Eyesibini KaSamuweli
10 Ekuhambeni kwexesha wafa ukumkani wama-Amoni,+ waza uHanuni unyana wakhe wangena ezihlangwini zakhe.+ 2 UDavide wathi: “Ndiza kumthanda ngokungagungqiyo uHanuni unyana kaNahashe, kanye ngendlela awandithanda ngayo utata wakhe.” Ngoko uDavide wathumela izicaka zakhe ukuba ziyokumthuthuzela kuba eswelekelwe ngutata wakhe. Kodwa ukufika kwezicaka zikaDavide kwilizwe lama-Amoni, 3 iinkosana zama-Amoni zathi kuHanuni inkosi yazo: “Ucinga ukuba uDavide ukuthumelele abathuthuzeli kuba ebonisa imbeko kutata wakho? Ngaba uDavide akabathumelanga aba bathuthuzeli ukuba beze kuhlola isixeko, basicuphe baze basitshabalalise?” 4 Ngoko uHanuni wazithatha izicaka zikaDavide wacheba ihafu yeendevu zazo,+ wazisika phakathi iimpahla zazo ezimpundu waza wathi mazihambe. 5 Akuyixelelwa loo nto uDavide, wakhawuleza wathumela amadoda ukuba ayokukhawulela ezi zicaka, kuba zazithotywe isidima. Ukumkani wathi kuzo: “Hlalani eYeriko+ zide ziphinde zikhule iindevu zenu, nize nibuye emva koko.”
6 Ekuhambeni kwexesha ama-Amoni aqonda ukuba alivumba elibi kuDavide, ngoko aqesha amaSiriya aseBhete-rehobhi+ namaSiriya aseTsobha,+ amajoni ahamba ngeenyawo ayi-20 000, nokumkani waseMahaka,+ kunye namadoda ayi-1 000, naseIshtobhi,* amadoda ayi-12 000.+ 7 Akuyiva loo nto uDavide, wathumela uYowabhi nawo wonke umkhosi, kwanawona magorha anamandla.+ 8 Ama-Amoni aphuma alungela ukulwa ngakwigeyithi yesixeko, ngoxa amaSiriya aseTsobha nawaseRehobhi kunye noIshtobhi* noMahaka, babebodwa endle.
9 Xa uYowabhi wabona ukuba abahlaseli abasedabini bamhlasela ngaphambili nangasemva, wanyula awona majoni abalaseleyo kwaSirayeli waza walungela ukulwa namaSiriya.+ 10 Wabeka uAbhishayi umntakwabo ukuba akhokele amadoda ashiyekileyo,+ ukuze alungele ukulwa nama-Amoni.+ 11 Emva koko wathi: “Ukuba amaSiriya ayandoyisa, uze undisindise, kodwa ukuba ama-Amoni ayakoyisa, ndiza kukusindisa. 12 Kufuneka somelele, sibe nesibindi+ ngenxa yabantu bakowethu nezixeko zikaThixo wethu, yaye uYehova uza kwenza into ayibona ilungile.”+
13 UYowabhi namadoda akhe basondela ukuze balwe namaSiriya, yaye wona abaleka emka phambi kwakhe.+ 14 Xa ama-Amoni abonayo ukuba amaSiriya abalekile, nawo ambaleka uAbhishayi, angena esixekweni. Emva kokuba elwe nama-Amoni, uYowabhi wabuyela eYerusalem.
15 Xa amaSiriya abonayo ukuba oyisiwe ngamaSirayeli, aphinda aqokelelana.+ 16 Ngoko uHadadezere+ wathi makulandwe amaSiriya awayekummandla woMlambo.*+ Eza eHelam, ekhokelwa nguShobhaki intloko yomkhosi kaHadadezere.
17 Akuyixelelwa loo nto uDavide, ngoko nangoko waqokelela wonke uSirayeli baza bawela iYordan baya eHelam. AmaSiriya alungela idabi, aza alwa noDavide.+ 18 Kodwa amaSiriya awabaleka amaSirayeli. UDavide wabulala abaqhubi bawo beenqwelo abayi-700 nabakhweli-mahashe abayi-40 000, yaye waxabela noShobhaki intloko yomkhosi wawo, wafela apho.+ 19 Xa bonke ookumkani ababezizicaka zikaHadadezere babonayo ukuba boyisiwe ngamaSirayeli, bakhawuleza benza uxolo noSirayeli baza baba zizicaka zakhe,+ yaye amaSiriya oyika ukuphinda ancedise ama-Amoni.