Levitikus
4 Wahlabela mgama uYehova ethetha kuMoses, esithi: 2 “Thetha koonyana bakaSirayeli, uthi, ‘Ukuba kwenzekile umphefumlo+ wona ngempazamo+ kuyo nayiphi na yezinto uYehova ayalele ukuba zingenziwa, wenza enye kuzo:
3 “‘Ukuba umbingeleli, umthanjiswa,+ uthe wona+ waza wabazisela ityala abantu, ngoko umele asondeze kuYehova ngenxa yesono sakhe+ asenzileyo ithole lenkomo eliyinkunzi eliphilileyo libe ngumnikelo wesono. 4 Umele ayizise inkunzi yenkomo emnyangweni wentente yokuhlangana+ phambi koYehova aze abeke isandla sakhe phezu kwentloko yenkunzi yenkomo,+ yaye umele ayixhele inkunzi yenkomo leyo phambi koYehova. 5 Kwaye umbingeleli, umthanjiswa,+ umele athabathe egazini lenkunzi yenkomo, alizise ententeni yokuhlangana; 6 yaye umbingeleli umele awuthi nkxu umnwe wakhe+ egazini aze atshize ngenxalenye yegazi elo izihlandlo ezisixhenxe+ phambi koYehova phambi kwekhuselo lendawo engcwele. 7 Kwaye umbingeleli umele ayiqabe inxalenye yegazi ezimpondweni+ zesibingelelo sesiqhumiso sobulawu phambi koYehova, esisententeni yokuhlangana, aze lonke elinye igazi lenkunzi yenkomo aligalele esisekweni+ sesibingelelo somnikelo otshiswayo, esisemnyango wentente yokuhlangana.
8 “‘Makawasuse onke amanqatha enkunzi yenkomo yomnikelo wesono, umhlehlo ogubungele amathumbu, namanqatha onke asemathunjini,+ 9 nezintso zombini nenqatha lazo, neliselusendweni. Wona umhlehlo ophezu kwesibindi, wowususa kunye nezintso.+ 10 Makususwe oku njengoko kusenziwa kwinkunzi yenkomo yombingelelo wobudlelane.+ Yaye umbingeleli umele aqhumisele ngawo esibingelelweni somnikelo otshiswayo.+
11 “‘Kodwa sona isikhumba senkunzi yenkomo nenyama yayo yonke ndawonye nentloko yayo namanqina ayo namathumbu ayo nomswane wayo,+ 12 yonke inkunzi leyo yenkomo umele ayikhuphele ngaphandle kwenkampu+ kwindawo ehlambulukileyo apho kugalelwa khona uthuthu olunamafutha,+ aze ayitshise phezu kweenkuni ngomlilo.+ Mayitshiswe apho kugalelwa khona uthuthu olunamafutha.
13 “‘Ke ukuba indibano iphela yakwaSirayeli ithe yenza impazamo+ kwaza kwafihlakala oko emehlweni ebandla, yenza enye yezinto zonke uYehova ayalele ukuba zingenziwa yaza ke ngoko yaba netyala,+ 14 saziwa isono esenzileyo,+ ngoko ibandla limele lisondeze ithole lenkomo eliyinkunzi libe ngumnikelo wesono lize lilizise phambi kwentente yokuhlangana. 15 Yaye amadoda amakhulu endibano amele abeke izandla zawo phezu kwentloko yenkunzi yenkomo+ phambi koYehova, kwaye inkunzi leyo yenkomo imele ixhelwe phambi koYehova.
