ROMNHORÉ 39
E niha Ropotoꞌwa nhimirotsaꞌrada dawapru na hã.
Dawapru ĩpire uptabi. Wawaprui ãna ꞌre wahöimana dzaꞌra mono õ di aré. Te te dapoto wa, Ropotoꞌwai ma ĩꞌrudzahi te tãma ꞌre höimana te te pitsutu da dawapru na hã da te ĩꞌmanharĩdzéb da hã. E marĩ õ hã, te tinha dawapru na hã. E ĩbö dawapru na watsaihuri da duré ãma wahöimana dzaꞌra da wawede na hã. E niha a hã, te dza ĩpitsutu wẽ taha ãma.
1. E niha Jeová nhimirotsaꞌrada dawapru na.
Duréihã, Jeová te tinha tinhibꞌaꞌuwẽ norĩ ma: ‘Dawapru na te ãma ꞌre dahöimana dzaꞌra.’ (Gênesis 9:4) Jeová ma, dawapru te watsuꞌu dahöimanadzé. Dahöimanadzé hã ĩpe hã, tawamhã dawapru ĩpetse dzama.
2. E marĩ Ropotoꞌwa ma tô dawi tsawi dawapru na da te ꞌmanharĩ tõ da.
Tsuru na Tã pĩni wawẽ parimhã, Jeová ma tô tiꞌru tinhibꞌaꞌuwẽ norĩ ma dawapru na tsaihuri tõ da. Duré ma tô ãma tsahu tinhimiroti na Israel nhihudu norĩ ma. (Tsõré na Gênesis 9:4.) Wahub ahö parimhã, ma tô apö ãma tsahu tinhimiroti na Jesus dzadawa dzamarĩꞌwa ĩmorĩꞌrata norĩ ma. Duréihã, Rowairébéꞌwai ubumro hã ma tô dama roti ãne: “ꞌRe atsiwẽꞌõ dzaꞌra waꞌaba mono dawapru na hã.” — Tsõré na Atos 15:28, 29 TNM.
E niha dawapru na wa dza watsiwẽꞌõ dzaꞌra ni. Ãma rotsaꞌrata aꞌö: Dawedeꞌwa te aima tinha ödzé na atsiwẽꞌõ da. Taha dzarina, e a hã te aré ĩhöꞌrẽ. Mare di. Tadzahã, e datsa ödzé ré na hã te aré atsa, niwamhã e te aré atsiwaꞌré ödzé na hã. Mare uptabi di. Aiwaptsi, ãne duré Ropotoꞌwa nhimiroti dzarina dawapru na watsiwẽꞌõ dzaꞌra da, dawapru wa te öhuri õ di dza, duré romnhi ĩwapru daꞌwariꞌõ aꞌö ãma watsaihuri õ di dza, duré datsa ĩwaprui ré na watsaihuri õ di dza.
Dawede hã dawapru na bété. Nimahã ãma ꞌre ĩdawede dzaꞌra hã ĩböiꞌõ Ropotoꞌwa nhimiroti dzarina. Ĩböiꞌõ dawapru na dawaꞌredzé niwamhã ĩwaꞌõtõ na dawaꞌredzé: dawapru ĩwaꞌõtõre ĩpré, dawapru ĩwaꞌõtõre ĩꞌa, dawapru tobtodzé, duré dawaprui waꞌu.a Tadzahã, nimahã na hã tsadaihuꞌu pire di dawede hã Ropotoꞌwa nhimiroti dzarina ĩbö dzô. Ãma ĩtsimiré, nimahã ãma ꞌre ĩdawede dzaꞌra ꞌremhã ĩré hã dawaprui waꞌõtõ poꞌo norĩ hã duré nima norĩ ꞌremhã ĩré hã datsiwapru hã. Wa te ĩꞌmanharĩ dzaꞌra da hã wa te pitsutu dzaꞌra wamhã, watsiꞌuihö na wa dza pitsutu dzaꞌra ni.b — 2 Coríntios 5:10.
