INtshumayeli
6 Nantsi enye intlungu* endiyibonileyo phantsi kwelanga, exhaphakileyo ebantwini: 2 UThixo wokwenene unika umntu ubutyebi nozuko, ukuze abe nayo yonke into ayifunayo; kodwa uThixo wokwenene akamniki ithuba lokuzonwabela ezo zinto, endaweni yoko zifunyanwa ngumntu wasemzini. Loo nto ililize nentlungu engathethekiyo. 3 Ukuba umntu unokuba nabantwana abalikhulu aze aphile iminyaka emininzi ade abe lixhego, kodwa angazonwabeli izinto zakhe ezintle engekangeni engcwabeni,* manditsho ukuthi umntwana ozelwe efile ungcono kunaye.+ 4 Kuba kulilize ukuza kwakhe yaye umka ebumnyameni, ibe igama lakhe logqunywe bubumnyama. 5 Nangona engazange walibona ilanga, futhi engazange azi nto, ungcono kunaloo* mntu.+ 6 Kunceda ngantoni ukuphila iminyaka eliwaka ngokuphindwe kabini kodwa ungayonwabeli? Andithi kaloku bonke baya ndaweni-nye?+
7 Kuko konke ukusebenza nzima kwakhe, umntu usebenzela ukugcwalisa umlomo;+ kodwa akaze anele. 8 Kuba isilumko sisogqitha ngantoni isidenge,+ okanye kulinceda ngantoni ihlwempu ukwazi indlela yokuziphilisa?* 9 Kungcono ukonwabela into oyibona ngamehlo kunokufunana nezinto ozinqwenelayo. Nayo leyo ililize, nokuleqana nomoya.
10 Yonke into ekhoyo sele ilithiyiwe igama, nento ayiyo umntu sele isaziwa kakade; ibe akanakukwazi ukuphikisana nalowo* unamandla kunaye. 11 Okukhona esiba maninzi amazwi,* kokukhona esiba lilize; ibe amnceda ngantoni ke umntu? 12 Ngubani oyaziyo eyona nto ibhetele anokuyenza umntu ebomini ngezi ntsuku zimbalwa zobomi bakhe obulilize, ezithi shwaka njengesithunzi?+ Kuba ngubani onokumxelela umntu oko kuza kwenzeka phantsi kwelanga emva kokumka kwakhe?