Eyesibini YeziKronike
29 UHezekiya+ waba ngukumkani eneminyaka eyi-25, ibe walawula iminyaka eyi-29 eYerusalem. Igama likamama wakhe yayinguAbhiya intombi kaZekariya.+ 2 Waqhubeka esenza izinto ezilungileyo emehlweni kaYehova,+ kanye njengoDavide ukhokho wakhe.+ 3 Ngonyaka wokuqala wolawulo lwakhe, ngenyanga yokuqala, wazivula iingcango zendlu kaYehova, wazilungisa.+ 4 Emva koko wadibanisa ababingeleli nabaLevi kwindawo evulekileyo ngasempuma. 5 Wathi kubo: “Ndimameleni baLevi. Zenzeni nibe ngcwele+ nize niyenze ibe ngcwele nendlu kaYehova uThixo wookhokho benu, nizikhuphe izinto ezingacocekanga endaweni engcwele.+ 6 Kuba ootata bethu khange bathembeke, yaye benze okubi emehlweni kaYehova uThixo wethu.+ Bamshiya, babujika ubuso babo ententeni engcwele kaYehova baza bamfulathela.+ 7 Bavala iingcango zeveranda+ bacima nezibane.+ Bayeka ukutshisa iziqhumiso eziqholiweyo+ nokunikela imibingelelo etshiswayo+ endaweni engcwele, kuThixo kaSirayeli. 8 Ngoko uYehova wacaphuka kakhulu ngenxa kaYuda neYerusalem,+ kangangokuba wabenza bayinto nje eyoyikisayo neyothusayo. Wabenza bayinto yokubethelwa umlozi,* njengoko nizibonela nani.+ 9 Ookhokho bethu bawiswa likrele,+ yaza loo nto yenza oonyana bethu neentombi zethu nabafazi bethu bathinjwa.+ 10 Ngoku ke entliziyweni yam ndinomnqweno wokwenza isivumelwano noYehova uThixo kaSirayeli,+ ukuze awehlise umsindo wakhe kuthi. 11 Bonyana bam, ayiloxesha lokungakhathali* eli, kuba uYehova ukhethe nina ukuba nime phambi kwakhe ukuze nimsebenzele+ nize niqhumise nemibingelelo yakhe.”+
12 Baphakama ke abaLevi: kumaKohati+ yaba nguMahati unyana ka-Amasayi noYoweli unyana ka-Azariya, kumaMerari,+ yaba nguKishe unyana ka-Abhedi noAzariya unyana kaYehaleleli, kumaGershon+ yaba nguYowa unyana kaZima noEden unyana kaYowa, 13 koonyana bakaElitsafan yaba nguShimri noYewuweli, koonyana baka-Asafu+ yaba nguZekariya noMataniya, 14 koonyana bakaHeman+ yaba nguYehiyele noShimeyi, koonyana bakaYedutun+ yaba nguShemaya noUziyeli. 15 Emva koko, baqokelela abantakwabo, bazenza bangcwele baza beza ukuze bacoce indlu kaYehova, besenza njengokuba wayeyalele ukumkani ngamazwi kaYehova.+ 16 Ababingeleli bangena endlini kaYehova, bacoca baza bakhupha zonke izinto ezingcolileyo ezazisetempileni kaYehova, bazibeka kwiyadi+ yendlu kaYehova. Bona abaLevi bazithatha bayokuzilahla ngaphandle, kwiNtlambo YeKidron.+ 17 Baqalisa ukuzenza babe ngcwele ngomhla wokuqala wenyanga yokuqala, yaye bade bayokufika kwiveranda kaYehova+ ngomhla wesibhozo waloo nyanga. Bayenza yangcwele iintsuku ezisibhozo indlu kaYehova, bagqiba ngomhla we-16 wenyanga yokuqala.
18 Emva koko baya kuKumkani uHezekiya, bathi: “Siyicocile yonke indlu kaYehova, isibingelelo somnikelo otshiswayo+ nazo zonke izinto ezisetyenziswa kuso,+ netafile ekubekwa kuyo izonka*+ nazo zonke izinto ezisetyenziswa kuyo. 19 Zonke izinto awayezikhuphile uKumkani uAhazi xa wayelawula engathembekanga,+ sizilungisile saza sazenza saba ngcwele,+ yaye ngoku ziphambi kwesibingelelo sikaYehova.”
