ROMNHORÉ 13
E niha danhimidzadze ĩꞌuptabiꞌõ norĩ te daꞌãma ropé dzaꞌra Ropotoꞌwa nhiti.
Ropotoꞌwa tsimidzawi petse di. Danhimidzadze ĩꞌahö norĩ te tsiwatsuꞌu dzaꞌra tãma ĩromhuriꞌwa na. E niha bö, marĩ watsédé ahö na te te ꞌre ꞌmanharĩ dzaꞌra. Õ norĩ hã, uptabi dzaꞌra õ wa duré dama tsadawa nhipetse dzaꞌra wa Ropotoꞌwai ãma. E niha danhimidzadze ĩꞌuptabiꞌõ norĩ te daꞌãma ropé dzaꞌra Ropotoꞌwa nhiti. E niha õ hã te tihöiba taha na. E marĩ bété te dza ꞌmanha.
1. E niha danhimidzadze ĩꞌuptabiꞌõ norĩ tinhimirowahutu na te daꞌãma ropé dzaꞌra Ropotoꞌwa nhiti.
Danhimidzadze ĩꞌuptabiꞌõ norĩ ‘ꞌRe ĩhöimana uꞌötsi mono nhimiroti hã tô tsena nherẽ te ĩmreme upana aimawi tsi te te ꞌre wapari dzaꞌra, tô tsenaiꞌõ hã.’ (Romanos 1:25) Ãma ĩtsimiré, õ norĩ hã te te natsi dama rowahutu dzaꞌra õ di Ropotoꞌwa nhitsi hã. Tadzahã, Ropotoꞌwai mreme te tinha ĩpire na ĩtsitsi na ãma wahöimana dzaꞌra da. (João 17:26 RTN) Marĩ watsédé watobro wamhã niꞌwa ĩtsaꞌrataꞌwa, pastor, rowahutuꞌwa duré danhibꞌihöꞌa ĩhöiba amo norĩ danhimidzadzedzém na te natsi nharĩ dzaꞌra: “Ropotoꞌwa ma tô tsima wẽ ãhã watobro da”. Tadzahã, tahã tô tsenai õ di. Ropotoꞌwa niwa te te ꞌmanharĩ õ di marĩ watsédé. (Tsõré na Tiago 1:13.) Robdzei õ di, tsadawa nhipetse dzaꞌra tsina te daꞌãma ropé dzaꞌra Ropotoꞌwa nhiti.
2. E niha danhimidzadze ĩꞌuptabiꞌõ norĩ tinhimiꞌmanharĩ na te daꞌãma ropé dzaꞌra Ropotoꞌwa nhiti.
Ropotoꞌwai mreme te tinha danhimidzadze ĩꞌuptabiꞌõ norĩ ‘ꞌre ĩdawatsété dzaꞌra mono dzé hã ĩtsibu ꞌrãihö petse na höiwa u.’ (Apocalipse 18:5) Duréi hawi danhimidzadze norĩ te dame tihöimana dzaꞌra política na duré te tsiptete upari dzaꞌra datsiꞌwapé. Taha nhipai u, ma tô daꞌanhimro duré ma tô wẽtsãmri dzaꞌra daꞌahö na dapãrĩdzé. Niꞌwa danhibꞌihöꞌa norĩ danhimidzadzém na tsibro petse na te ꞌre höimana dzaꞌra tidzadawa dzamarĩꞌwa norĩ te robꞌuipradzém na. Danhimidzadze ĩꞌuptabiꞌõ norĩ dama höimana dzaꞌra õ di Jeová dama ĩhöimana ne. Tahã te höiꞌré Ropotoꞌwa tãma ĩwaihuꞌu dzaꞌra õ na hã. E niha te merẽ Ropotoꞌwa nhimipitsutu na ꞌre höimana dzaꞌra. — Tsõré na 1 João 4:8.
3. E niha Ropotoꞌwa te rotsaꞌrata danhimidzadze ĩꞌuptabiꞌõ norĩ ãma.
E te natsi abꞌru marĩ ĩwatsédé danhimidzadze ĩꞌuptabiꞌõ norĩ te te ĩꞌmanharĩ dzaꞌra dzém na hã. Jeová bété. Tãma dadzawi petse di, tadzahã te natsi abꞌru danhibꞌihöꞌa danhimidzadze ĩꞌuptabiꞌõ norĩ na te te daꞌmadöꞌö dzaꞌra õ wa duré ĩtsiti te te daꞌãma ropé dzaꞌra wa. Jeová te ropitsutu romhutu na te te uprotsi da danhimidzadze ĩꞌuptabiꞌõ norĩ, ‘tawamhã roptsi hã te dza oto tsô nomro.’ (Apocalipse 18:8, 21).
