé norĩ dza ãma ĩꞌuwamrami tsenai õ di, ta nori ãma ĩtsimiréꞌédzém na tsi. — Apocalipse 1:1.

3. Jesus. Wa natsi tsidzutsi dzaꞌra ni Jesus, õ hã Wanhõꞌreptuiꞌwa duré Höimanaꞌuꞌö ꞌra. (Mateus 20:28; Atos 5:31) Taha wa, wa norĩ hã Cristo nhibꞌaꞌuwẽ. (Atos 11:26) Tadza hã Bíblia e te ãma rowatsuꞌu Jesus ropotoꞌwa ĩꞌuptabi hã. Mare di, ãne wamhã Bíblia te te nharĩ õ di Hoimanaꞌuꞌö, duré Jesus, duré Höimanaꞌuꞌö pẽꞌẽdzani niwamhã Hoimanaꞌuꞌö höiba uptabi ĩpe mitsi. — João 14:28.

4. Höimanaꞌuꞌö nhimirobꞌrudzé. E marĩ hã Höimanaꞌuꞌö nhimirobꞌrudzé. E ĩtsibꞌaꞌuwẽ. Mare di. Höimanaꞌuꞌö nhimirobꞌrudzé rotidzé höiwa ãma tô tsena na. Te dza ãma adzaprĩ aihĩni rotiꞌwa norĩ hã duré te dza ãma uwaimra Höimanaꞌuꞌö te te tsima wẽ tiꞌa da. (Daniel 2:44; Mateus 6:9, 10) Bíblia dzarina ta norĩ hã te dza watobro romhutu õmhã robꞌrãtsudu hã romhuture di oto. — 2 Timóteo 3:1-5; Mateus 24:3-14.

   Jesus Rotiꞌwa hã Höimanaꞌuꞌö nhimirobꞌrudzém na, duré ma ãma tsãnaꞌrata roti na 1914 na höiwa ãma. —Apocalipse 11:15.

5. Danhoꞌreptudzé. Jesus ma tihöiba hã titsõ te te daꞌadzani da dadöꞌö wi. (Mateus 20:28; Atos 4:12) Taha da niꞌwa, te te ĩꞌumnhatsi da tsi Jesus na, duré ãma ĩtsaprĩ da tsi ĩhöimanadzém na duré ö dawabdzuri (daꞌrãti) te te ꞌmanharĩ dzaꞌra da tsi. (Mateus 28:19, 20; João 3:16; Atos 3:19, 20) Ĩhöimanadzé hã te dza höiꞌré ĩtsimidzadze ĩꞌuptabi niwamhã mare di. (Tiago 2:24, 26) Tadzahã marĩ wẽ norĩ hã Höimanaꞌuꞌö nhoprubdzém na wa te uipra dzaꞌra õ di dza. Taha wa watsiꞌuihö na watsinhoꞌreptu dzaꞌra dai õ wa, ĩtsimidzawi petse wa õhõ te dza wanhoꞌreptu dzaꞌra. — Gálatas 2:16, 21.

6. Höiwa. Höimanaꞌuꞌö Jeová, Jesus Cristo duré dawatsuꞌuꞌwa norĩ te ꞌre höimana dzaꞌra höiwa ãma, õ norĩ hã ĩhöiba ĩtsãmriꞌõ.b (Salmo 103:19-21; Atos 7:55) Ĩtsimirẽmeꞌõ norĩ 144 mil na te dza tihöiwaꞌutu dzaꞌra höiwa ãma ꞌre höimana dzaꞌra mono da. Ta norĩ hã Jesus tsiré te dza roti dzaꞌra. — Daniel 7:27; 2 Timóteo 2:12;Apocalipse 5:9, 10; 14:1, 3.

7. 

   Tiꞌa. Höimanaꞌuꞌö ma tô poto Tiꞌa hã ꞌre wahöimana uꞌötsi dzaꞌra mono da. (Salmo 104:5; 115:16;Eclesiastes 1:4) Höimanaꞌuꞌö wa te wapari dzaꞌra wamhã, wa norĩ hã duré ꞌre wahöimana uꞌötsi dzaꞌra mono da dahödzé ãna, tiꞌai ãma. — Salmo 37:11,34.