WAIHUꞌU DURÉ
Te dza ĩꞌmadö e marĩ dzarina ĩpitsutu da hã ãma atsiwede da hã.
3. Dawede hã pitsutu Jeová ma rowẽ da
E niha te dza ĩpitsu dawede hã ĩhöimana hã Ropotoꞌwa nhimirotsaꞌrata dzarina dawapru na. ꞌMadöꞌö aba ĨROPODO. Taha parimhã atsima robdzanhamri aba e marĩ wa, ĩpire ta norĩ hã wa te tsadawa dzamarĩ dzaꞌra da:
Rowaihuꞌu dzô rowaptẽrẽ. — Tiago 1:5.
Romnhoré na Bíblia nhimirowahutu nhimidzaprõni norĩ na duré ꞌröwi rotsaꞌrata e niha te dza ĩtsarina ꞌre aihöimana. — Provérbios 13:16.
Uptsibi me na e mahã ahö na dawededzéb da hã ĩré hã airob ãma hã.
Atsima waihuꞌu dawede da hã atsima ĩwẽꞌõ petse da tsi.
ꞌRöwi rotsaꞌrata atsimipitsutu dzarina atsitsãmridzé hã dza wapu dzô. — Atos 24:16.c
Ãma aipoꞌre puꞌu: marĩ atsitsãmridzéb dzarina pitsutu da wamhã, niꞌwa aiꞌupana te te pitsutu õ di dza, aimro nherẽ, daꞌmadöꞌöꞌwa nherẽ duré Bíblia na aima rowahutuꞌwa nherẽ. — Romanos 14:12.
Tsihötö atsimipitsutudzé da te ãma waihuꞌu dzaꞌra da.
4. Jeová Watsuꞌuꞌwa norĩ te tsô tirĩtĩ dzaꞌra dawede hã danhipai u ĩwẽ dzô
Tsada hã dawede hã ĩwẽ uptabi dawaprui ãna wa te tsõpẽtẽ dzaꞌra da Ropotoꞌwa nhimiroti dawapru na wa te tsadawa rẽme dzaꞌra ãna. ꞌMadöꞌö aba ĨROPODO.
Atsiré tsõré aba Tito 3:2. Taha parimhã atsima robdzanhamri aba ãhã dadzadanharĩ ãma piꞌrebamhã:
E marĩ wa, ĩwadzém na duré atãma na wa dza robdzanhamri dzaꞌra ni dawedeꞌwa norĩ ma.
Wa dza wẽꞌõ dzaꞌra ni |
Watsitsãmridzéb dzarina wa dza pitsutu dzaꞌra ni |
|---|---|
A. Dawaprui waꞌu |
Dawaprui waꞌu poꞌo norĩ |
B. Dawaprui waꞌõtõre ĩꞌa |
Dawaprui waꞌõtõre ĩꞌa poꞌo norĩ |
C. Dawapru tobtodzé |
Dawapru tobtodzé poꞌo norĩ |
D. Dawaprui waꞌõtõre ĩpré |
Dawaprui waꞌõtõre ĩpré poꞌo norĩ |
5. Atsiꞌuihö na pitsutu dawaprui waꞌõtõ poꞌo norĩ dza atsima wẽ dzô
Dawaprui ꞌremhã maparane tsiꞌuiwana ĩpire norĩ ĩré hã: dawaprui waꞌõtõre ĩpré, dawaprui waꞌõtõre ĩꞌa, dawapru tobtodzé, duré dawaprui waꞌu. Ĩwaꞌõtõ mono bö ĩré hã ĩpo ĩtsuru norĩ ĩꞌmahörö dzaꞌra dawapru poꞌo norĩ na.d Nimahã dawede norĩ ꞌremhã ĩré hã dawapru poꞌo norĩ dahödzé wi, niwamhã dawaprui watobrodzé wi.