WAIHUꞌU DURÉ
Ãhã romnhoré na hã wa dza waihuꞌu dzaꞌra ni (1) duré Ropotoꞌwa nhimirotsaꞌrata na danhimidzadze ĩꞌuptabiꞌõ norĩ ãma, (2) marĩ ĩwatsédé danhimidzadze ĩꞌuptabiꞌõ norĩ oto te te ĩꞌmanharĩ dzaꞌra hã, (3) duré e marĩ wa tane nherẽ, ãma ĩꞌudzutsi da tsi Jeová na romnhoré na.
4. Ropotoꞌwai ma wẽ õ di uburé danhimidzadze norĩ
Daꞌahö na te rotsaꞌrata dzaꞌra ni uburé danhimidzadze norĩ ꞌridawa ne ꞌRe ĩhöimana uꞌötsi mono u ꞌre danhitsitsi mono da. E tahã tô tsena. Atsiré tsõré aba Lucas 13:24. Taha parimhã atsima robdzanhamri aba ãhã dadzadanharĩ ãma piꞌrebamhã:
E marĩ Ropotoꞌwai mreme te tinha ꞌridawa dahöimanadzéb u danhitsitsi da na.
ꞌMadöꞌö aba ĨROPODO., Taha parimhã atsima robdzanhamri aba ãhã dadzadanharĩ ãma piꞌrebamhã:
E Ropotoꞌwai mreme te tinha uburé danhimidzadze norĩ Ropotoꞌwai ma te te tãma ĩrowẽ dzaꞌra na hã.
5. Danhimidzadze ĩꞌuptabiꞌõ norĩ te te tsidzutsi dzaꞌra õ di Ropotoꞌwa nhimidzawidzé hã
Danhimidzadze ĩꞌuptabiꞌõ norĩ te daꞌãma ropé dzaꞌra Ropotoꞌwa nhiti marĩ ahö na. Ãma ĩtsimiré, te tsiptete upari dzaꞌra datsiꞌwapé. Wa dza waihuꞌu dzaꞌra ni duré taha na. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E marĩ danhimidzadze ĩꞌahö norĩ ma tô ꞌmanharĩ dzaꞌra Maparane ãma Datsiꞌwapé Ĩtsaꞌẽtẽ na.
E niha te ĩrotsaꞌra te te ĩꞌmanharĩ dzaꞌra dzém na.
Atsiré tsõré aba João 13:34, 35 duré 17:16. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
Aima hã e niha Jeová te tihöiba danhimidzadze norĩ tsitsitsi wamhã datsiꞌwapéi ꞌre.
Danhimidzadze ĩꞌuptabiꞌõ norĩ marĩ ĩwatsédé ahö na te natsi ꞌmanharĩ dzaꞌra. Ĩꞌmadöꞌödzéb dzarina, e marĩ te höiꞌré te te ĩtsidzutsi dzaꞌra õ na hã Ropotoꞌwa nhimidzawidzé hã.
Danhimidzadze ĩꞌuptabiꞌõ norĩ te te tsidzutsi dzaꞌra õ di Ropotoꞌwa nhimidzawidzé hã
6. Ropotoꞌwa te tsima wẽ te te daꞌadzani da danhimidzadze ĩꞌuptabiꞌõ norĩ hawi
Atsiré tsõré aba Apocalipse 18:4.a Taha parimhã atsima robdzanhamri aba ãhã dadzadanharĩ ãma piꞌrebamhã:
Danhimidzadze ĩꞌuptabiꞌõ norĩ te dama tsadawa hapetse dzaꞌra. Taha wa Ropotoꞌwa te tsima wẽ te te daꞌapawaptob da õ norĩ hawi dawairébé da. E niha te ãma ĩrotsaꞌra.
