Hezekile
13 Laphinda lafika ilizwi likaYehova kum, lisithi: 2 “Nyana womntu, profeta ngabaprofeti bakwaSirayeli,+ uze uthi kwabo baprofeta izinto ezibubuxoki,*+ ‘Liveni ilizwi likaYehova. 3 Ithi iNkosi enguMongami uYehova: “Baza kuthi shu abaprofeti abazizidenge, abalandela umoya wabo, kube kungekho nto bayibonileyo!+ 4 Abaprofeti bakho bafana neempungutye emabhodlweni, Sirayeli. 5 Anizukuya kwiintanda eziseludongeni lwendlu kaSirayeli nize nizingcibe,+ aze uSirayeli akwazi ukuqhubeka emile ngemini kaYehova yedabi.”+ 6 “Babone imibono yenkohliso baza baprofeta ubuxoki, abo bathi, ‘Uthi uYehova,’ abe uYehova engakhange abathume, baza balindela ukuba yenzeke into abayithethileyo.+ 7 Anibonanga mbono wenkohliso na naza naprofeta ubuxoki xa nisithi, ‘Uthi uYehova,’ ndibe mna ndingakhange ndithethe nto?”’
8 “‘Ngoko ke, ithi iNkosi enguMongami uYehova: “‘Ngenxa yokuba nithethe ubuxoki yaye nemibono yenu iyinkohliso, ndilutshaba lwenu,’ itsho iNkosi enguMongami uYehova.”+ 9 Isandla sam silwa nabaprofeti abanemibono eyinkohliso nabaprofeta ubuxoki.+ Abazukuqhubeka bephakathi kwabantu endikholiswayo ngabo; abazukubhalwa kwincwadi yengxelo yendlu kaSirayeli; yaye abazukubuyela kwilizwe lakwaSirayeli; niza kutsho nazi ukuba ndiyiNkosi enguMongami uYehova.+ 10 Yonke le nto ibangelwa kukuba babalahlekisile abantu bam, ngokuthi, “Kukho uxolo!” kodwa lungekho.+ Xa kwakhiwe udonga lokwahlula oluyekeyeke, baluqaba mhlophe.’*+
11 “Baxelele abo baluqaba mhlophe ukuba luza kuwa. Kuza kunetha izantyalantyala zemvula, kuwe amatye esichotho,* luze ludilizwe zizaqhwithi ezikhulu.+ 12 Xa lusiwa udonga kuza kuthiwa kuni, ‘Iphelele phi laa nto beniluqabe ngayo?’+
13 “Ngoko ke, ithi iNkosi enguMongami uYehova, ‘Ndiza kwenza kugqabhuke izaqhwithi ezikhulu ndicaphukile, nezantyalantyala zemvula ndinomsindo, ndize ndinitshabalalise ngamatye esichotho. 14 Ndiza kuludiliza udonga eniluqabe mhlophe, ndiluwise bhuma emhlabeni, ibe isiseko salo siza kubhenceka. Xa isixeko sisiwa, niza kutshabalala apho kuso; yaye niza kutsho nazi ukuba ndinguYehova.’
15 “‘Xa ndigqibile ukukhuphela umsindo wam eludongeni nakwabo baluqaba mhlophe, ndiza kuthi kuni: “Udonga alusekho, nabo baluqabayo abasekho.+ 16 Abaprofeti bakwaSirayeli abasekho, abo baprofeta eYerusalem nabayibonela imibono yoxolo, lube lungekho,”’+ itsho iNkosi enguMongami uYehova.
17 “Wena ke, nyana womntu, jonga kwiintombi zabantu bakowenu eziziqwebela ezazo iziprofeto, uze uprofete ngazo. 18 Yithi kuzo, ‘Ithi iNkosi enguMongami uYehova: “Baza kuthi shu abafazi abathunga amalaphu afakwa ezingalweni,* baze benze izigqubuthelo ezilingana zonke iintloko ukuze bazingele ubomi babantu! Nizingela ubomi babantu bam na, nibe nibusindisa obenu? 19 Niza kundingcolisa na phakathi kwabantu bam ngenxa yerhasi egcwalise isandla nangenxa yamaqhekeza esonka,+ nibulala abantu abangafanelanga bafe,* nize nibagcine bephila abo bangafanele baphile,* yonke le nto niyenzela ukuqhatha abantu bam abamamela ubuxoki benu?”’+
20 “Ngoko ke ithi iNkosi enguMongami uYehova: ‘Ndiyawacaphukela la malaphu enu bafazindini, lawo niwasebenzisela ukuzingela abantu ngokungathi nizingela iintaka, ibe ndiza kuwakrazula ezingalweni zenu, ndibakhulule abo nibazingela njengeentaka. 21 Ndiza kuzikrazula izigqubuthelo zenu ndize ndibasindise abantu bam kuni, bangabi saba yinto eniyibambisayo xa nizingela; niza kutsho nazi ukuba ndinguYehova.+ 22 Kuba nilityhafisile ilungisa ngobuxoki benu,+ ngoxa mna bendingalityhafisi,* naza nazomeleza izandla zomenzi-bubi,+ ukuze angajiki endleleni yakhe embi aze aqhubeke ephila.+ 23 Ngoko nina bafazindini niza kuyeka ukubona imibono yobuxoki, niyeke nokuvumisa;+ ndiza kubasindisa abantu bam kuni, nitsho nazi ukuba ndinguYehova.’”