Hezekile
37 Isandla sikaYehova saba phezu kwam, waza uYehova ngomoya wakhe wandibeka phakathi ethafeni elisentlanjeni+ elaligcwele amathambo. 2 Wandijikelezisa phakathi kwawo, ibe ndabona indlela awayemaninzi ngayo amathambo athe saa ethafeni elisentlanjeni, futhi ome nko.+ 3 Wandibuza: “Nyana womntu, angaphinda aphile na la mathambo?” Ndathi: “Nkosi enguMongami Yehova, nguwe owaziyo.”+ 4 Wathi kum: “Profeta phezu kwala mathambo, uthi kuwo, ‘Mathambondini omileyo, yivani ilizwi likaYehova:
5 “‘Ithi iNkosi enguMongami uYehova kula mathambo: “Ndiza kungenisa impefumlo kuni, niphile.+ 6 Ndiza kunifaka imisipha nenyama, ndinambathise ngolusu, ndinifake impefumlo, niphile; ibe niza kutsho nazi ukuba ndinguYehova.”’”
7 Ndaprofeta kanye njengokuba ndandiyalelwe. Ndathi ndigqiba nje ukuprofeta kwabakho ingxolo, isandi sokurhashaza, namathambo aqalisa ukusondelelana, ithambo lisithi nca kwelinye. 8 Ndabona imisipha nenyama zibekwa phezu kwawo, aza ambathiswa ngolusu. Kodwa ayengekabi nayo impefumlo.
9 Emva koko wathi kum: “Profeta kumoya. Profeta nyana womntu uthi kumoya, ‘Ithi iNkosi enguMongami uYehova: “Yiza moya,* uvela kuyo yomine imimoya, uvuthuze phezu kwaba bantu babuleweyo, ukuze baphile.”’”
10 Ngoko ndaprofeta kanye njengokuba wayendiyalele, kwaza kwangena impefumlo* kuwo, aphila, ema ngeenyawo,+ angumkhosi omkhulu.
11 Wathi kum: “Nyana womntu, la mathambo yindlu kaSirayeli xa iyonke.+ Ithi, ‘Amathambo ethu omile, nethemba lethu litshabalele.+ Sitshabalele ngokupheleleyo.’ 12 Profeta uthi kuyo, ‘Ithi iNkosi enguMongami uYehova: “Ndiza kuwavula amangcwaba enu,+ ndinikhuphe kuwo bantu bam, ndinibuyisele kwilizwe lakwaSirayeli.+ 13 Niza kutsho nazi ukuba ndinguYehova xa ndivula amangcwaba enu, ndinikhupha kuwo bantu bam.”’+ 14 ‘Ndiza kunifaka umoya wam nize niphile,+ ibe ndiza kunihlalisa elizweni lenu; ukuze nazi ukuba mna Yehova, ndiyithethile ndaza ndayenza loo nto,’ utsho uYehova.”
15 Laphinda lafika ilizwi likaYehova kum, lisithi: 16 “Wena ke nyana womntu, thatha intonga uze ubhale le nto kuyo, ‘EkaYuda namaSirayeli akunye naye.’*+ Uze uthathe nenye ubhale le nto kuyo, ‘EkaYosefu, intonga kaEfrayim nayo yonke indlu kaSirayeli ekunye naye.’*+ 17 Zidibanise ezi ntonga zibe yintonga enye esandleni sakho.+ 18 Xa abantu bakowenu* besithi kuwe, ‘Awuzukusixelela na ukuba zithetha ntoni ezi zinto?’ 19 yithi kubo, ‘Ithi iNkosi enguMongami uYehova: “Ndiza kuthatha intonga kaYosefu ekwisandla sikaEfrayim nezizwe zakwaSirayeli ezikunye naye, ndiyidibanise nentonga kaYuda; ndiza kuzenza intonga enye+ esandleni sam.”’ 20 Ezi ntonga uzibhalileyo mazibe sesandleni sakho ukuze bazibone.
21 “Emva koko yithi kubo, ‘Ithi iNkosi enguMongami uYehova: “Ndiza kuwalanda amaSirayeli phakathi kweentlanga aye kuzo, ndiwaqokelele esuka kuzo zonke iindawo ndize ndiwabuyisele elizweni lawo.+ 22 Ndiza kuwenza abe luhlanga olunye elizweni,+ ezintabeni zakwaSirayeli, aze alawulwe ngukumkani omnye onke,+ angaphindi abe ziintlanga ezimbini, angabi zizo nezizwe ezibini.+ 23 Awazukuphinda azingcolise ngezithixo zawo ezenyanyekayo, ngezinto azenzayo ezilizothe nangazo zonke izono zawo.+ Ndiza kuwasindisa kuzo zonke izono zawo zokungathembeki, ibe ndiza kuwacoca. Aza kuba ngabantu bam, nam ndibe nguThixo wawo.+
24 “‘“Umkhonzi wam uDavide uza kuba ngukumkani wawo,+ onke abe nomalusi omnye.+ Aza kuhamba ngezigwebo zam, aqiniseke ukuba ayayithobela imithetho yam.+ 25 Aza kuhlala elizweni endalinika uYakobi umkhonzi wam, apho kwakuhlala ookhokho benu,+ ahlale kulo ngonaphakade+ nabantwana* bawo, nabantwana babantwana bawo;+ noDavide umkhonzi wam uza kuba yinkosi yawo ngonaphakade.+
26 “‘“Ndiza kwenza isivumelwano soxolo nawo;+ eso sivumelwano siza kuhlala ngonaphakade. Ndiza kuwanika indawo yokuhlala, ndiwandise,+ ndize ndibeke ingcwele yam phakathi kwawo ngonaphakade. 27 Intente yam* iza kuba phakathi* kwawo. Ndiza kuba nguThixo wawo, nawo abe ngabantu bam.+ 28 Iintlanga ziza kutsho zazi ukuba mna Yehova ndimenza ngcwele uSirayeli xa ingcwele yam iphakathi kwakhe ngonaphakade.”’”+