8. Marĩ watsédé duré rowatsédé. Mitsi dawatsuꞌuꞌwa ĩwatsédé te tihöimana dzada Jeová ma, taha parimhã ropire ahö na ma watobro duré marĩ watsédé duré robdzépada hã Tiꞌai ãma. (João 8:44) Ta hã dawatsuꞌuꞌwa ĩwatsédé hã “Satanás”, niwamhã “Diabo” õhõ Waꞌuburé. Waꞌuburé ma tô rétsi Adão duré Eva te tihöimana dzahuré Höimanaꞌuꞌö dzada. Taha wa, wa natsi robdzépata dzaꞌra ni. (Gênesis 3:1-6; Romanos 5:12) E marĩ wa, Höimanaꞌuꞌö te te ꞌre tsaꞌréi mono marĩ watsédé hã duré robdzépada hã. Õ hã, te tsima wẽ te te tsadaꞌöbö da Satanás itsadawa nhipetse na hã. Tane nherẽ robdzépata duré rowatsédé õne uꞌötsi õ di dza.

9. Dadö. Niꞌwa döꞌö wamha ĩtsimirotsaꞌratadzé hã te dza aiꞌutõrĩ dzaꞌra. (Salmo 146:4; Eclesiastes 9:5, 10) Unhama na rowahudu hã tsõꞌawi tsenai õ di.

   Daꞌahö uptabi na ĩdadöꞌö dzaꞌra apö te dza ꞌre dahöimana dzaꞌra. (Atos 24:15) Taha pari, niꞌwam norĩ te te ĩwapari dzaꞌra õ na hã Höimanaꞌuꞌö, te dza uprotsi uꞌötsi dzaꞌra.

10. 

    Damrõ, damama norĩ, duré daꞌra norĩ. Höimanaꞌuꞌö te tsima wẽ aibö duré piꞌõ, tsiré ꞌre höimana uꞌötsi dzahuré mono da. Bíblia dzarina Cristão norĩ ma te te ꞌre tsaꞌré ꞌre tsirẽme dzaꞌra mono da duré apö tsina ꞌre mro dzaꞌra mono da, ĩmro hã tsiwatsété wamhã tihöiba na. (Mateus 19:4-9) Wa umnhatsi dzaꞌra ni Bíblia te dza pawapto damro norĩ, damama norĩ, duré daꞌra norĩ te dza tsima rowẽ petse dzaꞌra.

11. Wawatadzé. Wedepaihi duré dahöiba ꞌmanharĩ wa te ãma wawata dzaꞌra õ di. (Deuteronômio 4:15-19; 1 João 5:21) ꞌMadöꞌö marĩ norĩ hã ĩpire uptabi ãma wawatadzém na:

    • Wa natsi rowaptẽrẽ Höimanaꞌuꞌö hawi. — Filipenses 4:6.

    • Bíblia wa natsi tsõré dzaꞌra ni duré wa natsi romnhoré dzaꞌra ni. — Salmo 1:1-3

    • Wa natsi rotsaꞌrata petse marĩ norĩ wa te ĩtsõré dzaꞌra na hã Bíbia na. — Salmo 77:12

    • Wa natsi watsiꞌrãꞌõtõ dzaꞌra wa te rowaptẽrẽ dzaꞌra da, duré wanhoré dzaꞌra da, duré wa te robdzanhamri dzaꞌra da watsimidzadzem na hã, duré watsipawaptob dzaꞌra da watsiré ꞌre wahöimana robdze dzaꞌra mono da. — Colossenses 3:16; Hebreus 10:23-25.

    • Wa natsi dama rowahutu dzaꞌra Höimanaꞌuꞌö nhimirobꞌrudzém na hã. — Mateus 24:14.

    • Wa natsi pawaptob dzaꞌra ĩtsimarĩꞌõ norĩ hã. —Tiago 2:14-17

    • Datsiꞌrãꞌõtõdzém norĩ, duré romnhorédzém norĩ Bíblia na, wa natsi ꞌmanharĩ dzaꞌra ni duré wa natsi ãma pibui petse dzaꞌra ni. — Salmo 127:1

    • Wa natsi dapawapto ropipa dzaꞌẽne watobro wamhã. — Atos 11:27-30.

