ROMNHIHÖDÖ 6
E ma hã danhimipari te ꞌre höimana adöꞌö norĩ dzô.
1. E niha romahörö wẽ hã adöꞌö norĩ ãma hã.
Jesus Betânia u witsi wamhã, Jerusalém ꞌrata, ma tô ãma aiꞌutõ aré bödö maparane tsiꞌuiwana Lázaro döꞌö parimhã. Jesus abꞌre u te mo Marta me duré Maria dzama, Lázaro tsitsãnawã norĩ hã. Awaꞌawi daꞌahö na ma tô datsiꞌubumro. E ãma rotsaꞌrata waihuꞌu petse di Marta duré Maria te te tsima ĩrobdze dzahuré na Jesus Lázaro te te höiwaꞌutu wamhã.—Tsõré na João 11:21-24, 38-44.
Marta aré te te waihuꞌu petse di oto romahörö wẽ hã adöꞌö norĩ ãma hã. Tãma waihuꞌu petse di aré Jeová dza te te ĩhöiwaꞌutu na adöꞌö norĩ hã Tiꞌai ãma apö ꞌre höimana dzaꞌra mono da.—Tsõré na João 11:24.
2. E marĩ te dza tihöiba dadöꞌö parimhã.
Höimanaꞌuꞌö te Adão ma tinha: ‘Tiꞌa ꞌmanharĩ a hã. Atöꞌö waptsi, te dza atsitiꞌa.’ — GÊNESIS 3:19.
Ma tô daꞌmanharĩ dzaꞌra ni tiꞌa na. (1 Coríntios 15:47) Dahöiba ꞌremhã dahöiba tsãmrĩꞌõ baba di. Wa norĩ hã, romnhiꞌmanharĩ duré dawaprum na. Taha wa, marĩ õ di dahöiba ꞌremhã dza ꞌre ĩhöimana mono hã dadöꞌö wamhã. Wadöꞌö dzaꞌra wamhã, waꞌrãihiwanhana duré te dza dörö, wanhimirotsaꞌrata dzaꞌra duré wa te ꞌre ĩtsépata dzaꞌra mono dzé hã te dza aiꞌutõrĩ dzaꞌra. Taha wa, Lázaro marĩ te te tsina watsuꞌu õ di tsô ĩwatobrodzé, adöꞌö norĩ te te rotsaꞌrata dzaꞌra õ wa.—Tsõré na João 11:11-14.
E Höimanaꞌuꞌö te te dama ꞌre robꞌmanharĩ watsété unhama na dadöꞌö dzaꞌra wamhã. Bíblia te ãma rowatsuꞌu adöꞌö norĩ te te ĩrotsaꞌrata waihuꞌu dzaꞌra õ na hã. Taha wa, unhama na rowahudu hã tsõꞌawi hã tsenai õ di duré te te wadzéb õ di Höimanaꞌuꞌö. Jeová tsimidzawi petse di, taha wa, niwa te te ꞌmanharĩ õ di aré da te robdzépata dzaꞌra da ãne na.—Tsõré na 1 João 4:8.
ꞌMadöꞌö ĩropodo E marĩ te dza tihöiba dadöꞌö parimhã.
3. E adöꞌö norĩ te te wama robdzanhamri waihuꞌu petse dzaꞌra di.
Adöꞌö norĩ te te robdzanhamri dzaꞌra õ di duré tsimipari waihuꞌu dzaꞌra õ di. (Salmo 115:17) Dawatsuꞌu watsétéꞌwa norĩ hã te te dama robdzanhamri waihuꞌu petse dzaꞌra di, adöꞌö newa. (2 Pedro 2:4) Jeová te dawi tsawi adöꞌö norĩ ma robdzanhamri. —Tsõré na Gálatas 5:20.
4. E ꞌwa hã apö te dza ꞌre höimana.
Daꞌahö uptabi na ĩdadöꞌö dzaꞌra apö te dza ꞌre dahöimana dzaꞌra Tiꞌai ãma. Niꞌwam norĩ Höimanaꞌuꞌö te te ĩwaihuꞌu dzaꞌra õ, duré niꞌwam norĩ te te ĩꞌmanharĩ dzaꞌra ĩwatsédé hã te dza höiwaꞌutu dzaꞌra ni duré.—Tsõré na Atos 24:14, 15.
Ĩdahöiwaꞌutu dzaꞌra da hã te dza waihuꞌu dzaꞌra tô tsena Höimanaꞌuꞌö na duré te dza tsadzei petse dzaꞌra Jesus ãma poꞌre petse na. (Apocalipse 20:11-13) Ĩdahöiwaꞌutu dzaꞌra da hã duré te te ĩꞌmanharĩ dzaꞌra da ĩwẽ hã te dza ꞌre höimana uꞌötsi dzaꞌra mono Tiꞌai ãma.—Tsõré na João 5:28, 29.
5. E marĩ dahöiwaꞌutudzé hã te wama waihuꞌu dzaꞌra Jeová na.
Höimanaꞌuꞌö ma we tsatõ Tiꞌra wadzada döꞌö da, taha wa, danhimipari te ꞌre höimana adöꞌö norĩ dzô. Ãne hã, dahöiwaꞌutudzé hã te wama waihuꞌu dzaꞌra Jeová nhimidzawidzé duré ĩtsõprubdzé ãma ĩwaꞌudzeiꞌõ. Adöꞌö norĩ apö ꞌre höimana dzaꞌra mono wamhã, e ꞌwa, te atsima ĩwẽ pe tsõpẽtẽ da.—Tsõré na 1 João 4:9, 10; 1 Coríntios 15:21, 22.