Eyesibini KaSamuweli
14 UYowabhi unyana kaTseruya+ wafumanisa ukuba intliziyo kakumkani ikuAbhisalom.+ 2 Ngoko uYowabhi wathumela eTekowa+ ukuba kubizwe umfazi okrelekrele, wathi kuye: “Khawube ngathi uzilile, unxibe iimpahla zokuzila, ungathambisi mafutha.+ Yenza ngathi uzilele umntu osele enethuba eswelekile. 3 Wakugqiba uze ungene uthethe kukumkani ngale ndlela.” Ngoko uYowabhi wafaka amazwi emlonyeni walo mfazi.*
4 Umfazi waseTekowa wangena kukumkani, wawa ngobuso, waqubuda wathi: “Ndicela uncedo kumkani!” 5 Ukumkani wathi: “Yintoni ingxaki?” Yena wathi: “Ingxaki yam kukuba ndingumhlolokazi, indoda yam ayisaphili. 6 Isicakakazi sakho besinoonyana ababini, ibe baye balwa endle. Bekungekho mntu wakubanqanda, waza omnye unyana wambetha wambulala omnye. 7 Ngoku intsapho yonke ilwa nam, isicakakazi sakho, isithi, ‘Makeze apha lo ubulele umntakwabo, ukuze simbulale ngenxa yobomi bomntakwabo* ambuleleyo,+ nokuba loo nto ithetha ukutshayela indlalifa!’ Baza kucima ilahle lam elivuthayo elishiyekileyo,* lize licinywe igama lomyeni wam, angabi namntu ushiyekileyo* phezu komhlaba.”
8 Ukumkani wathi kulo mfazi: “Yiya endlini yakho, ndiza kukhupha umyalelo ngawe.” 9 Lo mfazi waseTekowa wathi kukumkani: “Nkosi yam kumkani, malibe phezu kwam naphezu kwendlu katata ityala, ngoxa ukumkani emsulwa netrone yakhe.” 10 Ukumkani wathi: “Ukuba kukho nabani na othetha enye into kuwe, uze umzise apha kum, yaye soze aphinde akuhluphe.” 11 Yena wathi: “Ukumkani makancede akhumbule uYehova uThixo wakho, ukuze umphindezeli+ angazisi intlekele aze amtshabalalise unyana wam.” Ukumkani wathi: “Ephila nje uYehova,+ akukho nalunye unwele lonyana wakho oluza kuwela emhlabeni.” 12 Lo mfazi wathi: “Ndicela uvumele isicakakazi sakho sithethe ilizwi kwinkosi yam ukumkani.” Wathi: “Ungathetha!”
13 Umfazi wathi: “Kutheni ucinge ukwenza into enje kubantu bakaThixo?+ Xa ukumkani ethetha ngolu hlobo, uzenza abe netyala, kuba ukumkani akambuyisi unyana wakhe ogxothiweyo.+ 14 Kuba nakanjani na siza kufa size sibe njengamanzi achithwe emhlabeni, angenakuphinda abuthwe. Kodwa uThixo ebengasoze abususe ubomi,* ebeza kukhangela izizathu zokuba efanele angagxothwa lowo ugxothiweyo kuye. 15 Ndize kuthetha eli lizwi kukumkani inkosi yam, kuba abantu baye bandoyikisa. Ngoko isicakakazi sakho sathi, ‘Makhe ndithethe kukumkani. Mhlawumbi ukumkani uza kwenza ngokwesicelo sekhobokazana lakhe. 16 Mhlawumbi ukumkani angamamela, aze alisindise ikhobokazana lakhe esandleni sendoda efuna ukunditshabalalisa nonyana wam okuphela kwakhe, kwilifa esilinikwe nguThixo.’+ 17 Emva koko isicakakazi sakho sithe, ‘Kwanga ilizwi lenkosi yam ukumkani lingandinika isiqabu,’ kuba inkosi yam ukumkani injengengelosi yoThixo wokwenene, ekwahluleni into elungileyo kwembi. Kwanga uYehova uThixo anganawe.”