    

12. Waꞌubumro. Cristão norĩ ubumroꞌremhã, aibö ĩtsimidzaꞌretse norĩ pitsudu te te ꞌre ꞌmadöꞌö dzaꞌra mono. Daꞌmadöꞌöꞌwa ĩpire danhipai u õ di duré waꞌöbö õ di. (Mateus 10:8; 23:8) Datsiꞌrãꞌõtõꞌremhã dízimo duré robꞌuipradzé te te tãma waptẽrẽ dzaꞌra õ di. (2 Coríntios 9:7) Niꞌwai waihuꞌu õ di e ꞌwa ma tô titsõ robꞌuipradzé.

    Rowairébéꞌwai Ubumro daꞌumro te te ꞌre romhuri dzaꞌẽtẽ dzaꞌra rowaihu Jeová na te te ropé dzaꞌra da tãma romhuriꞌwa ĩhöiba amo norĩ ma, duré te te ꞌre ꞌmadöꞌö dzaꞌra rowahudu hã wama ĩhöimana dzaꞌra hã. — Mateus 24:45

13. Waꞌubumroi ꞌremhã. Waꞌubumroi ꞌremhã, watsawi petse dzaꞌra di watsitsãnawã norĩ, wanhiptiꞌa hã duré wapoto mono aimawi nherẽ duré wanhimidzadzedzé hã aiwaptsi. (1 Coríntios 1:10; Atos 10:34, 35; Tiago 2:4) Bíblia hã te natsi wapawaptob dzaꞌra marĩ ĩwẽ norĩ pitsutu dzaꞌra da. — Romanos 14:1-4; Hebreus 5:14.

14. Wahöimanadzé hã. Höimanaꞌuꞌö nhimiroti hã dama rowẽdzé, datsiwadzébdzé duré dahöimanadzé hiri wẽ dzé, duré ĩwẽ na datsima dahöimanadzé. (João 13:34, 35) Wanhimiromnhoré dzaꞌra uꞌöbö, ma tô tsani dzaꞌra ni dahöimanadzé duré rowahudu ĩꞌuptabiꞌõ norĩ wi, ãma ĩtsimiré, wapru hã dawede ne wadzô õ di duré ꞌre huri aba mono tõ da. (Atos 15:28, 29; Gálatas 5:19-21) Romharé na ꞌre wahöimana dzaꞌra, duré datsiꞌwapé wa te upari dzaꞌra mono õ di. (Mateus 5:9; Isaías 2:4) Wa wadzéb dzaꞌra ni dama ĩpire norĩ tadzahã Höimanaꞌuꞌö nhimiroti ĩmoriꞌrata na. — Mateus 22:21; Atos 5:29

15. Wa natsi dawadzéb dzaꞌra ni. Jesus te tinha: “Te dza ꞌre ĩdadzawi petse dzaꞌra waꞌaba mo, uburé. Marĩ ĩwẽ dzô atsima ꞌre atsõpré waꞌaba mono ne, te dza duré uburé dama dzama tsô ꞌre atsõpré waꞌaba mo, ĩwẽ dzô.” Te tinha duré: ‘ꞌRe höimana dzaꞌra mono õ di marĩ watsédé te te ꞌre ĩꞌmanharĩ dzaꞌra mono norĩ me.’ (Mateus 22:39; João 17:16) Ãne wa te pitsutu dzaꞌra õ di nherẽ dama ĩpire norĩ hã, duré watsiꞌrãꞌõtõ dzaꞌra õ di ĩhöiba amo danhimidzadze norĩ hã, wa tsada ꞌre watsiptete dzaꞌra mono dapawaptob dzaꞌra da. (Gálatas 6:10; 2 Coríntios 6:14) Tadzahã wa wadzéb dzaꞌra ni danhimipitsutudzé.

Atsitsadanharĩ wamhã Jeová Watsuꞌuꞌwa norĩ ãma, niwamhã ĩtsimidzadzedzé hã, te dza ĩwaihu wate site ãma, niwamhã tsõꞌairĩtĩ wanhimiromhuridzé hã, niwamhã aimorĩ watsiꞌrãꞌõtõdzé atsõrõwaꞌrata, niwamhã robdzanhamri niꞌwa Jeová Watsuꞌuꞌwa.