16 “‘Ngoko ke umbingeleli, umthanjiswa,+ umele azise inxalenye yegazi lenkunzi yenkomo ententeni yokuhlangana.+ 17 Yaye umbingeleli umele awuthi nkxu umnwe wakhe egazini aze atshize ngalo izihlandlo ezisixhenxe phambi koYehova phambi kwekhuselo.+ 18 Kwaye umele ayiqabe inxalenye yegazi ezimpondweni zesibingelelo+ esiphambi koYehova, esisententeni yokuhlangana; aze lonke elinye igazi aligalele esisekweni sesibingelelo somnikelo otshiswayo,+ esisemnyango wentente yokuhlangana. 19 Umele awasuse onke amanqatha kuwo, aze aqhumisele ngawo esibingelelweni.+ 20 Makenze kule nkunzi yenkomo kanye njengoko enzile kwinkunzi yenkomo yomnikelo wesono. Uya kwenjenjalo nakule; aze umbingeleli abacamagushele,+ bandule ke baxolelwe. 21 Woyikhuphela inkunzi yenkomo ngaphandle kweminquba yenkampu aze ayitshise, kanye njengoko wayitshisayo inkunzi yenkomo yokuqala.+ Ngumnikelo wesono webandla ke lowo.+
22 “‘Xa kuthe kona isikhulu,+ sathi singaqondanga senza enye yezinto zonke uYehova uThixo waso ayalele ukuba zingenziwa,+ saza ke saba netyala, 23 okanye saziswa ngesono saso esisenzileyo nxamnye nomyalelo,+ ngoko simele sizise njengomnikelo waso itakane lebhokhwe eliliduna,+ eliphilileyo. 24 Yaye simele sibeke isandla saso phezu kwentloko+ yetakane elo lebhokhwe size silixhelele apho kuxhelelwa khona rhoqo umnikelo otshiswayo phambi koYehova.+ Ngumnikelo wesono ke lowo.+ 25 Umbingeleli wocaphula egazini lomnikelo wesono ngomnwe wakhe aze aliqabe ezimpondweni+ zesibingelelo somnikelo otshiswayo, yaye elinye igazi lawo woligalela esisekweni sesibingelelo somnikelo otshiswayo. 26 Uya kuqhumisela ngamanqatha awo onke esibingelelweni njengamanqatha ombingelelo wobudlelane;+ aze umbingeleli asicamagushele ngesono saso,+ sandule ke sixolelwe.
27 “‘Ukuba nawuphi na umphefumlo ebantwini belizwe uthe wona ungaqondanga ngokwenza enye yezinto uYehova ayalele ukuba zingenziwa waza waba netyala,+ 28 okanye waziswa ngesono sawo osenzileyo, ngoko umele uzise njengomnikelo wawo itakane lebhokhwe elilithokazi,+ eliphilileyo, ngenxa yesono sawo osenzileyo. 29 Yaye umele ubeke isandla sawo phezu kwentloko+ yomnikelo wesono uze uwuxhelele umnikelo wesono kwindawo enye neyomnikelo otshiswayo.+ 30 Umbingeleli wocaphula egazini lawo ngomnwe wakhe aze aliqabe ezimpondweni+ zesibingelelo somnikelo otshiswayo, yaye lonke elinye igazi lawo woligalela esisekweni sesibingelelo.+ 31 Wowasusa onke amanqatha awo,+ kanye njengokususwa kwamanqatha ombingelelo wobudlelane;+ aqhumisele ngawo umbingeleli esibingelelweni abe livumba elithozamisayo kuYehova;+ aze umbingeleli awucamagushele, wandule ke uxolelwe.+
32 “‘Kodwa ukuba uzisa imvana+ njengomnikelo wawo wesono, ufanele uzise imvana elithokazi eliphilileyo.+ 33 Yaye umele ubeke isandla sawo phezu kwentloko yomnikelo wesono uze uyixhele njengomnikelo wesono kwindawo enye nekuxhelelwa kuyo rhoqo umnikelo otshiswayo.+ 34 Umbingeleli wocaphula egazini lomnikelo wesono ngomnwe wakhe aze aliqabe ezimpondweni zesibingelelo somnikelo otshiswayo,+ yaye lonke elinye igazi lawo woligalela esisekweni sesibingelelo. 35 Wowasusa onke amanqatha awo njengokususwa rhoqo kwamanqatha etakane legusha eliyinkunzi lombingelelo wobudlelane, aqhumisele ngawo umbingeleli esibingelelweni phezu kweminikelo kaYehova yasemlilweni;+ aze umbingeleli awucamagushele+ ngesono sawo osenzileyo, wandule ke uxolelwe.+