18 Ukumkani wamphendula umfazi wathi: “Nceda ungandifihleli into endikubuza yona.” Umfazi wathi: “Mayithethe inkosi yam ukumkani.” 19 Ukumkani wathi: “NguYowabhi na okufake kuyo yonke le nto?”+ Umfazi wathi: “Kanye njengoko uphila,* nkosi yam kumkani, kunjengokuba inkosi* yam ukumkani isitsho, kuba sisicaka sakho uYowabhi ondiyaleleyo nofake onke la mazwi emlonyeni wesicakakazi sakho. 20 Isicaka sakho uYowabhi wenze le nto ukuze atshintshe izinto, kodwa inkosi yam inobulumko obufana nobengelosi kaThixo wokwenene, ibe yazi yonke into eqhubekayo elizweni.”
21 Ukumkani wathi kuYowabhi: “Kulungile, ndiza kuyenza le nto.+ Hamba uyokumlanda umfana uAbhisalom.”+ 22 UYowabhi wawa ngobuso, waqubuda, wamncoma ukumkani. Wathi: “Namhlanje isicaka sakho siyazi ukuba uyandithanda nkosi yam kumkani, kuba ukumkani uyenzile into ecelwe sisicaka sakhe.” 23 Emva koko uYowabhi waphakama, waya eGeshure+ wayokulanda uAbhisalom, wamzisa eYerusalem. 24 Kodwa ukumkani wathi: “Makabuyele endlini yakhe, akanakububona ubuso bam.” Ngoko uAbhisalom wabuyela endlini yakhe, yaye akazange abubone ubuso bukakumkani.
25 Kuye wonke uSirayeli, akukho ndoda yayinconywa ngobuhle ukodlula uAbhisalom. Ukususela ngaphantsi elunyaweni ukuya kutsho phezulu entloko, wayengenasiphako. 26 Kwakufuneka ayichebe intloko yakhe ekupheleni konyaka ngamnye ngenxa yokuba yayimsinda kakhulu, ngoko xa eyichebile iinwele zentloko yakhe zazinobunzima obuziishekele eziyi-200* ngokwelitye lokukala lasebukhosini.* 27 UAbhisalom wazalelwa oonyana abathathu+ nentombi enye, egama linguTamare. Yayintle nyhani ke loo ntombi.
28 UAbhisalom wahlala eYerusalem iminyaka emibini yonke, kodwa zange abubone ubuso bukakumkani.+ 29 Wathumela ukuba kubizwe uYowabhi ukuze amthume kukumkani, kodwa uYowabhi wala. Waphinda wathi makabizwe okwesibini, akavuma nangelo xesha ukuza. 30 Ekugqibeleni wathi kwizicaka zakhe: “Isiqwenga somhlaba sikaYowabhi singakwesam, yaye unerhasi kuso. Hambani niyokusitshisa.” Izicaka zika-Abhisalom zasitshisa isiqwenga somhlaba. 31 Ngenxa yoku, uYowabhi waphakama waya endlini ka-Abhisalom, wathi kuye: “Izicaka zakho zisitshisele ntoni isiqwenga sam somhlaba?” 32 UAbhisalom wathi kuYowabhi: “Jonga! Ndithumele umyalezo kuwe ndisithi, ‘Yiza apha ukuze ndikuthume kukumkani, uthi: “Ndibuyele ntoni eGeshure?+ Ngekungcono ukuba bendihleli phaya. Mandibubone ubuso bukakumkani, futhi ukuba kukho ityala endinalo, makandibulale.”’”
33 UYowabhi wayokuchazela ukumkani. Emva koko wabiza uAbhisalom, yena wangena kukumkani waza waqubuda phambi kwakhe, emva koko ukumkani wamphuza* uAbhisalom.+