7. Ãma udzutsi Ropotoꞌwai ãma romnhoré na hã
E a hã te dza aiꞌré Ropotoꞌwa nhiti, danhimidzadze ĩꞌuptabiꞌõ norĩ te te ĩꞌmanharĩ watsété dzaꞌra dzéb uꞌöbö. Ãma rotsaꞌrata, daꞌra timama nhimiroti te te ĩtsadawa dzamarĩ õ na. Tinhorõwa hawi te dza watobro duré tiwatsété na te dza ꞌre nomro. Damama ma wẽ õ di tiꞌra te te ĩꞌmanharĩdzé. E damama te hã ĩꞌupa ĩꞌra te te ĩꞌmanharĩdzém na.
E Jeová ãma wa dza romnhoré rẽme dzaꞌra ni ĩꞌupa ĩte newa danhimidzadze ĩꞌuptabiꞌõ norĩ te te ĩꞌmanharĩ watsété dzaꞌra dzéb uꞌöbö.
NIꞌWAM NORĨ TE NHARĨ DZAꞌRA ÃNE: “Uburé danhimidzadze norĩ wẽ di. Ropotoꞌwa mitsi haré.”
E ãne te ĩrotsaꞌra.
Danhimidzadze ĩꞌahö norĩ tsiwatsuꞌu dzaꞌra nherẽ Ropotoꞌwai ãma ĩwata dzaꞌra na hã, e marĩ wa Ropotoꞌwai ma wẽ õ di uburé danhimidzadze norĩ.
ĨWAIHUꞌUDZÉ HÃ
Danhimidzadze ĩꞌuptabiꞌõ norĩ tinhimirowahutu uptabiꞌõ na duré tinhimiꞌmanharĩ watsété dzaꞌra dzém na te daꞌãma ropé dzaꞌra Ropotoꞌwa nhiti. Romhutu na Ropotoꞌwa te dza uprotsi danhimidzadze ĩꞌuptabiꞌõ norĩ.
Ãma aipoꞌre puꞌu
E niha te ĩrotsaꞌra danhimidzadze ĩꞌuptabiꞌõ norĩ nhimirowahutu na duré te te ĩꞌmanharĩ dzaꞌra dzém na.
E niha Jeová te rotsaꞌrata danhimidzadze ĩꞌuptabiꞌõ norĩ ãma.
E marĩ Ropotoꞌwa te dza ꞌmanha danhimidzadze ĩꞌuptabiꞌõ norĩ ma.
TSÔ AIRĨTĨ DURÉ
ꞌMadöꞌö maparane ĩböiꞌõ danhimidzadze ĩꞌuptabiꞌõ norĩ te te ĩꞌmanharĩ dzaꞌra.
“E uburé danhimidzadze norĩ Ropotoꞌwai ma wẽ di.” (Ĩtsihötödzé jw.org na)
E marĩ wa, Jeová te tsima wẽ tsimitsutu na ãma wawata dzaꞌra da.
“E datsiré ĩꞌatsiꞌrãꞌõtõ da tsi Ropotoꞌwai ãma aiwata da.” (Ĩtsihötödzé jw.org na)
ꞌMadöꞌö aibö ĩtsaꞌrataꞌwa na aré ꞌre ĩhöimana mono watsuꞌu. Tãma hã marĩ ĩꞌupa ĩré hã rowahutudzéb ꞌremhã. Tane nherẽ Ropotoꞌwa nhimirowahutu uptabi dzô te ꞌre rĩtĩ uꞌötsi mono.
“E marĩ wa ĩtsaꞌrataꞌwa ma tô tirẽ ĩtsaꞌrata ꞌri. (Atsimidzaꞌretse!, fevereiro 2015 na)
Wahub ahö na danhimidzadze norĩ te dama ꞌre tsadawa nhipetse dzaꞌra Ropotoꞌwai ãma. Taha wa, daꞌahö na te rotsaꞌrata dzaꞌra ni Ropotoꞌwa daꞌãma ĩpẽꞌẽdzéꞌõ na hã duré ĩhöimana watsété na hã. ꞌMadöꞌö e marĩ wa tahã tô tsenai õ di.
a Ropotoꞌwai mreme te ãma tsimiréꞌé danhimidzadze ĩꞌuptabiꞌõ norĩ piꞌõ ne. Te duré tinha ãhã piꞌõ nhitsi na hã Babilônia ꞌri nhoꞌõmo dzaꞌẽtẽ na hã. Waihuꞌu da e marĩ wa, ꞌmadöꞌö Ãma ĩrowatsuꞌudzé 1.