Eyokuqala YeziKronike
13 UDavide wabhunga nabaphathi bamawaka nabamakhulu, nazo zonke iinkokheli.+ 2 Emva koko uDavide wathi kwibandla lonke likaSirayeli: “Ukuba kubonakala kulungile kuni yaye kwamkelekile kuYehova uThixo wethu, masithumele ilizwi kubantakwethu abashiyekileyo kuzo zonke iingingqi zakwaSirayeli nakubabingeleli nabaLevi abakwizixeko+ ezinamadlelo, sibabize beze kuthi. 3 Masibuyise iTyeya+ kaThixo.” Kaloku babengazange bayihoye ngemihla kaSawule.+ 4 Lonke ibandla lavuma ukuyenza loo nto, kuba yayibonakala ilungile kubo bonke abantu. 5 Ngoko uDavide waqokelela wonke uSirayeli ukususela kumlambo waseYiputa* ukuya eLebho-hamati,*+ ukuze kulandwe iTyeya kaThixo wokwenene eKiriyati-yarim.+
6 UDavide naye wonke uSirayeli benyuka baya eBhahala,+ eKiriyati-yarim yakwaYuda, beyokuthatha iTyeya kaThixo wokwenene uYehova, ohleli etroneni entla* kweekherubhi,+ apho libizwa khona igama lakhe. 7 Kodwa bayikhwelisa kwinqwelo entsha+ iTyeya kaThixo wokwenene baza bayithatha endlini ka-Abhinadabhi, yaye le nqwelo+ yayikhokelwa ngu-Uza noAhiyo. 8 UDavide naye wonke uSirayeli babebhiyoza phambi koThixo wokwenene ngamandla abo onke, ngeengoma, ngeehadi, ngemirhubhe, ngamagubu,+ ngamacangci+ nangamaxilongo.+ 9 Bathe bakufika kwibala lokubhula likaKidon, u-Uza wolula isandla sakhe, wabamba iTyeya, kuba iinkomo zaphantse zayiwisa. 10 U-Uza wamcaphukisa uYehova ngokwenza loo nto, wambetha kuba olulele isandla sakhe kwiTyeya,+ waza wafela apho phambi koThixo.+ 11 Kodwa uDavide wacaphuka* ngenxa yokuba uYehova eye wambetha ngomsindo u-Uza, yaza loo ndawo yabizwa ngokuba yiPeretse-uza* kude kube namhlanje.
12 Ngoko uDavide wamoyika uThixo wokwenene ngaloo mini waza wathi: “Ndingayizisa njani iTyeya kaThixo wokwenene kum?”+ 13 UDavide akazange ayizise kwisiXeko SikaDavide iTyeya, apho wayekho, kodwa wathi mayisiwe kwindlu kaObhedi-edom umGati. 14 ITyeya kaThixo wokwenene yahlala nabendlu kaObhedi-edom. Yahlala endlini yakhe iinyanga ezintathu, ibe uYehova waqhubeka eyisikelela indlu kaObhedi-edom nayo yonke into awayenayo.+