Eyokuqala YeziKronike
20 Ekuqaleni konyaka,* xa ookumkani bedla ngokuyokulwa iimfazwe, uYowabhi+ wakhokela umkhosi waza walivuthulula ilizwe lama-Amoni. Emva koko waya kurhangqa iRabha,+ ngoxa uDavide washiyeka eYerusalem.+ UYowabhi wayihlasela iRabha waza wayidiliza.+ 2 Emva koko uDavide wasithatha isithsaba sikaMalekam kwintloko yakhe, waza wafumanisa ukuba ubunzima baso babuyitalente* yegolide, yaye sasinamatye axabisekileyo, saza sabekwa entloko kuDavide. Wathatha nezinto ezininzi ezixabisekileyo kweso sixeko.+ 3 Wabakhupha abantu ababekweso sixeko ukuze basarhe amatye,+ basebenze ngezixhobo ezibukhali, nangamazembe entsimbi, benze nezitena. Wenza ngaloo ndlela uDavide kuzo zonke izixeko zama-Amoni. Ekugqibeleni, yena nawo onke amajoni babuyela eYerusalem.
4 Emva koko, kwaliwa namaFilisti eGezere. Ngelo xesha uSibhekayi+ umHusha waxabela uSipayi owayeyinzalelwane yamaRefa,+ yaye amaFilisti oyiswa.
5 Kwaphinda kwabakho imfazwe namaFilisti, waza uElihanan unyana kaYayire waxabela uLami umntakwaboGoliyati+ umGati, owayenomkhonto owawufana nomphini wabaluki.+
6 Kwaphinda kwabakho imfazwe eGati,+ apho kwakukho indoda enkulu ngokungaqhelekanga,+ ineminwe eyi-6 esandleni ngasinye neenzwane eziyi-6 elunyaweni ngalunye, iyi-24 iyonke, ibe nayo le ndoda yayiyinzalelwane yamaRefa.+ 7 Yayisoloko imngcungcuthekisa uSirayeli.+ Ngoko uYonatan unyana kaShimeya,+ umntakwaboDavide, wayixabela.
8 Aba babeziinzalelwane zamaRefa+ eGati,+ yaye bafa bebulawa nguDavide nezicaka zakhe.