Wahöiba mono bö wa dza watsiꞌuihö na pitsutu dzaꞌra ni watsitsãmridzé Ropotoꞌwai mreme na ĩprédub dzarina dawaprui waꞌõtõ poꞌo norĩ dza wa te watsima wẽ dzaꞌra dzô. Ãté niꞌwam norĩ te dza wẽꞌõ dzaꞌra dawede hã dawaprui waꞌõtõ poꞌo norĩ ré, duré ãté niꞌwam norĩ te dza tsima wẽ dzaꞌra.
Pitsutu wana ré, ꞌröwi rotsaꞌrata:
E niha wa dza ãma rowatsuꞌu dawedeꞌwai ma dza te ĩwẽꞌõ na hã niwamhã dza te ĩ̱tsima wẽ na hã nimahã dawaprui waꞌõtõ poꞌo norĩ.
NIꞌWA TE TE ATSADANHARĨ WAMHÃ BÉTÉ: “E marĩ wa, ĩböiꞌõ dawapru na dawaꞌredzé.”
E marĩ te dza ĩnha.
ĨWAIHUꞌUDZÉ HÃ
Jeová te tsima wẽ dawapru wa te wadzéb dzaꞌra da.
Ãma aipoꞌre puꞌu
E marĩ wa dawapru ĩpe Jeová ma.
E marĩ dzarina wama waihuꞌu petse dzaꞌra di Ropotoꞌwa te te dawi ĩtsawi na hã dawapru na dawaꞌredzé.
E niha wa dza pitsutu wẽ dzaꞌra ni dawede ĩhöimana hã Ropotoꞌwai nhimirotsaꞌrata dzarina dawapru na.
TSÔ AIRĨTĨ DURÉ
E marĩ na te dza ĩrotsaꞌra pitsutu wana ré dza atsima wẽ dzô datsiwede aiwaprui ré.
“Ĩtsõréꞌwa nhimidzadanharĩ norĩ” (Roꞌmadöꞌöꞌwa, 15 outubro na, 2000 na)
E marĩ na te dza ĩrotsaꞌra pitsutu wana ré dza atsima wẽ dzô dawaprui waꞌõtõ poꞌo norĩ.
“Ĩtsõréꞌwa nhimidzadanharĩ norĩ” (Roꞌmadöꞌöꞌwa, 15 junho na, 2004 na)
E marĩ ma pawapto dawedeꞌwa te te tsadze da Jeová nhimirotsaꞌrada hã dawapru na hã ĩbö na hã.
ꞌMadöꞌö e niha daꞌmadöꞌöꞌwa norĩ te te ĩromhuri dzaꞌra, dawedeꞌwai ma te te ĩrobdzanhamri dzaꞌra norĩ ubumroi ꞌremhã te pawaptob dzaꞌra watsitsãnawã norĩ duré wahidiba norĩ.
a Dawaprui waꞌõtõ norĩ nhitsi: dawapru ĩwaꞌõtõre ĩpré — glóbulos vermelhos; dawapru ĩwaꞌõtõre ĩꞌa — glóbulos brancos; dawapru tobtodzé — plaquetas; dawaprui waꞌu — plasma.
b ꞌMadöꞌö romnhoré hã 35: “E marĩ te dza wapawaptob dzaꞌra wa te pitsutu wẽ dzaꞌra wahöimanadzém na.”
c ꞌMadöꞌö ĩwaꞌõno 5: “Dawapru poꞌo norĩ: atsiꞌuihö na pitsutu”duré, Ãma Ĩrowatsuꞌudzé 3: “Dawede norĩ hã dawaprui ré.”
d Nimahã dawedeꞌwa norĩ te ꞌmahörö dzaꞌra maparane tsiꞌuiwana dawaprui waꞌõtõ norĩ dawapru poꞌo na. Tawamhã tsõꞌawi te dza ãma ĩrowatsuꞌu dawedeꞌwai ma atsima ĩwẽ õ na hã: dawaprui wahuré, dawaprui waꞌõtõre ĩpré, dawaprui waꞌõtõre ĩꞌa, dawapru tobtodzé duré dawaprui waꞌu.