20 UKumkani uHezekiya wavuka ekuseni, waqokelela iinkokheli zesixeko, benyuka baya endlini kaYehova. 21 Beza neenkunzi zeenkomo ezisixhenxe, iinkunzi zeegusha ezisixhenxe, amatakane egusha aziinkunzi asixhenxe neenkunzi zeebhokhwe ezisixhenxe, ukuze zibe ngumnikelo wesono wasebukhosini, owendawo engcwele, nokaYuda.+ Waxelela ababingeleli, inzala ka-Aron, ukuba bazinikele kwisibingelelo sikaYehova. 22 Bazixhela iinkomo,+ baza ababingeleli bathatha igazi bafefa isibingelelo ngalo,+ balandelisa ngeenkunzi zeegusha baza bafefa isibingelelo ngegazi lazo, baxhela namatakane eegusha aziinkunzi, bafefa isibingelelo ngegazi lawo. 23 Emva koko bazisa iinkunzi zeebhokhwe zomnikelo wesono phambi kokumkani nebandla, babeka izandla zabo phezu kwazo. 24 Ababingeleli bazixhela baza benza umnikelo wesono ngegazi lazo phezu kwesibingelelo, ukuze bahlawulele uSirayeli wonke, kuba ukumkani wayethe umnikelo otshiswayo nomnikelo wesono wawufanele ube ngokaSirayeli wonke.
25 Ngelo xesha, wayemise abaLevi endlini kaYehova, bephethe amacangci, imirhubhe neehadi,+ ngokomyalelo kaDavide+ noGadi+ imboni noNatan+ umprofeti, kuba lo myalelo wawusuka kuYehova esebenzisa abaprofeti bakhe. 26 Ngoko abaLevi babemile bephethe izixhobo zikaDavide, bona ababingeleli bephethe amaxilongo.+
27 Emva koko, uHezekiya wayalela ukuba kunikelwe umbingelelo otshiswayo esibingelelweni.+ Xa kwakuqaliswa ukwenziwa umnikelo otshiswayo, yaqala nengoma kaYehova, kwatsho namaxilongo, kukhokela izixhobo zikaKumkani uDavide wakwaSirayeli. 28 Lonke ibandla laqubuda ngoxa kwakuculwa ingoma kukhaliswa namaxilongo. Yaqhuba le nto de waphela umnikelo otshiswayo. 29 Ngokukhawuleza nje bakugqiba ukwenza lo mnikelo, ukumkani nabo bonke ababekunye naye baguqa, baqubuda. 30 UKumkani uHezekiya neenkokheli baxelela abaLevi ukuba badumise uYehova ngamazwi kaDavide+ naka-Asafu+ imboni. Bamdumisa bevuya, baguqa baza baqubuda.
31 UHezekiya wathi: “Ekubeni niye nakhethelwa ukwenza umsebenzi kaYehova, yizani, zisani imibingelelo neminikelo yokubulela endlini kaYehova.” Ibandla lazisa imibingelelo neminikelo yokubulela, yaye wonke umntu ontliziyo ivumayo wazisa iminikelo etshiswayo.+ 32 Inani leminikelo etshiswayo eyaziswa libandla yaba ziinkomo eziyi-70, iinkunzi zeegusha eziyi-100, amatakane egusha aziinkunzi ayi-200, zonke ezi zinto zaba ngumnikelo otshiswayo owenzelwa uYehova,+ 33 yaye iminikelo engcwele yaba ziinkomo eziyi-600 neegusha eziyi-3 000. 34 Ababingeleli babembalwa kakhulu ukuba bangakwazi ukuhlinza yonke iminikelo etshiswayo, ngoko bancediswa ngabantakwabo abaLevi,+ de wagqitywa umsebenzi, nababingeleli bazingcwalisa,+ kuba yayingabaLevi abona babekukhuthalele* ukuzingcwalisa kunababingeleli. 35 Kwakhona, kwakukho iminikelo etshiswayo emininzi,+ namanqatha emibingelelo yobuhlobo,+ neminikelo eselwayo yeminikelo etshiswayo.+ Ngaloo ndlela umsebenzi wendlu kaYehova waphinda wenziwa. 36 Ngoko uHezekiya nabo bonke abantu bavuya ngenxa yento uThixo wokwenene awayenzela abantu,+ kuba yonke le nto yenzeka ngokukhawuleza.