Hezekile
26 Ngonyaka we-11, ngomhla wokuqala kuloo nyanga, kwafika ilizwi likaYehova kum, lisithi: 2 “Nyana womntu, ngenxa yokuba iTire ithe ngeYerusalem,+ ‘Heke! Zaphukile iingcango zezizwana!+ Zonke izinto ziza kuza kum, ibe ndiza kuba sisityebi njengokuba itshatyalalisiwe.’ 3 Ithi iNkosi enguMongami uYehova: ‘Ndilwa nawe Tire, yaye ndiza kuzisa iintlanga ezininzi zikuhlasele, kanye njengokuba ulwandle lunyusa amaza alo. 4 Ziza kuzonakalisa iindonga zaseTire zize zizidilize iinqaba zayo,+ yaye mna ndiza kuwususa umhlaba wayo, ndiyenze ibe liliwa elimenyezelayo. 5 Iza kuba yindawo yokomisa iminatha erhuqwayo phakathi kolwandle.’+
“‘Kuba mna ndithethile,’ itsho iNkosi enguMongami uYehova, ‘kwaye iintlanga ziza kuzoxutha izinto zayo. 6 Needolophu zayo* ezisemaphandleni ziza kuxatyelwa ngekrele, batsho bazi abantu ukuba ndinguYehova.’
7 “Kuba ithi iNkosi enguMongami uYehova: ‘ITire ndiza kuyithumela ngoKumkani uNebhukadenetsare* waseBhabhiloni evela ngasemntla;+ ungukumkani wookumkani,+ unamahashe,+ iinqwelo zokulwa,+ amajoni akhwele emahasheni nomkhosi wamajoni amaninzi.* 8 Iidolophu zakho ezisemaphandleni uza kuzitshabalalisa ngekrele, yaye uza kwakha udonga lokurhangqa nethambeka lokuhlasela aze amise ikhaka elikhulu. 9 Uza kudiliza iindonga zakho ngezixhobo zakhe,* awise iinqaba zakho ngamazembe* akhe. 10 Amahashe akhe aza kuba maninzi kangangokuba uthuli lwawo luza kukogquma, yaye isandi samajoni akhwele amahashe, esamavili neseenqwelo zokulwa, siza kuzinyikimisa iindonga zakho xa engena ngeegeyithi zakho, okwamadoda ambonzeleka esixekweni esineendonga ezidiliziweyo. 11 Iimpuphu zamahashe akhe ziza kuzinyathela zonke izitrato zakho;+ uza kubabulala ngekrele abantu bakho, neentsika zakho ezomeleleyo ziza kuwa bhuma phantsi. 12 Baza kuzoxutha izinto zakho, bayoxuthe impahla oyithengisayo,+ bazichithe iindonga zakho, baze badilize izindlu zakho ezintle; emva koko baza kuwaphosa emanzini amatye akho, izinto zakho ezenziwe ngomthi nomhlaba wakho.’
13 “‘Ndiza kuyiphelisa ingxolo yeengoma zakho, nesandi seehadi zakho asizukuphinda sivakale.+ 14 Ndiza kukwenza iliwa elimenyezelayo, ibe uza kuba yindawo yokomisa iminatha erhuqwayo.+ Soze uphinde wakhiwe, kuba mna Yehova, ndithethile,’ itsho iNkosi enguMongami uYehova.
15 “Ithi iNkosi enguMongami uYehova kwiTire: ‘Xa kuvakala isandi sokuwa kwakho, xa begcuma abafayo,* xa bebulawa ngobundlobongela phakathi kwakho, azizukunyikima na iziqithi?+ 16 Zonke iinkosana zolwandle ziza kuhla ezitroneni zazo, zikhulule izambatho zazo,* zizihlube iimpahla zazo ezihonjisiweyo, zize zingcangcazele. Ziza kuhlala phantsi emhlabeni zityhwatyhwe* zize zikujonge zithe manga.+ 17 Ziza kukuculela ingoma yokuzila+ zisithi:
“Hayi indlela otshabalele ngayo,+ wena ekwakuhlala abantu baselwandle kuye, isixeko esidunyiswayo;
Wena nabemi bakho nanibakhulu* elwandle,+
Nisoyikisa bonke abemi bomhlaba!
18 Iziqithi ziza kungcangcazela ngemini yokuwa kwakho,
Iziqithi eziselwandle ziphazamiseke xa ungasekho.”’+
19 “Kuba ithi iNkosi enguMongami uYehova: ‘Xa ndikuphanzisa njengezixeko ezingenabemi, xa ndikugubungela ngamanzi anzulu, amaninzi,+ 20 ndiza kukuhlisa nabo behlayo baye emngxunyeni* kubantu bakudala; ndiza kukwenza uhlale kweyona ndawo isezantsi, enjengeendawo zakudala eziye zatshatyalaliswa, kunye nabo behlayo baye emngxunyeni,+ ukuze kungabikho mntu uhlalayo kuwe. Emva koko ndiza kulizukisa* ilizwe labaphilayo.
21 “‘Ndiza kukuzisela intlekele ngesiquphe, ungabikho.+ Baza kukukhangela, kodwa soze uphinde ufumaneke,’ itsho iNkosi enguMongami uYehova.”